SUN HARU (順寧道) (已搬遷) 新店位置

Sun Haru係長沙灣一間韓國菜小店，第五疫情開始已經全日轉做外賣。是日喺附近做完野，見佢價錢幾吸引，外賣自取仲有八折，就買返屋企試下。佢地除左散叫，仲有一人或多人套餐，份量都偏大份，兩個餐都夠三個人食。泡菜腩肉湯跟配粉絲卷($98, 另有八折) - 哩個係一人套餐，本身跟左汽水同白飯。粉絲卷外賣返到屋企仲係脆嘅，唔會太硬。泡菜腩肉湯辣辣地好惹味，辣味大約係小辣程度，唔會辣得太辛苦，入面都幾多腩肉，另外仲有豆腐、蛋同洋蔥，食時可以將白飯加入去變成湯飯，即刻食量大增呀！一人炸雞餐($98, 另有八折) - 哩個雖然算係一人餐，但就包左4件炸雞同一個湯同飯，另外一樣有跟汽水，所以都好飽肚，麻甩佬都食到飽。炸雞有三款口味，我地揀左牛油蜜糖，雖然外賣返到黎腍左少少，但食落甜甜地咁都唔錯。湯同樣有三款揀，我地揀左牛肉大醬湯，裡面有牛肉豆腐同洋蔥，大醬湯濃味得黎唔會太鹹，非常啱餸飯。總結，野食唔差，特別鍾意佢地嘅湯飯，味道濃得黎食完又唔會口渴，外賣返到屋企到真係食隔左大半個鐘都仲係熱熱地嘅，野食都偏大份，加埋有全單八折幾抵食。