麵包/糕點/果醬自家製作！必試鬆餅+法式吐司灣仔新開樓上純白Cafe

灣仔呢間9月新開嘅樓上Cafe，好快已經成為Cafe Hopping必到熱點，裝修以白色同大地色系為主，加上大玻璃窗同吊椅感覺特別Chill。食物更係加分，唔單止大部分麵包、糕點都係自家製，果醬更用本地水果新鮮製作，平均水準都唔錯，食得出店主花嘅心思！

灣仔新店更大半開放式吧枱歡迎交流

Nations Coffee 9月從觀塘搬到灣仔，樓上舖透過玻璃窗可以望到利東街一帶街景，地方大咗廚房都大咗，所以新店可以供應到更多新鮮自家烘焙食物。店名嘅Nations係指小店係開放畀所有人嚟，無論係想休息、醫肚、傾計都無任歡迎，店主亦指佢哋會主動同客人交流。Menu上面菜式嘅名亦好有意思，不妨留意下。

自家烘焙糕點首推鬆餅配新鮮果醬

Double Rejoicing（$68）

唔少Foodie推介餐廳嘅自家製鬆餅，分量比一般鬆餅更大，暖笠笠上枱，食落外脆內鬆軟，唔會太乾或者太硬，更帶淡淡麵粉香氣。店主表示係用咗意大利麵粉同澳洲牛油手工製作。

另一個亮點在於配搭嘅忌廉芝士同自選果醬，前者選用奶香濃郁嘅澳洲忌廉芝士，後者係餐廳自家製作。果醬選擇有檸檬、藍莓、士多啤梨，檸檬醬採用本地新鮮檸檬，藍莓同士多啤梨就勝在保留粒粒果蓉，甜味天然而唔膩。

The Pearl in The Sea（$98）

擺盤精美嘅The Pearl in The Sea主角係朱古力貝殼蛋糕，用優質可可粉以低糖配方自家製作，邊位微脆裡面相當鬆軟。裡面更混入朱古力粒，趁熱食嘅時候半溶口感更增添朱古力香氣同層次。脹卜卜嘅貝殼蛋糕伴新鮮忌廉，再以朱古力醬同餅乾碎模擬沙灘海邊，原來係店主寓意每位客人就好似貝殼裡面嘅珍珠一樣咁珍貴，值得愛惜。

肉桂香滿分～鬆軟法式吐司

Wonderful Ever（$118）

開飯仔私心推介呢份一上枱就聞到好香肉桂味嘅法式吐司，餐廳從麵包開始做起，選用日本北海道麵粉、法國牛油、新鮮雞蛋，以低溫發酵嘅方法製作成Brioche（軟吐司）。Brioche切成每塊約2cm厚，浸蛋漿後以牛油煎香。入口濕潤香軟，可以倒少少加拿大楓葉糖漿，甜味更帶出肉桂、雞蛋同牛油香氣，味道豐富。

More, I want more（$88）

甜點之外，餐廳嘅鹹食一樣出色，自家製貝果同樣用上北海道麵粉，加入坊間較為少見嘅全麥糖漿製作，咬落有嚼勁得嚟而唔會太韌或者太硬。貝果三文治其中一款配搭帶鹹香嘅挪威煙三文魚、美國忌廉芝士，再以羅馬生菜、番茄等新鮮蔬菜平衡膩感，食完滿足而不失清爽。

多重享受！沙漏杯Beauty+小山園抹茶

Beauty（$40）

特別用沙漏形狀玻璃杯奉上，下面係凍嘅牛奶上面係熱嘅濃縮咖啡，好似Dirty咁可以一次過享受多重層次：建議第一啖先試濃縮咖啡嘅原味，之後可以按喜好慢慢品嘗咖啡融入牛奶嘅風味，每啖都有少少唔同咁。

咖啡選用英國咖啡烘焙商Square Mile嘅出品，咖啡豆款式約每兩個月更換一次，House Blend會選用風味平衡嘅拼配豆，如果想飲帶果香或者唔同特色嘅咖啡，可以試試佢哋選用單品豆嘅Hand Drip Coffee（$68-88）。

Kyoto Uji Matcha Latte（$48/Hot，$68/Iced）

非咖啡飲品亦非常用心，抹茶選用日本宇治山政小山園嘅抹茶粉，更會用上茶筅即點即刷茶，再混和牛奶，口感柔滑帶抹茶回甘。凍飲更會加上新鮮忌廉同Mövenpick雲呢拿雪糕，豐富到可以當半份甜品！愛甜嘅朋友可以試埋另一杯French Weiss 72% Dark Chocolate（$50/Hot，$70/Iced），凍飲同樣會有忌廉同雪糕啊！

吊椅係最受歡迎嘅打卡位之一