踏入3月，今個月嘅十強比較平穩，新舊上榜佔半，有最新人氣餐廳，但亦有一啲開業咗一段時間，但仍然保持水準嘅食店。要知道香港飲食潮流來得快去得快，要站穩住腳絕對唔容易！能夠有得留低嘅，都係有實力兼有質素餐廳，即刻睇睇有邊幾間先！
第10位 炊豕店
呢間位於銅鑼灣嘅小店，憑住一塊靚豬扒已經連續三個月上榜，雖然回落至第10 位，好評仍然不絕。今次店子迎推柚子蜜豬扒，酸酸甜甜好開胃，將炸豬扒嘅油膩感一掃而空。另外每日4pm後供應嘅焗豬扒飯都唔錯，已經食過招牌菜嘅回頭客可以試試。
圖：第9位 Grubers (*新上榜)
來自法國摩納哥嘅漢堡專門店，於亞洲開設嘅首間分店，咁遠水路嘅漢堡有咩特別？原材料當地直送，用法國草飼牛肉並加入唔同香料、墨西哥辣椒、松露等製漢堡扒，每塊扒本身已有味道，再配上秘製醬汁或者雞蛋、芝士等配料，超級豐富！
圖：第8位 i CREMERiA Café
雪糕係春夏秋冬都會食嘅，連續兩星期上榜嘅i CREMERiA，除咗有招牌金箔雪糕、蜜瓜芭菲，亦有好多人like嘅下午茶套餐，有成6款甜品，包括招牌軟雪糕、蛋糕、白玉、三文治、同埋日本水果，睇落吸引又滿足！
圖：第7位 Bakehouse (*新上榜)
呢間麵包店都算係最近爆紅人氣店！由前四季餅廚Grégoire Michaud創立，每日都有長長人龍爭住買牛角包，真係好瘋狂！牛角包外層鬆脆，層次感豐富，自家製酸種麵包都好受歡迎，基本上晏晝3、4點已經沽清！49個笑臉零負評唔係浪得虛名嘅。
圖：第6位 桃園眷村
同樣係連續3個月上榜，今個月繼續留守榜中。台灣早餐喺香港的確比較少有，加上價錢抵食，食物純樸美味，鬆餅夠鬆脆，飯糰用料足而且夠熱辣辣，充滿台灣古早風味。證明食物唔使花巧，都可以滿足味蕾。
圖：第5位 夏雪 (*新上榜)
甜品店原本位於西環，擴充至大圍後人氣有增無減，主打窩夫足料大大份，賣相唔錯，而且有多款口味任揀，好似紫薯、黑芝麻，幾有新鮮感。鍾意抹茶嘅就要食抹茶特盛，有抹茶心太軟、銅鑼燒、抹茶啫喱、白玉、蕨餅等。
圖：第4位 魂
氣勢如「魂」嘅拉麵店再回勇，重返排名榜兼獲第4位！拉麵咁多年都保持都質素，拉麵得4款口味，除咗原味，火魂為蕃茄辣汁配三文魚、青龍係菠菜汁豚骨配蟹肉魚子醬、太極為墨魚汁配蟹膏金箔，矜貴有特色。
圖：第3位 ATUM Restaurant (*新上榜)
餐廳以藝術為出發點，每道菜都好似一幅畫咁精緻，而且配搭新穎，三文魚配蜜柑啫喱、帶子配紫薑，不過味道又唔錯，成日都俾到客人新鮮感，所以開業以來都好有唔少好評。今次首度上榜就已進駐第3位，實力強勁！
圖：第2位 橘焱胡同燒肉夜食 (*新上榜)
呢間來自台灣嘅燒肉店，開業半年先至首次上榜！餐牌同台灣一樣，招牌作包括鹽葱牛舌、蟹膏生干貝、牛五花、霜降松阪豬肉等，材料新鮮調味適中，更可以請專人幫你燒，而且坐吧枱係有炭爐，食物更有炭燒香！
圖：第1位 The Point (*新上榜)
位於餐廳來去匆匆嘅銅鑼灣登龍街，一到食飯時間例必排隊，可見呢間薄餅店人氣高企！菜式有創意，包括原隻龍蝦薄餅、水煮和牛、四川麻辣雞肉等款式，餅底做得香脆，而且每個pizza都好足料！餐牌選擇都好豐富，所以有唔少回頭客返來幫襯。
圖：文：Perrins
