影片
更多
2017-01-15
5104 瀏覽
又喺嚟到每月一次嘅港鐵特惠星期六，成人可以以小童價搭地鐵，所以，死佬夏總又搞轉港島東行山團，路線喺極輕鬆嘅砵甸乍郊遊徑搭少少落大浪灣段。但晌港島東行完山，又點會嚟九龍灣飲茶呢？真喺鳴謝另一死佬孔七兄，晌港島開完工，專登兜過嚟柴灣接我哋，跟手過返海去佢地膽區域飲茶，MegaBox勝在有兩粒鐘免費泊車，所以，揀嚟御苑皇宴飲茶，絕非偶遇。叫得「皇宴」嘅酒樓，主打都喺搞婚宴，所以，環境唔使多講，一定唔差得去邊。高樓底，大型水晶燈，總之裝修富麗堂皇。題外話，成個大堂一條柱位都無，擺婚宴幾好，但舞台開晌大堂打橫中間，感覺就麻麻啫。晌入門口位已架設價錢牌，一目了然，童叟無欺，由小點到特點，正價要$21.8-$38.8，茗茶$11位，前菜小碟又收$10，其實飲落都唔平 。幸好，有早午市時段及下午茶時段優惠，好似我哋星期六嚟，遇啱10:00am-2:00pm時段竟然有六折，划算好多（而以下點心所標嘅價錢，已經喺折實價）。不過，我哋幾個死佬都幾大食，一行5人，折咗都食成四百幾蚊。蟹籽燒賣皇 $20.9蟹籽嘅份量唔多，覺得喺裝飾大過實際，不過，燒賣確實做得唔錯，無乜肥豬肉，搓得鬆化，仲加入咗少少鮮蝦肉提升個
叫得「皇宴」嘅酒樓，主打都喺搞婚宴，所以，環境唔使多講，一定唔差得去邊。高樓底，大型水晶燈，總之裝修富麗堂皇。題外話，成個大堂一條柱位都無，擺婚宴幾好，但舞台開晌大堂打橫中間，感覺就麻麻啫。
晌入門口位已架設價錢牌，一目了然，童叟無欺，由小點到特點，正價要$21.8-$38.8，茗茶$11位，前菜小碟又收$10，其實飲落都唔平 。幸好，有早午市時段及下午茶時段優惠，好似我哋星期六嚟，遇啱10:00am-2:00pm時段竟然有六折，划算好多（而以下點心所標嘅價錢，已經喺折實價）。不過，我哋幾個死佬都幾大食，一行5人，折咗都食成四百幾蚊。
蟹籽燒賣皇 $20.9蟹籽嘅份量唔多，覺得喺裝飾大過實際，不過，燒賣確實做得唔錯，無乜肥豬肉，搓得鬆化，仲加入咗少少鮮蝦肉提升個口感。
山竹牛肉球 $13.1牛肉球入口有點點陳皮香，馬蹄粒再多啲就更爽。題外話，友人問牛肉球都無加山竹（水果嘅一種），點解叫山竹牛肉球，咁菠蘿包都無菠蘿啦，我估大抵好似菠蘿包咁，搓出嚟個牛肉球似山竹，咪咁叫囉。
四寶滑雞扎 $20.9唔知邊個創出雞扎依樣點心，一件點心就有4樣嘢食：雞肉、火腿、魚肚、冬菇，雞肉唔知喺咪脾位，質感非常滑溜，魚肚吸收咗少少火腿嘅鹹香味，綿綿香香。
瑤柱珍珠雞 $23.3珍珠雞就包得有啲迤，打開一睇，有啲蛋黃晌啲糯米外面，再倒轉原來啲餡料喺包唔冚，以下張相喺打開後嘅實況，還好喺味道唔錯，糯米煙糯，又塞滿餡料，交足貨。
椰汁奶黃包 $17.3一客有3個奶黃包，雖然啲奶黃餡唔似得啲流沙包流得咁澎湃，但奶黃餡柔滑有蛋香，椰香味就唔太出，包身卻鬆軟唔黏牙。
丹麥皇冠叉燒包 $17.3美麗嘅誤會，友人以為個叉燒包做成「皇冠」咁型，所以點咗一客，其實「丹麥皇冠」（Danish Crown）喺一隻丹麥有機豬肉嘅品牌，兩年前小弟有幸晌一次活動接觸依個品牌（詳情可參閱此食評：http://garycwm.blogspot.hk/2015/03/berliner-german-bar-and-restaurant.html）。講番個包，包身同樣做得鬆軟，叉燒餡做得香濃惹味，卻一啲都無肥肉。
沙律明蝦角 $20.9一班死佬年紀唔細，有啲仲周身病痛，但照樣食嘢唔健康，煎炸嘢更唔少得。依碟明蝦角真喺唔錯，外皮好脆口，裡面嘅蝦肉確喺幾爽彈。
鮮蝦腐皮卷 $20.9相對碟沙律明蝦角，依碟鮮蝦腐皮卷就失色少許，唔喺唔好食，但對比起，腐皮內只有一抹蝦膠，無明蝦角啖啖肉咁爽，再者，炸得油咗少少亦喺話佢失色嘅原因。
丹麥皇冠叉燒腸粉 $20.9之後再睇埋有個「皇冠」腸粉，就知「皇冠」喺指個品牌。腸粉我就覺得不過不失，叉燒餡OK嘅，腸粉皮都滑，不過就拉得厚啲。
香煎蕃薯餅 $17.3酒樓做緊少少客家特別點心，共5款，小弟又好鍾意食蕃薯嘅，所以，嗌一客香煎蕃薯餅試試，細細件一個，一口一件又得，兩口先一件都得，餅皮確有蕃薯味，不過唔好期望好突出，內裡配清甜嘅豆沙，其實可以當甜品嚟食。
爽滑芝麻卷 $12依班死佬對甜點一向興趣麻麻，不過，懷舊吓就點一客「菲林」嚟過口癮。黑漆漆嘅芝麻卷，芝麻味幾濃，入口既爽且滑，只喺$12客，絕對食得過。
油鴨臘味煲仔飯 $45秋冬時節，又喺食臘味嘅時候，原則上以我哋班死佬嘅狀態，真喺唔應該食啲咁高膽固醇嘅嘢，不過，想食就總有藉口。一開蓋，香噴噴，臘味份量十足，有齊臘鴨、臘腸、膶腸同臘肉，啲臘味質素唔錯，臘鴨好甘香，膶腸喺小弟至愛。
豉椒煙鴨胸炒河 $78廚部有啲假日推介炒粉飯麵，定價唔貴，都喺$80、$90。個炒河都嚟得好快，點心都未食到一半就上枱，睇相就知份量好夠碟頭，味道方面，炒得有板有眼，豉椒味幾香，個茨又唔會太漿，仲有落咗唔少煙鴨胸。
完咗今次食評之前，又順便分享吓今次條行山徑，亦順便鳴謝埋老友嘅御用模特兒「四葉妹妹」。砵甸乍郊遊徑位於石澳郊野公園內砵甸乍山山腰嘅一條小徑（全長1.9公里），絕大部份喺平路，易行到不得了。由石澳道大潭峽懲教所起步，先接港島徑第8段，再駁入砵甸乍郊遊徑，歌連臣角道出再落番柴灣，夾埋晒我估大概3公里，輕鬆行，兩個鐘一定夠晒。
總結埋酒樓嘅服務，梗喺讚佢好啦，事後先留意到計少咗我哋一個茶錢，其實，服務唔錯，上齊嘢，無漏單，依啲喺基本，收碟、添水都好快手，侍應都幾有禮貌，唯一甩轆喺拎咗我哋壺壽眉去沖，卻喺放錯隔離枱，而隔離枱又無出聲，哈哈！整體御苑皇宴做嘅點心唔錯，無驚喜但屬穩打穩紮型，而且，環境又確喺好坐，只喺少嚟九龍灣，仲要喺晌MegaBox，故再幫襯嘅機會細，但如果嚟開依頭又想嘆茶，御苑皇宴喺個唔錯嘅選擇。
張貼
