滄浪亭

營業中

休息中

今日再翻兜，試個大排麵，再食翻好味拍青瓜。經過上次經驗，我叫阿姐（唔係肥老闆）d麵唔要太淋，佢寸我話「得架啦，爽丫嘛，唔使特別提」⋯⋯唔特別提妳又知我想爽？好，睇下點。麵黎啦，塊豬扒香噴噴，唔算油淋淋，切好幾方便，咬落去有少許脆，沾過薄麵粉炸得剛好。如果挑剔d，肉質可以再juicy d會更正。碗陽春麵，一睇，就唔開心，所以點解我要叫唔好煮咁淋，係有原因的。夾落去都覺得淋同散，睇黎下次要叫「超爽」！有時d好食老店，要放低自己「樽鹽」，聽下d善良的意見，顧客未必永遠是對的，但聽多d意見始終無壞。

好日唔去美孚，早查過有家蘇式麵，名字跟蘇州上海的店舖一樣，就必要回味一下。嘩，店面小到放唔落長乒乓波枱，客人塞得滿滿。香氣撲鼻而出，等一下就有位，肥婆老闆娘爽爽快快，我唔覺得係寸囉！睇佢都似上海婆，味道應該蠻好。每枱都有人叫雞煨麵，我從不愛煨麵，淋bat bat爛溶溶，有咩好食？我發板點了拍青瓜、紅燒豬肉麵、蔥油拌麵、淨上海餛飩，3個人應該夠飽。拍青瓜：超入味、好淋、甜醋好味，好味過上海很多小店老字號。淨上海餛飩吞：足料、肉菜比例好、皮滑、湯好味，個湯比佐敦阿芳豉油湯好好多。蔥油拌麵：麵量夠，香蔥略淋，可以乾身d，油香可以左重手d，食上海嘢就係要油先好味，麵煮得太淋，但麵質非常好。紅燒豬肉麵：同樣麵煮淋過頭，但湯贏返d分，個豬肉似軟骨位，好味！食飽俾錢，門口已經排滿晒人，可以再來試其他冷盤、麵食！