影片
更多
2017-07-04
3895 瀏覽
一同人講到去葵芳食嘢，唔喺葵廣，就喺新都會，其實過晒橋，走到去盛芳街、禮芳街、信芳街一帶，有好多食肆，雖然大部份屬街坊小店，但可以講喺各有個性。Star Kitchen喺朋友嘅爸爸開，點都要嚟一嚟撐吓場。對比起隔離嘅粉麵檔，從Star Kitchen店面可見餐廳比較喺有情調少少嘅格局。入到去，整間餐廳地方唔大，都喺屬小店格，一室紅與黑，餐枱鋪上紅色硬膠枱布，喺易於打理嘅取態，簡約裝修，柔和燈光，予人都感覺舒服。而牆上如壁報板嘅巨型黑板，除以唔同顏色粉筆畫上唔少插圖之外，更貼咗好多推廣選擇。相信店主或其家庭成員都好鍾意手作仔，就連餐牌都好手工，餐牌上嘅菜單都喺以人手親手寫上，並貼有少少圖片作點綴。打開細看，有生蠔套餐、晚市套餐、意大利麵、意大利飯、沙律、小食、薄餅……等等，其中主食類，+$20可配餐湯、沙律、甜品、飲品，變相成為套餐。最簡單，同老婆都喺揀食晚市套餐。蘑菇忌廉湯事後跟店員傾開，話今日原來喺南瓜忌廉湯，不過，賣晒之後就改為蘑菇忌廉湯，並非帶有好多菌粒嗰款，而喺港式茶記常見嘅「白湯」，唔喺話差，但就肯定喺好普通嘅貨色。田園沙律沙律菜配甘筍絲及栗米粒再淋上胡麻醬，雖然唔喺咩貴料嘢
對比起隔離嘅粉麵檔，從Star Kitchen店面可見餐廳比較喺有情調少少嘅格局。入到去，整間餐廳地方唔大，都喺屬小店格，一室紅與黑，餐枱鋪上紅色硬膠枱布，喺易於打理嘅取態，簡約裝修，柔和燈光，予人都感覺舒服。而牆上如壁報板嘅巨型黑板，除以唔同顏色粉筆畫上唔少插圖之外，更貼咗好多推廣選擇。
相信店主或其家庭成員都好鍾意手作仔，就連餐牌都好手工，餐牌上嘅菜單都喺以人手親手寫上，並貼有少少圖片作點綴。
打開細看，有生蠔套餐、晚市套餐、意大利麵、意大利飯、沙律、小食、薄餅……等等，其中主食類，+$20可配餐湯、沙律、甜品、飲品，變相成為套餐。最簡單，同老婆都喺揀食晚市套餐。
蘑菇忌廉湯事後跟店員傾開，話今日原來喺南瓜忌廉湯，不過，賣晒之後就改為蘑菇忌廉湯，並非帶有好多菌粒嗰款，而喺港式茶記常見嘅「白湯」，唔喺話差，但就肯定喺好普通嘅貨色。
田園沙律沙律菜配甘筍絲及栗米粒再淋上胡麻醬，雖然唔喺咩貴料嘢，但算簡單清新，又堆得大大碗，挺開胃嘅前菜。
寶雲酥羊架 $168好快主菜登場，本來餐牌喺寫住「意式香草羊架」，但店員問我有無興趣試試「寶雲酥」，當然有啦，因為「寶雲酥」做法比較複雜少許，既然價錢無變，就要啲特別啲啦。可見伴碟亦花咗心思，蕃茄更切成一隻蝴蝶，整體擺出嚟有種蝶舞花搖嘅意境，相當精緻。
一客有3大支羊架，鋪滿麵包糠，肉質軟腍帶點羊羶香，而麵包糠令外層添加一陣彈脆口感，細嚼仲有朕芥末香，所以，唔沾薄薄醬都好夠味。
伴菜亦非常夠份量，有大大個原個焗薯、烤茄子及烤蒜頭，個焗薯更用心挖走薯心肉混入煙肉做成薯蓉，再蘸上酸忌廉一齊食，超好味，而啲烤蒜烤至入口即化。
西京銀鱈魚拼法國無激素春雞扒 $228老婆喺銀雪魚鐵粉，所以，不由分說就揀依道主菜。先試少少隻春雞，講明喺春雞，當然喺細細隻，所以老婆就話啱晒佢份量。隻雞燒得皮脆肉滑，唔喺講笑，啲肉質真喺非常嫩滑；相反，對比之下，西京銀鱈魚就略為差咗少少，其實，肉質都燒得嫩滑，外皮好香脆，但老婆話略嫌個味道淡口咗啲。伴碟同樣有原個焗薯、烤茄子及烤蒜頭，份量之足老婆都話食唔晒，所以，如果3個女生嚟不妨考慮點兩個主菜加一客小食。
芒果布甸晚市套餐包一客指定甜品，是晚就喺芒果布甸，雖然布甸底下有唔少芒果粒，但感覺都喺大路貨色，份量亦只喺一小杯，絕無驚喜。
黑松露燉蛋 +$12相反，好彩轉咗一客做特色甜點「黑松露燉蛋」，面層嘅焦糖做得薄脆焦香，燉蛋好幼滑，黑松露嘅幽香亦好突出。其實，唔喺第一次食黑松露燉蛋，但再食都仲有份驚喜感。
餐飲選擇，只喺包一般啡茶，但亦有一系列「蝶豆花夢幻」（正價$35，跟餐+$20）、「星之特飲」（正價$28，跟餐+$15），都可以跟餐加配，但我哋只喺飲番普通啡茶就可以喇。
熱咖啡、熱檸水咖啡喺港式茶記嘅味道，咁即喺點？咪有陣陣嘅咖啡醇香，帶點苦，卻以花奶沖調，奶味重。熱檸水就點都好難有咩好寫，唯一就喺俾嘅檸檬夠多，足5片，哈哈！
兩道主菜都做得相當出色，不過，沙律、餐湯都未有突出嘅配合。另一個感覺喺，餐具以餐紙捲起包住放晌枱面，讓人感覺低調咗，臨尾嘅布甸、餐飲，亦只喺附上膠羹，都喺拉低整體觀感，變得虛張聲勢。始終個場嘅環境唔錯，又賣生蠔，又有賣啲高質素食材，唔喺$40、$50嘅茶記晚餐，依啲細位執執佢可以俾人感覺唔同咗。故此，總分介乎笑臉與OK之間，再改善吓，俾笑臉應該唔難！
張貼
