唐宮中餐廳

營業中

休息中

由於前一日Uncle同Auntie特意送咗一大盒荔枝畀我們，兼且約咗我們喺今日中午一齊去我們嘅老地方「唐宮中餐廳」飲中午茶！我們叫咗香麻鷄蛋散炸得好金黃酥脆，再配埋香甜嘅蜜糖一齊食，真係幾好味呀！松子鷄粒鹹水角嘅外層好香脆乾身，入面嘅質感就相當煙煙韌韌，餡料亦都幾惹味！喺點菜嗰陣見到呢個蕎麥麵海鮮扎，覺得都幾特別，所以就諗著叫嚟食吓，點知一上碟見到個賣相就覺得超級嚇人，嫌且非常嘔心，一食落去味道有完全格格不入嘅感覺，好似強行將幾樣完全唔夾嘅嘢放埋一齊，我們明白有創意同創新係好事，但呢個配搭係「唐宮」眾多款點心之中，最失敗之作，真係令我們覺得極之失望呀！流心奶黃包嘅包質都幾軟熟，但入面嘅餡料就非常稠身，一啲都唔流心！菠菜汁雜菌腸嘅腸粉皮係加咗啲菠菜汁造成，質感都幾煙煙韌韌，夾埋啲雜菌一齊食，感覺就好清新，完全唔會有油膩嘅感覺！

今日中午我們又再約咗Uncle同Auntie去「老地方」九龍維景酒店嘅「唐宮中餐廳」飲中午茶！我們叫咗四川菜肉餃嘅餃皮軟滑薄身，菜肉餡料好鮮嫩多汁！冬筍蝦餃皇嘅餃皮煙韌薄身，爽甜彈牙嘅蝦肉，再加埋爽脆嘅冬筍，令到口感更加豐富！懷舊糯米卷嘅外層係香滑軟熟嘅包，入面係煙煙韌韌嘅糯米，唔會過腍或過硬！春風得意腸係用軟滑嘅腸粉，包著炸得相當香口鬆脆嘅春卷，層次感非常豐富，而且都幾有創意同驚喜！薑汁四季豆係涼拌冷盤，所以四季豆嘅質感更加爽脆，而且加上薑汁一齊食，可以辟除咗啲草青味！欖菜肉崧黃金炒飯炒得好乾身同粒粒分明，而且材料相當豐富，粒粒嘅鹹蛋，令到味道更加甘香！南翔小籠包嘅皮亦都幾薄身，豬肉嘅肉質好鮮嫩軟滑，湯汁都算多，而且味道好鮮味！薯蓉黃金角炸得好金黃香脆，就咁睇好似鹹水角咁，但剪開一半見到入面嘅餡料係軟滑嘅薯蓉，味道唔會太甜！

今早我們去咗九龍維景酒店嘅「唐宮中菜廳」飲早茶！我們叫咗瑤柱浸津菜膽今次嘅瑤柱份量比上次多，瑤柱嘅味道令到味道更加鮮味清甜！蔥花香滑脆炸両腸入面嘅油炸鬼炸得好金黃酥脆，外面嘅腸粉好薄身嫩滑！唐芹蓮子瑤柱餃嘅餃皮相當厚身，入面嘅餡料味道比較淡！黑芝麻流沙包嘅黑芝麻味道好香甜濃郁，而且相當流沙！花姿百花釀香菇嘅蝦膠都幾爽口彈牙，香菇好軟滑，夾埋一齊食，口感好豐富！四川菜肉餃嘅菜肉餡料都幾鮮嫩，而且肉汁都幾多！山域棒棒鷄嘅肉質都幾鬆軟，配上香滑嘅花生醬同辣椒油一齊食，令到質感更加軟滑惹味！欖菜黃金揚州炒飯炒得好乾身同粒粒分明，材料非常豐富，鹹蛋黃嘅鹹香味，令到味道甘香！甜品：海底椰杏仁露好香滑，味道好香甜濃郁！

今早我們去咗九龍維景酒店嘅「唐宮中菜廳」飲早茶！我們叫咗蔥油涼拌海蜇相當爽滑彈牙，配上香蔥油，令到味道更加香！四川菜肉餃嘅餃皮都幾薄身，餡料豐富惹味！蔥花香滑脆炸両腸表面嘅腸粉好軟滑薄身，入面嘅油炸鬼炸得好金黃香脆！蜜汁叉燒包嘅包質好鬆軟，叉燒嘅味道都幾香甜！黑芝麻流沙包好流沙，黑芝麻嘅味道相當香滑濃郁！水晶蝦餃皇嘅餃皮非常厚身，但蝦肉都幾爽甜彈牙！瑤柱浸津菜膽喺上碟嗰陣我們都呆咗，因為津菜份量極之少，好似畀人食咗一半咁，而店員亦表現出完全唔關事咁，服務態度超級差劣！金銀蛋瘦肉粥嘅粥底煲得都幾綿，金銀蛋嘅味道都幾甘香！魚香茄子炆伊麵炒得都幾夠鑊氣同惹味，但就超級油膩，麵質亦都極之腍身！