香港人好掛住旅行嘅感覺，充份喺5月嘅十強名單度表現出嚟！有成一半嘅餐廳，都係日、韓、台嘅菜式呢！
第10位 韓屋（*新上榜）
圖：呢間餐廳嘅大廚同員工全部都係韓國人，好有韓國風味呢。去到記得要飲湯，十幾款零味精、零防腐劑嘅韓式熱湯絕對係呢度嘅主打。釜山豬肉湯以豬骨熬煮，味道清甜；人蔘雞湯夠晒滋補，雞肉又滑，仲好甜添。
第9位 丼瀛 
圖：一碗碗丼飯啲料舖到滿晒，淨係視覺享受都夠滿足。龍蝦刺身爆丼、甲羅燒松葉蟹丼等都相當受歡迎，後者有大量蟹膏，鮮甜濃香，而且價錢亦算親民呢。另外貪心仔必食築地壽司杯，一字排開有勁多款迷你杯刺身丼，咩款都有，唔使怕有選擇困難。
第8位 Pho Bar（*新上榜）
圖：幾時都話香港人好識搵食，呢間餐廳位置隱蔽，喺內街入面，但一樣多人！至尊湯粉咩都有啲，生熟牛柳片呀牛丸牛腩牛柏葉呀……連個湯底都係香濃嘅牛肉湯，牛魔王冇理由唔試。冰山燒豬頸肉就好香口，仲可以好似生菜包咁，用生菜包住啲肉食，層次又再豐富咗。
第7位 SuperNormal（*新上榜） 
圖：呢間酒吧餐廳唔止多酒揀，連嘢食都加入埋酒嘅元素。招牌柚子麥啤脆皮德國鹹豬手，用柚子啤酒浸完再焗，皮脆肉香，仲真係食到淡淡柚子香，重點係，唔貴啊！同埋佢哋嘅漢堡都好多款，更有坊間少見嘅羊肉漢堡~
第6位 校長燒肉日韓料理（*新上榜） 
圖：忍口忍咗咁耐，呢排疫情紓緩返少少，好多人都忍唔住要出返嚟食放題食buffet啦~ 元朗呢間放題店，一次過可以嘆晒烤肉同打邊爐，多款食材任揀任食，刺身、肉類、甜品當然唔少得，連點心同啤酒清酒都有就真係大滿足！
餐飲券：47折 3小時燒肉放題
餐飲券：61折 2小時晚巿燒烤放題
第5位 Mini Friday（*新上榜）
圖：呢間餐廳充滿創意，善於配搭唔同食材，例如諗都冇諗過可以撈埋一齊嘅黑松露花膠煮年糕，估唔到又work喎，年糕煙煙韌韌又夠香。雞翼控就梗係瘋狂食幾款具時代性嘅雞翼啦，分別係鹹蛋黃醬、柚子、辛辣同胡椒味。
第4位 阿木台灣麵（*新上榜）
圖：由台灣人主理，主打正宗台灣菜嘅餐廳，喺冇得飛台灣嘅時間底下，正好填補大家嘅心癮。麵條沿用傳統配方，每日手工製作，特別推介紅燒牛肉牛筋麵，湯底用上牛骨、牛肉、蔬菜同藥材等煲足廿個鐘，牛肉大大塊但肉質軟腍入味，深得牛魔王歡心。
第3位 FAB Kitchen
圖：繼續留守十強嘅荔枝角工廈西餐廳，價錢親民，菜式有心思，最多人鍾意食佢哋嘅法式烤羊卷，另外亦推介大家可試脆口嘅德國鹹豬手配酸椰菜，或者酒香突出嘅紅酒燉牛面肉配紫薯蓉。
第2位 老厝邊（*新上榜）
圖：又一間台灣菜餐廳上榜，睇嚟大家真係好掛住快閃美食團。大角咀嘅呢間餐廳，人氣十足。想食香口嘢嘅唔使諗，海陸鹽酥雞拼盤，咩都有啲，而且各方面都調配得幾好，唔會好油膩但又夠惹味。秘製麻辣牛三寶麵亦值得一試，三寶分別係牛腩、牛肚同牛根，麵質煙韌。
第1位 Mamaday
圖：榜首嘅呢間café，相信大家都好熟悉，已經係第4次上榜喇！無論裝修定菜式，都係既有玩味亦帶心思，全店都係打卡位。Pizza上面有原隻軟殼蟹堅係吸引，批底薄身，脆；軟殼蟹又係脆，成個批都好有口感。招牌求求其其蒲燒鰻魚蛋包飯一啲都唔求其，滑蛋係用本地雞蛋再加牛奶炒成㗎，啲飯又用醬汁炒過，推！
文：Kar