木屋大排檔

營業中

休息中

木屋大排檔喺大埔都已經開左一段時間，身邊既朋友都大讚好食，今日終於叫返個外賣返屋企一嚐佢既風味！泰北沙嗲串燒拼盤 $148（燒豬頸肉1塊/豬柳串2/雞柳串2/牛肉串2）拼盤入面最鐘意既係豬頸肉，燒得好香，少少焦香，但又唔覺得好柴既口感，配上豬頸肉既醬汁就更加正🤤另外豬串、雞串同牛串既醃料應該一樣，味道食落差唔多，不過口感絕對各有各好，一定要點佢地配埋既沙嗲醬，會更加惹味！！軟殼蟹米紙卷 $78叫咗幾款菜，個人最鍾意呢個米紙卷！軟殼蟹即叫即整，就算叫外賣拎到返屋企都仲係脆卜卜。米紙卷入面包住芒果、生菜同軟殼蟹，炸得香脆既軟殼蟹加上酸酸甜甜嘅醬汁同清爽既生菜，真係一個好特別嘅開胃菜😋！泰式海鮮粉絲沙律 $88我個人真係好鍾意酸甜口味嘅食物，所以又叫多一款令人開胃、酸辣口味既菜式！呢一款食落就會有啲辣，粉絲加上清爽既蔬菜，不過個人覺得海鮮嘅份量可以再多少少😗但酸酸甜甜既沙律啱晒呢啲悶熱嘅天氣～佢哋嘅Menu有好多唔同菜式可以選擇，令人眼花撩亂啊🤣而家仲有七折外賣抗疫套餐，都幾抵食，鍾意食泰菜既朋友不妨可以去試下，唔會失望😋😋

好鐘意食泰國菜既我地今晚又約埋去返哩度食飯兼吹水，叫左個小食拼盤，海鮮沙律同肥牛伊麵同兩杯飲品。Combo小食拼盤有4款小食係當中，炸魚餅、庶蝦、春卷同雞卷塊，每款兩件，同朋友唔洗爭，最鐘意食雞卷塊，外形似粒魚蛋一樣，春卷脆薄薄，庶蝦彈牙。泰式海鮮粉絲沙律，第一次叫哩款沙律，裡面好多芹菜加埋洋蔥、粉絲、蘿蔔絲、蕃茄、花生碎等混合，酸酸甜甜，開胃兼有咬口，海鮮都算多，有兩隻青口、大蝦同魷魚圈，絕對用足料。辣椒膏肥牛炆伊麵，見到辣椒膏三個字以為會好辣，落單時都特別問清楚，好在食落接受到，唔算太辣，麵同肥牛既份量都好多加上秀珍菇，我同朋友兩個人都食唔哂。飲品方面，朋友杯香茅特飲幾得意，附有支香茅比你攪住飲，朋友一路飲就一路攪。我的青擰梳打，青檸汁同梳打水分開上，唔怕比你睇清楚用料。我地食完野可以再傾下計先走，唔會即刻就想你埋單趕走你。