鍾意 Cafe Hopping 嘅朋友留意，今期搜羅咗幾款有特色嘅窩夫畀大家，除咗平時常見嘅亦有牛角包窩夫及鹹窩夫選擇，啱晒唔同口味嘅朋友仔～
 

目錄

奶茶雪糕忌廉牛角窩夫  Tommy Yummy 

熱帶島嶼風格嘅泰式休閑 Cafe，第二間分店啱啱喺 12 月 20 日正式進駐康城！新店限定包括呢個泰式奶茶雪糕忌廉牛角窩夫，面層為自家配方泰式奶茶雪糕球，煉奶香氣濃厚且帶有深韻嘅紅茶香，唔會有味道互搶嘅問題。中層係幼滑嘅忌廉，底層係熱辣辣而香脆鬆化嘅牛角包窩夫，一啖入口食到冰火交替嘅感覺！食時加埋泰式奶茶醬就更 Rich 啦～
 

芝士奶蓋招牌窩夫  E FOR EGG 

圖: Eatcookfoodie

平時去開 Cafe 嘅朋友應該對大圍呢間店唔陌生啦！佢嘅芝士奶蓋招牌窩夫夠晒打卡-able，窩夫上面有一隻可愛嘅造型小雞蛋，唔單止好睇仲好食，窩夫外脆內軟，入面仲夾有超級軟糯嘅麻糬粒，芝士奶蓋帶有淡淡鹹香，好味又唔太甜，難怪咁受歡迎。
 

芒果椰汁糯米飯窩夫  Garden at Mei Ho Cafe

圖: RiceComeOpenMouth

有無諗過芒果糯米飯可以配埋窩夫？呢間泰式 Cafe 就供應呢個芒果椰汁糯米飯窩夫，Concept 幾得意，厚身 Waffle 夾住大大球雲尼拿雪糕、芒果雪糕同黑糯米。窩夫本身蛋味香濃，配雪糕唔係咩新嘢，但加咗球黑糯米飯就令口感層次更豐富。不過份量比較大，建議同朋友 Share 食會比較好。
 

八十後黑糖麻糬窩夫  八〇 

圖: vickykakaka

由三位 80 後開設嘅咖啡店，店內供應唔同口味嘅窩夫都好出色呀～如八十後黑糖麻糬窩夫，窩夫係偏向濕潤鬆軟類型，切開窩夫中間仲會有煙煙韌韌嘅黑糖麻糬，加埋士多啤梨同藍莓更清新，最貼心係有得揀半份或全份呀。金栗天使牛角酥都推介，外層嘅栗子蓉唔太甜，內裡包裹住一球雲呢拿雪糕，底下就係大熱嘅牛角窩夫，酥脆又能保留原有牛角酥嘅煙韌口感。
 

南乳雞肉窩夫  The Square 

有時轉吓口味食吓鹹嘅窩夫都唔錯～位於西貢嘅洋溢歐陸風情嘅咖啡店及餐廳，啱晒放假去 Chill 吓。招牌雞肉窩夫嘅雞肉採用南乳醃製，味道香濃雞肉 Juicy 又嫩滑，鹹甜嘅配搭令人愈食愈上癮！窩夫配以自家製莓果醬同蜂蜜牛油，兩者同南乳嘅香氣意外地夾。

文: Yanica