2019港澳米芝蓮總結蜜斗老闆：我好想承傳香港嘅食物

嚟到第11屆嘅港澳米芝蓮指南，香港有63間餐廳獲星，而澳門就有19間。當中有9間餐廳新上榜，更有3間餐廳成功升級。而車胎人美食推介則有4間餐廳新上榜，當中包括只係啱啱開咗三個幾月嘅台灣媽媽吃什麼，至於街頭小食則共有7間餐廳首次入圍，例如重新裝修嘅公和荳品廠、今年先開業嘅榴槤樂園同蜜斗。

《米芝蓮指南香港澳門2018》最新收錄一覽
             香港         澳門
三星      7 (1升級) 3(1升級)
二星       12 (新x2) 5(新x1)
一星       44 (新x6) 11
車胎人    71 (新x4) 9
街頭小食 22(新x5) 10(新x2)

發佈會同上年一樣，都係假澳門新濠天地舉行，各大傳媒、餐飲業界、大廚等都有出席，場面熱鬧，部分餐廳獲奬時更傳出陣陣歡呼吶喊之聲。

發佈會完結後，開飯仔都同幾位新入圍或升級嘅大廚傾咗幾句，佢哋嘅心情都係非常興奮。

【香港米芝蓮三星餐廳（由二星升級）：中環高質法國菜Caprice】

主廚Guillaume Galliot：「我好興奮。我冇諗過可以獲奬，因為我只係加入咗Caprice大約年半嘅時間，我們組織咗一個好強嘅團隊。通常要用比年半更多嘅時間先可以得到呢個成就。但我們喺年半內就做到喇。所以我們都真係非常高興。」

【澳門米芝蓮三星餐廳（由二星升級）：精美點心譽瓏軒】

行政總廚歐陽文彥：「而家感覺好興奮好奇妙，之前都冇諗過可以升多一級。呢個奬對我哋餐飲業嚟計個個都夢寐以求嘅，得到其他所有人嘅認同，證明間餐廳嘅出品、佢嘅質素，同客人嚟到嘅滿足度。我哋餐廳開咗好耐，而家係餐廳最高殊榮，亦係我人生烹飪生涯嘅最高峰。

客人每次嚟好開心好滿足咁去惠顧我哋嘅餐廳，呢一點我覺得好重要。我哋而家用緊嘅食材，全部都係用最新鮮、最時令嘅。例如我哋嘅小籠包，用日本嘅毛蟹，佢嘅鮮味同小籠包嘅湯汁出嚟嘅效果係最好、最鮮味。」

【香港米芝蓮二星餐廳（首年入圍）：東京三星壽司名店鮨．齋藤】

香港店主理人小林郁哉：「我哋成個團隊好高興可以拎到兩星。今年拎兩星係一件好榮幸嘅事，因為餐廳只係開咗8個月，希望出年可以有更好嘅成績。雖然東京嗰邊嘅餐廳有三星，但齋藤考司san都係冇畀任何壓力我哋香港嘅團隊。而且佢哋嗰邊都係開業第一年得到一星，然後逐年升級，但香港店第一年就拎到二星，係一件好興奮嘅事。我諗對自己、對齋藤考司嚟講，最緊要係每個客嚟到餐廳係一個開心嘅體驗，呢樣嘢比拎到幾多粒星更加重要。」

另外，開飯仔亦即時同咗部分新入圍車胎人同街頭小食嘅餐廳負責人做個訪問，佢哋表示事前全不知情，所以感覺驚喜。

【香港米芝蓮新入圍街頭小食：上環冇味精車仔麵蜜斗】

老闆Connie：「我哋4月開舖到而家，其實每一步都喺度進步，因為我不停咁改食譜，改到自己可以日日落去食。一定要冇味精，因為好多人味精敏感，會瞓唔著覺，好多喺中環區嘅外籍人都有同樣情況，但唔落味精又要好食真係好難，但總算做到。

我係香港人，要傳承香港嘅嘢，車仔麵係香港嘅代表，我好想承傳香港嘅食物，但同時要同現代人嘅健康概念接軌。」

【香港米芝蓮新入圍街頭小食：榴槤小食店　榴槤樂園】

老闆Nicole：「收到消息嘅時候覺得好開心好榮幸。最想感謝身邊嘅朋友同一直支持我哋嘅食客。

開心嘅原因係我哋可以將自己鍾意嘅榴槤同大家一齊分享，聽到有客人話喺舖頭賣嘅即開榴槤價錢同馬來西亞差唔多，令大家開心就係我哋最大嘅動力，亦係舖頭嘅宗旨：希望可以成為香港各位榴槤迷嘅樂園！」

【香港米芝蓮新入圍街頭小食：翻新後的老字號　公和荳品廠】

(資料圖片)

負責人蘇小姐：「獲得推薦都開心嘅，因為係飲食業界嘅肯定。上年冇提名，今年重新裝修後再上返榜都開心。可能係多咗朋友關心香港傳統小食同行業啦。

其實裝修完後，都有街坊驚質素有變，而家就可以證明畀大家睇，我哋經過翻新、重新出牌後，都keep到以往水準，保持到質素。」

【香港米芝蓮新入圍車胎人美食：台灣媽媽吃什麼】

主理人Tracy 及Grace：「其實很開心，也很意外，從開舖到現在只是三個多月。能夠再次得到這個殊榮，其實不只是我們，我們整個團隊都很開心。今天（昨天）下午記者通知我們，我們才知道。大家都很意外，很SURPRISE。

這是對整個團隊的肯定，因為很多人都知道我們之前發生了一些不好的事情，我們這個團隊，其實從以前舊店到現在，大家都在一起共同成長，對整個團隊來說，這是個很正面的鼓舞。」

文：Kar
相、片：Tom Li