香港人越嚟越識食得健康，出街搵食除咗揀地區、口味外，而家仲可以揀埋少鹽、少糖嘅餐廳。因為香港提供少鹽或少糖嘅餐廳已經接近600間，而且佢哋仲有「樣」睇㖭！

呢類餐廳門外都會貼上呢個標誌㗎，真係好易認！

少鹽少糖好處多

食物及衞生局同衞生署咁落力宣揚少鹽少糖，其實同我哋健康息息相關。因為鹽含鈉，攝入過量鈉就會導致高血壓、致命性中風同冠心病；攝入過量糖則會引致肥胖，從而增加患上高血壓、心臟病同糖尿病風險。

成日話好食嘅嘢都唔健康，嗱！說話就唔係咁講喇，今次「少鹽、少糖、少．確幸」就請嚟7位星級名廚，示範少鹽少糖都可以好好食。同時佢哋嘅餐廳，都係600間參與計劃餐廳之一，想試真啲又想健康啲，親身去試吓佢哋嘅手勢都得𠻹！

名廚分享　少鹽少糖煮食秘訣

7位名廚嘅菜式各有特色，原來少鹽少糖可以用落點心、中菜、潮州滷水同甜品都得。「添好運」麥桂培師傅同「豐生水起」陳國強師傅都話，只要食材新鮮，味道自然夠出夠香，唔駛額外加咁多鹽已經好好食。

麥師傅即場示範包蝦餃。

秘訣就係用新鮮蝦，鮮蝦味勝過落鹽。

陳師傅用新鮮蟹肉整賽螃蟹，佐飯一流。

廚備升級　潮州滷水都可以減鹽

「百樂潮州」嘅許美德師傅就分享，以前學師時會落比較多鹽，因為當時廚房設備無咁全面，需要用多啲鹽保持食材新鮮。而家雪櫃設備咁完善，自然可以落少啲鹽，滷水鵝片依然好惹味㗎！

三姐教落　最梗要「夠薑」

「三姐海鮮飯店」嘅蕭秀香師傅（三姐）就示範大白菜鮮腐竹煮雞蛋，三姐就話秘訣係將薑爆得夠香，令薑嘅精華滲入湯裡面。食時先飲一啖湯暖胃，再按序食白菜、腐竹同蛋，好食又暖身舒暢。

三姐話已經參與呢個計劃好多年，好開心可以令香港人食得健康啲。

同場仲有多位師傅大展廚藝，一齊睇吓少鹽少糖有咩好食啦！

「中華廚藝學院」陳啟漢師傅煮百合雪耳煲豬腱，好清甜。

「富嘉閣」李文基師傅示範合桃五秀炒雞球，合桃引味好開胃。

「御進私房菜」鍾志強師傅嘅百花桂魚卷用火腿提鮮，無鹽都可以充滿鹹香。

「中華廚藝學院」陳啟漢師傅整嘅合桃酥好鬆脆香口，就算少糖都夠甜呢！

而家喺OpenRice網站或Apps嘅進階搜尋中，可以喺「食品/餐廳類型」選擇「少鹽少糖食店」，一次過睇哂全港參與推動少鹽少糖嘅餐廳喇！