大排檔係香港嘅地道飲食文化，但近年就有唔少人將呢種文化帶入室內，雖然缺少咗街頭風味，但正所謂鹹魚青菜各有所愛，如果想坐得舒適啲，室內大排檔都係一個唔錯嘅選擇～今期搜羅咗4間畀大家，除咗環境舒服啲仲好啱打卡呀！

目錄

佔地5000呎懷舊風味 港久新街

尖沙咀新開嘅港式大排檔主題餐廳，佔地5000呎，將八九十年代走鬼檔融入店內裝潢，呈現綠色鐵皮及帆布帳篷茶檔特色，玩味感十足，啱晒影相！餐廳內更有以熟食檔為靈感嘅開放式小菜檔、滷水檔、燒烤檔及水吧，客人可親自到攤位前揀食材同埋向師傅即時下單～必食有艇家避風塘炒蟹，新鮮嘅蟹肉炸至金黃酥脆，配上香辣嘅醬料，好惹味。香酥脆皮牛肋骨先滷後炸，外層香脆內裏軟嫩多汁。

招牌脆皮乳鴿 樓上大排檔

圖: Hkfoodiejune

同樣以懷舊大排檔為主題，而且更有唔同嘅特色門面，有快餐店、大押、粉麵鋪、機鋪、夜總會及麻雀館等，裝修同擺設都好似露天大排檔咁，好有風味。必試招牌脆皮乳鴿，乳鴿外皮炸得非常香脆有光澤，炸得乾身肉質嫩滑而且唔油膩。薑蔥桶蠔煲嘅蠔大大隻，外面沾滿醬汁及薑蔥，桶蠔邊位微微焦脆，一咬開就係鮮味及滿滿蠔汁。另外蟹油炒麵都必試，用炸蟹嘅油炒成，帶微微鮮味炒得乾身，麵質爽彈好有鑊氣。

KOL開設 微辣大排檔  

圖: chongjacky

由澳門Youtuber微辣開設嘅餐廳，以冰室及大排檔為主題，店內分為4個區域，分別係澳門娛樂城區域、港式地道風格、港澳渡輪及港鐵車廂為主題嘅包廂雅座。供應多款港澳美食，如澳門嘅大利來記豬扒包同香港嘅北角雞蛋仔呢度都食到。另外當然都有唔少招牌菜，好似呢個何伯爆屎渠即係炸豬大腸，原條上未食就可以先打卡，炸豬大腸中間灌入甜酸汁，一入口真係有爆汁效果！冰鎮新鮮八爪魚、椒鹽豬潤同米酒雞都值得一試～

地道韓國風味 新沙洞大排檔

圖: connie_whm

除咗港式連韓式大排檔都有！呢間仿照韓式街頭大排檔裝修，還原咗新沙地鐵站同路邊攤大排檔嘅環境，配上色彩繽紛嘅桌椅同韓式油桶圓桌椅，絕對可以止吓旅行癮。敢食生蟹嘅要食新沙洞招牌醬油拼盤，包左一隻醬油蟹、4隻醬油蝦同紫菜拌飯，醬油唔會太鹹送飯一流。宮廷燉牛肋骨鍋一上枱就香濃撲鼻，湯頭飲落甘甜，肉質軟腍，牛香好突出。飲品方面可以試下蜂巢蜜士多啤梨牛乳特飲，淡淡士多啤梨同牛乳香，好飲唔太甜。

文: Yanica