疫情之下，相信大家都多咗時間在家工作，或者留喺屋企減少出街。口痕嘅時候總係想食啲零食，但又怕食得多會肥或者唔健康？其實揀啱零食，可以減少負擔同時食得開心！
挑選零食要避免：
油炸、高脂：薯片同杯麵大家都知道係高脂零食，但要留意部分夾心餅、梳打餅都好高脂肪含量，記得要留意營養標籤啊！
高鈉、高糖：身體攝取過多鈉唔單止容易水腫，嚴重會引起血壓上升、影響身陳代謝。而太多嘅糖會令體重增加，亦有可能導致「糖上癮」
分量太大、無獨立包裝：有無試過開咗包薯片同自己講食一兩塊，結果食食下食晒成包？建議盡量選擇有獨立包裝、或者分量比較細嘅，少食多滋味
健康零食推介：
1. 烘烤堅果
堅果有多元不飽和脂肪，適量攝取有助維持心血管健康。建議選擇低溫烘焙、調味較少嘅為主。一開始可以先從薄鹽堅果或者有適量調味嘅堅果棒開始。
East Bali Cashews 純素腰果
BE-KIND 堅果棒
2. 非油炸米餅、烘烤脆片
想食香口脆片唔一定要食薯片，可以用高膳食纖維嘅麥餅、米餅取代，增加飽足感。另外少添加物嘅烘烤蔬菜片等亦係唔錯嘅選擇，烘烤紫菜更可以攝取碘，促進身體代謝。
TAVOLA 純素米餅
雀巢FITNESS 高纖脆片小食
3. 低糖乳酪
乳酪唔單止高蛋白質，亦含鈣質、鉀質、維他命D同活性益生菌，飽腹同時可以增強抵抗力！挑選乳酪嘅時候盡量選擇低糖、無防腐劑嘅就更輕盈無負擔啦。
雀巢 希臘式乳酪
延伸閱讀》抗疫小百科（預防篇） 營養師建議7大營養素+餐單推介 增強免疫力
4. 青豆
純素嘅朋友如果想攝取蛋白質，就可以考慮食青豆！而且亦富含膳食纖維。可以自己煮再加少少鹽，坊間亦有烘烤嘅青豆脆條。
卡樂B 青豆脆條
5. 低糖穀物、穀物棒
唔少人早餐會食穀物早餐片，但要小心唔少粟米片、可可脆片都相當高糖！選擇嘅時候唔單止要留意卡路里、糖分，亦要選擇高膳食纖維嘅。食開甜嘅穀物早餐可以先轉食Granola，會加糖或者蜜糖烘烤，唔加牛奶就咁當小食食都得，習慣後再轉食無添加糖嘅Muesli。
家樂氏 超級莓果Granola
6. 黑朱古力
朱古力係唔少女孩子嘅Comfort Food，而朱古力嘅原材料可可有類黃酮，有助抗氧化同保護心血管，因此會建議食70%或以上嘅黑朱古力。但要注意唔好揀加工太多嘅朱古力，而且可可脂亦係脂肪嘅一種，唔好食太多呀。
LINDT 70%特級純味可可軟心朱古力、100%可可特醇朱古力
7. 低卡雪糕、雪條
唔少人一年四季都鍾意食雪糕，但坊間大部分雪糕大部分都係高糖高脂，揀嘅時候可以留意植物奶代替忌廉同牛奶製作嘅雪糕，添加糖較少嘅雪芭，或者低卡嘅水果雪條。
Green Common 純素冰凍甜點
DREYER’S 奇異果乳酪條
8. 低糖/無糖飲品
含糖飲品飲得多對身體唔好相信大家都知，但一時三刻全部轉做飲水又的確有啲難。建議可以改飲坊間嘅低糖氣泡飲品，或者無糖茶。咖啡掛耳包亦係無糖低卡嘅好選擇。
Watson’s X-Soda系列
Simple Kaffa 掛耳式濾泡咖啡
文：Cathy.H