大丈夫食堂 (已搬遷) 新店位置

因為上興趣班所以嚟荔枝角呢邊，咁啱前幾日喺社交平台見到呢間大丈夫食堂嘅吉列豬扒，睇落賣相唔錯，所以嚟試下。星期日一點半嚟到，拎籌後大概等咗半個鐘。除咗有定食，仲有丼物、海鮮丼同壽司選擇。我哋點咗吉列豬扒定食同天婦羅丼。吉列豬扒定食包括吉列豬扒、椰菜絲沙律、茶碗蒸、味噌湯同白飯，其中沙律同白飯係可以任添。吉列豬扒表面炸得乾爽，口感非常酥脆。豬扒比較厚身，經高溫油炸後，內裡仍保持肉嫩而帶點肉汁。水準拍得住某間吉列豬扒連鎖店天婦羅丼定食同樣有茶碗蒸同味噌湯，沙律係雜菜沙律。天婦羅丼好豐富，有一整條穴子、兩隻蝦、南瓜、茄子、冬菇同半熟蛋。天婦羅炸得乾身酥脆，唔會過份油膩淋面嘅天婦羅醬汁帶甜，唔會太重口味，好適合送飯食。穴子嫩滑有鮮味，雖然有少少細骨，但可以接受。天婦羅蛋嘅流心蛋黃用嚟撈飯一流跟餐嘅茶碗蒸材料有冬菇、蟹柳同枝豆。蛋蒸得非常滑溜，淡淡日本高湯味總括嚟講吉列豬扒同天婦羅丼都好好味，份量多食得好滿足而且價錢好抵，難怪咁受歡迎要排隊等位，想食嘅話記住預時間等位喇！