試問邊個抗拒到炸雞髀呢？今次為大家推介4間巨型生炸雞髀食店，當中有舊屋邨新開業嘅炸髀專門店，亦有港島斜路隱匿小食店，即刻跟住開飯仔出發覓食啦！
一人小店製多汁生炸髀 卿記工房 
位於堅尼地城一斜路旁嘅外賣小食店，由90後店主一人經營，主打一系列港式街頭小食。雖然位置唔太起眼，但係好多街坊都大讚佢嘅嘅生炸爆汁雞髀（$35/隻）出色，更被封為「港島最強炸髀」！每份均即叫即炸，等約12分鐘就食得。拎上手熱辣辣，香氣誘人，外皮激薄而且有肉汁，肉質嫩滑，調味亦啱啱好，的確幾出色！另有燒賣、魚蛋、凍粉、椒麻雞等小食可以一併試埋。
南山邨生炸雞髀專門店 髀加燒
近50年歷史嘅南山邨有新成員，就係呢間開業短短1個月嘅生炸雞髀專門店。炸皮金黃顏色對辦而且雞髀頗有分量，第一啖試到香脆外皮，雞肉厚身入口夠滑，不過開飯仔覺得調味偏淡，重口味人士未必會滿足。生炸雞髀既可以單點（$36/隻），亦可以跟配飯（$58）或者下午茶限定嘅薯條或沙律套餐（$42），後者嘅粗波浪薯條同水果沙律好有兒時懷舊味道。
隱匿小巷泰菜店 味道
雖然餐廳主打泰國菜，但其中泰式冬蔭功金邊粉套餐跟配嘅炸雞髀卻成為必食款式之一（$84），雞髀帶微焦香氣，拎上手仲滴緊汁！調味係港式風味，雞肉未到好滑但唔嚡口，啱晒鍾意啖啖肉嘅食肉獸啊～而冬蔭功湯底偏酸辣惹味，配金邊粉掛滿湯汁好開胃。
宵夜恩物 炸、滷水款式 良髀
圖：新界嘅夜貓們可能都會知道呢間餐廳，營業到凌晨1am絕對係宵夜恩物啊。餐牌上供應一系列港式小食，其中個個嚟到都一定會食招牌雞髀，分別有炸同滷水款式選擇（$32/隻）。每隻雞髀幾乎大過塊面，炸髀表面會裹上一層薄薄嘅炸粉，所以特別酥脆；而滷水雞髀入味之餘，肉質仲好嫩。同時仲有意粉、飯、小食、糖水同飲品，選擇多多。
文：Sharon
編：Cathy
相、片：Tom
