召喚椰子控！今次搜羅咗五間主打椰子甜品嘅店畀大家，每間都各有特色，各有一系列用椰子、椰青同椰皇製作嘅甜品、飲品任揀，有啱心水嘅快啲 Bookmark！

目錄

太空主題椰子甜品 椰子星球

圖: eunicehau0802

以太空為主題、主打椰子茶飲及甜品嘅專門店，成間店舖都好有特色呀～開放式設計，可以睇住職員製作椰子甜品過程。最適合打卡就係佢哋嘅 UFO 系列，附帶一個 UFO 圈盤畀食客套入椰殼，有啲似星球又有啲似 UFO！黑洞 UFO 入面塞滿仙草、芋圓、黑糯米、椰水凍及椰奶，足料椰香味濃郁。芒芒 UFO 配以椰奶、芒果粒、芒汁及小丸子，啱晒芒果控。另外椰子水都值得一試，椰子水每日新鮮即開味道清甜。

純素椰子飲品+甜品 So Coco

圖: qqqwwe987

主打天然無添加嘅椰子品牌，供應一系列以有機椰奶、椰子水、椰子肉製作的沙冰、咖啡、奶蓋茶、雪糕等，好味消暑又健康。人氣 Signature Bowl 裡面已有碎冰、仙草、新鮮椰肉及烤椰肉，可選猩椰布甸或猩椰雪糕，前者好清甜，後者就有唔同口味任揀，再配搭紅豆、芋蓉或黑糖珍珠，滿滿一碗好足料。去得一定要試埋皇牌椰子布甸，簡簡單單最能食到椰子嘅原汁原味。

原個椰子凍 Komorebi Komo Komo Coconut Dessert

圖: hanna_y

呢間外賣小店就主打椰子甜品，最受歡迎係原個椰子裝住嘅椰子凍，用新鮮椰子水製作而成，口感好滑又好重椰子香，唔會好甜。唔同口味嘅配料各有特色，鍾意清香啲嘅可以揀原味脆脆、芒果及桂花等。另外仲有榴槤口味，榴槤味香得嚟仲食到椰香，鍾意榴槤嘅朋友必試。而特飲則有抹茶椰椰、桂花酒釀椰、榴槤雪沙等口味。

葵涌椰子小店 好椰

圖: 好食唔抹嘴

葵涌主打椰皇甜品嘅小店，招牌椰皇燉蛋白可以加雪燕、桃膠、黑糯米、小丸子及自家製芋圓等，蛋白好滑又香，入面仲有焗過脆脆地嘅椰肉，好香口。椰皇啫喱都好推介，味道似用椰青水整出嚟嘅大菜糕，真材實料又好清新，一樣可以配唔同嘅水果如芒果小丸子、芒果波波、荔枝爆珠玫瑰、榴槤波波等～

透心涼椰汁沙冰 Joe椰

圖: Kristy_ng

最近好受歡迎、專賣椰汁同椰子糕點嘅小店，招牌椰子汁同椰汁沙冰真材實料，好重椰香，飲到椰子甜味而唔係糖漿嘅死甜，沙冰都好細滑。想味道再豐富啲，可以揀菠蘿椰子汁同芒果椰子汁，味道都好夾～另外佢哋嘅糕點成日好早就賣晒，椰汁班蘭卷淡淡班蘭味，口感好 Q 彈，出色！

文: Yanica