講到最受歡迎嘅甜品口味，其中一個一定非伯爵茶莫屬～香甜之餘帶茶香，就算食晒成份都唔會膩，難怪咁多人都係伯爵茶fans。今次介紹5間伯爵茶甜品fans要搵機會去朝聖嘅餐廳畀大家，有伯爵茶傳統班戟、伯爵茶焦糖布甸、特濃伯爵茶日式卷蛋，聽到都已經心心眼！
伯爵茶傳統班戟 蟲二
呢間咖啡店位於經活化後嘅旺角上海街618號，有室外同室內位置，啱晒女仔們去傾偈。人氣甜品伯爵茶傳統班戟，班戟係傳統風格較厚實，不過亦夠鬆彈，而且內餡仲藏有麻糬，口感煙煙韌韌。味道方面伯爵茶味道都幾突出，上面有燒海鹽芝士忌廉醬、牛乳雪糕、百花蜜、鮮果同脆脆，燒海鹽芝士忌廉醬表面香脆裡面Creamy，帶焦香同海鹽嘅鹹味，平衡返雪糕同pancake嘅甜度，層次勁豐富。
圖: 伯爵茶無花果拿破崙 Neko Puff 
拿破崙蛋糕通常都係芒果或其他水果口味，呢間餅店有供應呢款伯爵茶無花果拿破崙，店主曾經喺世界大賽拎過獎，食材由法國直送，難怪咁高質素喇。為咗保留酥餅香脆，拿破崙即叫即焗，所以係無現成嘅賣，想食就要等一個鐘喇～三層金黃酥皮面頭鋪上無花果，與忌廉層層相間，賣相已經非常吸引。酥皮酥香鬆化，啖啖牛油香，忌廉混入Twinings伯爵茶，入口細滑輕盈外亦散發陣陣茶味嘅芬芳，加上無花果嘅清香，好fresh呀。
圖: 特濃伯爵茶日式卷蛋 Nonsense 
主打日式西餐，卷蛋都係佢哋嘅得意之作，特別推介特濃伯爵茶日式卷蛋，蛋糕好綿密一啲都唔乾澀，裡面嘅伯爵茶忌廉真係好濃郁，入口帶甘苦，質地亦幼滑唔膩，配埋較淡味嘅蛋糕啱啱好，伯爵茶fans一定要試。
圖: 伯爵茶焦糖布甸 Tuned Coffee & Roastery
呢款伯爵茶焦糖布甸都好特別，布甸質地軟滑，一入口已經感受到伯爵茶香氣，伯爵茶味好突出，布甸唔算太甜，加埋焦糖都幾平衡，不過蛋香就相對無咁出。面頭仲灑咗茶葉碎，咬落會有苦澀嘅感覺。
圖: fatkonggirl
純素伯爵茶蛋糕 齋啡
大自然風格嘅純素cafe，喺度食嘢真係好chill～除咗鹹點都有供應唔少純素甜品㗎，好似伯爵茶蛋糕，口感溼潤而且鬆軟，對比起其他伯爵茶甜品味道唔算好濃厚，係偏清香嘅茶味，怕甜膩嘅朋友應該會比較鍾意呢款蛋糕。
圖: Ms.Kate_
文: Yanica
