阿公麵店 (已結業)

一個地頭蟲朋友介紹話這個Food Court有間四川麵好食，有自己獨門醬汁。經過即試！位置有點難找，但為了食好西，唔會難到我的！門面整齊美觀。下午茶時段Food Court 人流唔多，但都見幾多人選擇佢。蟹籽丸，魚腐，刀削麵，麻辣。點了中辣，個麻辣十分有誠意，肉碎夠香口，芝麻蔥花加强了層次。麻，辣，香，平衡，香辣野味。落單時見到有好多款醬料show晒出嚟，口水直流。跟餐加了羅漢果水，正！唔太甜，中和返個辣四川餃子，e個要推介。食得出唔係普通批發急凍水餃，餡料口感扎實，皮薄又夠彈。餃子醬汁又是另一個味道，好香花椒味，唔算太辣。一般豆瓣醬咁上下的辣度，同行只能食小辣的朋友都話正。值得一讚是店員非常好服務，怕麵食容易浸淋，提醒幾分鐘一定要過來取，又會比我試一口湯，務求辣度合心意，仲話可以再過來加湯。咁既服務，我究竟係咪身處香港？？在香港可以食到如此精緻又平價的四川麵食實在難得，下次要試下個擔擔麵！

無正式統計或查証，但感覺上近年開多咗好多賣四川菜、重慶菜嘅菜館，而且喺小店居多。是日就嚟到荃灣「地皇廣場」，曾經喺死城嘅劏場，原來依家一樓變成「大食皇」美食廣場，場內仲有唔少特色小店，「阿公麵店」就喺其中一家。初頭以為喺賣車仔麵，走近啲望望，原來喺主打麻辣嘅川式麵店，晌鋪面打量一下，睇見一罌罌辣油，感覺對辦。而且，順便窺探吓廚房其他位置，企理乾淨，唔會污糟邋遢。由於都喺以劏場轉型，用餐區就較一般美食廣場細而窄，還好嘅喺全場都配上梳化椅，坐起嚟都舒服。菜式選擇印晒晌兩張A4紙之上，大部份嘢都有圖片做參考。一張羅列晒多款四川經典麵食，如四川擔擔麵、四川酸辣粉……等等。不過，講到食川菜，小弟就無乜攻略，隨心即可。另一張則喺四川湯麵套餐、四川涼菜、四川小食、飲品，不過，店主都講明飲品喺廣場內嘅「飲品部」提供，然而，豆漿及羅漢果水喺自家製，值得一試。整體嚟講，定價都貼地，但如果啲四川涼菜、四川小食有半份或雙拼就更好，一個人嚟都可以試多少少嘢，哈哈！順帶一提，晌收銀機旁掛有一張溫馨提示，提示品嚐麵食嘅客人一啲小貼士，可見店主都幾細心。哈哈，不過，香港人一向匆匆忙忙，乜都要快，唔知有幾多客人會留意到