河內越式料理

營業中

休息中

大半年前食過呢間係尖沙咀嘅河內越式料理半年後再返返去食多次，晚上八點幾去到都差唔多坐滿人，而且都不斷有人入去。質素仍然keep到👍🏻👍🏻👍🏻牛丸湯檬$59，牛丸半粒半粒咁幾入味，牛肉味唔會太重我覺得啱啱好，檬粉份量都足夠都幾大個，食唔晒俾咗啲老公幫手食。多洋蔥超正。雞絲湯河$52，雞絲份量都幾多，河粉夠晒滑，睇相都知到幾多湯，不過個湯都好好飲，一啖湯一啖河粉差唔多都可以飲晒。蝦餅真係超正好好食，必食推薦！外層揸得啱啱好，爽口彈牙蝦味夠。椰汁珍多冰跟嘢食加$12，椰汁類嘅嘢飲真係好好飲超鍾意。

呢日經過尖沙咀，見到呢間越南餐廳見到餐牌幾吸引，而且價錢又好貼地，於是就同朋友試一試🤤坐低之後，店員好貼心送上兩杯熱嘅龍眼水，因為朋友都幾鍾意食越南菜，所以我哋都叫咗幾樣多人嗌嘅菜式試吓~越式炸春卷 $20春卷皮嘅厚度啱啱好，炸得脆脆哋但係又唔會過硬🤤偏向軟身，入面材料有紅蘿蔔絲、木耳絲同檬粉~越式炸蝦餅 $29蝦餅幾彈牙，而且蝦肉幾嫩，炸粉唔會話太厚，配埋甜酸醬，味道更加升級😆香茅豬扒撈檬 $60呢個係店員推介，大大份用香茅醃製嘅豬扒炸得好酥脆，肉質唔會話太太韌，記住一定要加多啲撈檬汁，咁先夠味！而配料都好足，例如有甘荀、芽菜、炸花生~生牛肉湯河粉 $56份量真係好大碗🤩牛骨湯底濃郁，河粉幼身幾滑，薄片嘅生牛肉肉質鮮嫩，可以自己隨喜好加辣椒同青檸，配料有洋蔥絲同芽菜~椰汁三色冰 & 椰汁珍多冰 既然嚟到越南餐廳點可以唔叫返杯越南特色飲品😉兩杯嘅椰汁都好香濃，綠色嘅粉條好有咬口，三色冰除咗有綠色粉條，仲有紅豆同糯米，口感豐富，飲晒都好飽🤤尖沙咀嚟講，性價比都幾高，菜式方面可以選擇嘅款式都幾多，下次有機會想試吓佢嘅蕃茄蟹肉扎肉湯檬，感覺幾特別，比較少係越南餐廳見到😆

出到k11個頭，但又想食抵食嘅越南粉，所以就搵咗呢間河內越南粉，佢門口放晒menu，可以睇啱先入去🤓。正值中午時段，人流都幾多，見到姐姐們都好忙，不過一個人好快就有位。最欣賞餐廳每檯除咗有齊基本越式醬汁外，仲有消毒洗手液👍🏻。生牛肉湯河粉 $56其實有諗過叫其他，好似樣樣都幾吸引😂，最後決定食返最簡單嘅生牛河。牛肉河粉大碗，男仔都夠食。湯河配小桔仔同辣椒，啲辣椒都幾辣，落幾粒就惹味啲。牛河上有大量香葉、芽菜、洋蔥，芽菜肥身都唔會有青味，洋蔥切幼後，浸湯後好快變軟身。生牛肉片多又大塊，浸一浸湯，牛肉嫩身，唔會老，而且都幾香牛味。河粉滑，「索」晒啲湯入味，同牛肉一齊食咁滑。椰汁珍多冰 $12 (跟主食半價)珍多冰大杯，椰汁味夠香。珍多冰入面仲有好多班蘭粉條，粉條口感彈牙，唔會好似食糕咁，我幾鍾意。班蘭味亦出，同椰子互相輝映。小店用心經營，姐姐有禮貌，食物又幾好，價錢唔貴(見有下午茶)，下次嚟尖沙咀再食。