香港人鐘意食魚生並唔係一時三刻嘅事，但講到望落更Colorful、標榜更健康同方便嘅夏威夷魚生飯大家又試過未先？
食之先先講解一下夏威夷魚生飯同日式海鮮丼嘅分別啦！夏威夷魚生飯正名叫Poke，原意為「切」、「割」，在菜單上則指為將新鮮魚生切粒並加入各式美味調味料嘅料理。雖然好多人都覺得Poke係抄日式雜錦海鮮丼，但事實上由於地理因素，夏威夷人好早期已經鐘意將切粒吞拿魚撈海鹽同海藻生食！
當然，嚟到今日食材同調味一定要多變化先留得住食客嘅心，除咗上述啲基本嘢，唔少食店都會供應埋三文魚、八爪魚同蝦等海鮮，「醃料」方面就有乳酪、椰汁、泰式辣汁、日式芥辣、沙律醬或芝麻醬等！
鰂魚涌勁多商業大廈，好明顯呢間上年開業嘅Poke Bowl專門店就係專望OL市場啦！叫法係先叫從珍珠飯、糙米、藜麥同沙律菜中4選1做「飯底」，然後再選重點主菜。呢度比較多人推薦嘅款式有泰國風情吞拿魚同希臘之旅三文魚，兩者都係以酸味為主調，泰式就明顯索得出青檸香而用希臘乳酪、檸檬汁同青瓜撈好嘅三文魚就感覺清新。價格方面，以食哂以上2款魚生嘅Poke嚟講計盛惠$78，唔算好平但比起去稍為坐得舒服少少嘅日本餐廳算係咁上下，份量上女仕應該食得飽但男仕可能就要加多隻流心蛋或Poke Bomb(腐皮Poke壽司)先夠！最緊要係令你食完感覺健康咗嘛！
呢間已經喺中環、上環同灣仔插旗嘅專門店其實比起頭先介紹鰂魚涌果間更早註駐香港，特點係口味比較正宗(即係調味較重手)，「飯底」可以選半半，啱哂想同時食沙律同糙米飯嘅花心鬼！注意返，呢間冇得選Super Food藜麥做底而且相對地較貴。
由於呢間Poke專門店剛於銅鑼灣開業冇耐，暫時網上都唔係好多評論。睇餐牌似係已一早為客人配搭好魚生同配料，勁方便有選擇困難症嘅朋友，而且當中嘅香烤堅果醬同堅果奶油豆腐都幾有特色！
同上係試業中嘅新店但呢間可以話係走Poke新路線！雖然都一樣有Poke Bowl(魚生飯)食，但事實上佢哋主打嘅係目前外國好流行嘅Pokiritto！顧名思義，Pokiritto呢個名係夏威夷魚生同墨西哥捲(Burrito)組合而嚟，客人可以自由挑選飯卷配料、醬汁(除咗魚生仲有毛豆、三色蟹籽、豆苗等罕見款式)，店員會即刻喺你面前即叫即卷！
文：Apple