雞煲火鍋店而家可謂愈開愈多，深水埗最近又有間新店加入戰場。老闆兼主廚李文佑師傅曾經喺著名雞煲火鍋店做過廚，佢覺得其實雞煲仲有好多發展空間，所以就開設咗自己嘅雞煲專門店，同時研發出獨家嘅雞煲醬汁，鍾意食雞煲嘅餓底準備好未？

火鍋一人套餐(兩位起)($188)

嗱，呢個海鮮火鍋套餐真係抵食嘅，$188有一個海鮮拼盤、一份雪花肥牛及西班牙黑毛豬、自選火鍋配料八款，湯底就四選一。海鮮拼盤固定三款包括蟹、鮑魚同扇貝，另外可以自選四款。如果想再食好啲可以加六十蚊將蟹轉龍蝦，海鮮都幾新鮮吓，以呢個價嚟講質素算唔錯。

湯底方面就有粥底同沙嗲湯，食得海鮮就梗係要揀粥底啦，咁就可以將啲海鮮精華飲晒落肚。貪心嘅餓底們覺得唔夠喉？咁就啱啦，叫呢個套餐的話仲可以以半價價錢將湯底換做雞煲，重口味人士啱晒！

四寶雞煲($368/半隻、$588全隻)

平時食雞煲最鍾意加啲吸味配料落去一齊炒，師傅話其實海鮮同肉類都可以相輔相承，所以發明咗呢個集扇貝、鮑魚、花膠及海參於一身嘅「四寶雞煲」，花膠同海參都吸晒醬料味道，夠晒惹味。至於雞煲醬汁，係師傅獨家研製出嚟，加入白蔻、紅椒及花椒等材料，香辣帶少少甜味，又唔會蓋過雞隻鮮味。

牛頸脊($178/小、$328/大)

想食靚牛必叫牛頸脊，牛味重之餘有咬口，輕輕淥一淥就食得㗎啦。

椒鹽鴨舌($68)、蜜糖雞翼($58)

另外餐廳有供應唔少佐酒小食，椒鹽鴨舌炸得香脆，蜜糖雞翼蜜糖味重，雞翼肉汁仲好豐富添～

要介紹埋佢地嘅特飲如芒果梳打等，全部都係$28，但杯杯都好大杯啊，飲成餐都無問題！

品嚐雞煲火鍋

地址: 深水埗青山道84-90號新明閣地下5-6號舖

文、相、片:  Yanica