豚道樂 (大河道) (已結業)

荃灣拉麵林立，豚道樂係其中一間不得不食嘅拉麵店。平日晚上等候時間大約20分鐘內就可以入座。職員服務很好，熱心幫助！黑蒜油拉麵：湯底濃郁！海老湯拉麵：本人至愛！海老湯味道濃郁，配上櫻花蝦，鮮而不膩！豬肩肉分量充足，唔會太淋或太難咬加配半熟蛋拉麵味道提升

呢間拉麵店主打豚骨拉麵！佢有兩款拉麵係只限平日- 魚介豚骨拉麵及星期五、六、日- 海老湯拉麵🦐一直只愛曲粗麵，鐘意佢彈牙掛湯力勁。碗麵一上枱已聞到濃濃蝦味，飲啖湯好似有100隻蝦喺口入面跳舞咁，加埋櫻花蝦嘅鹹香，完全感受到蝦頭蝦膏嘅鮮味！最緊要係飲完湯都唔會口渴，係可能會有少少膩！不過呢個湯嘅缺點係～唔夠熱！只見到微煙，但入口感受唔到燙咀嘅溫度係有啲可惜！. 最誇張係兩塊大過你塊面嘅叉燒，厚厚嘅豬肩肉味香濃，不過我就食唔哂喇！如果佢比少塊叉燒，溏心蛋唔使另加錢會仲開心！個人認為紅磡店味道更出色👍🏻.海老湯拉麵 $85溏心蛋1隻 $14怒食推薦：🔥🔥🔥🔥/ 5

芥末拉麵無一般嘅日本芥末咁嗆口反而保留咗芥末嘅香味，而且口感creamy，加埋芝士粉一齊食，味道變得更有層次👍🏻麵條方面，因為選擇咗普通硬度，所以食落幾有咬口✨可能係選咗直麵嘅關係，掛湯效果一般但整體感覺唔錯，係少有有特色拉麵又唔伏的作品.海老拉麵比芥末拉麵嘅味道更加濃郁、重口味櫻花蝦粒增加了湯底嘅鮮甜度曲麵沾滿湯後，比直麵有彈性，口感一流（私心推介）💕值得一讚係豬肩似幾大塊，而且煮到幾腍，但係湯底麵前只能擔當配角～.

地理位置方便：地鐵搭到荃灣站行5分鐘就到；巴士搭73X,278X,290,290A,290X一下車對面就是豚道樂。店內環境整理清潔。免費提供紙圍裙、髮圈、充電線、紙巾及冰的檸檬水。可以使用支付寶付款及使用支付寶優惠卷。員工服務態度非常好，有次員工見我挑了芽菜不食，主動走過來跟我說：「下次你可以叫走芽菜的」。我下次叫走芽菜，雖然店員忘記了，但我跟店員說後他給我一碗走芽菜的。店鋪有集印花活動，每次光顧一碗拉麵，可以得一個印花，集齊12個印花，可免費換一碗普通拉麵。拉麵好食，我個人比較喜歡魚介豬骨湯拉麵和海老湯拉麵。可以選直或曲拉麵、拉麵硬度、要否葱，要否辣。小食燒豬腩肉和燒豬肩肉都好好食。我本身不喜歡太油膩的肉，但豚道樂的燒豬腩肉我可以接受，食時還可以食到燒的香味。但今我到現在還記得的便是豚道樂的季節限定拉麵（2019/6/23）之蜆殼拉麵，當中有蟶子、鮑魚、蜆、帶子。

平時經過荃灣見到呢間豚道樂都好想試下，但見位比較少，夜晚多數要等，難得今次終於試到！見到佢地有個只係周末先有海老湯拉麵，所以就特地點呢個試下😛湯底十分濃郁同鮮甜，唔會太鹹。我揀左曲拉麵，麵條要左特硬，麵質彈牙又煙韌，而且盡吸惹味蝦湯嘅濃香。櫻花蝦咬落仍然脆卜卜，口感層次一流，豚肉肥瘦適中。推介😛😛仲有值得一讚嘅係店員會主動幫手斟水，又會介紹拉麵比我地，服務態度唔錯，而且上菜都好快👍🏿👍🏿

對豚道樂有兩個評價：靚裝+足料裝修真係又靚又有心思。長枱上嘅天花掛住劍球同櫻花，將空間劃分。拉麵舖有木牌寫菜名一啲都唔特別，呢度特別在用滑板代替木牌，誇張突出，甚具玩味。仲有充電位。拉麵方面可能係海老湯嘅關係，味濃而且幾鹹，唔係話個個香港人都啱口味。但呢度啲拉麵比起好多舖頭足料。我碗松葉蟹海老蕃茄湯拉麵已經自動係特上價，即係有蛋、紫菜等等。因為個湯本身都幾鹹，所以蕃茄味唔算好出，但都睇到湯底偏紅。蟹量驚人！本來以為呢啲gimmick嘢都係少少蟹碎就算。點知食完蟹腳仲有大量蟹肉，圖中未計浸咗喺湯入面嘅蟹肉。可以揀幼/粗身麵。溏心蛋有水準，錢加得過。阿爸食嘅係海老拉麵。湯底應該就係我嗰碗減蕃茄，味一樣偏鹹。大量蝦米，帶鹹香，如果個湯本身清啲應該會更發揮到佢哋嘅用途。拉麵入面嘅叉燒吸咗湯汁油脂味唔太突出，所以呢客蒜蜜叉燒反而更好。蜜味香甜，燒過嘅腩肉有油香。小食種類幾多，可惜較特別嘅炸物今日冇。呢個...拉麵常客應該唔陌生。我就第一次飲嘅...飲佢都係滿足吓好奇心，如果唔好奇嘅就揀過第二款啦。想坐好啲食碗拉麵不妨嚟吓，不過講到拉麵本身就要視乎你哋係咪嗜鹹喇。

作為荃灣人既我經常都會經過呢間位於大河道既特色拉麵小店，難得放假有機會終於可以一試。雖則店舖不大，但餐廳採用日系木傢俱，環境舒適，由餐廳上下以至每個角落都有好多小擺設同熊本熊坐陣，滿滿的日本風格！客人可以自訂個人口味既拉麵，只需於點餐紙上自選的曲/直麵、軟硬度、有/無蔥、有/無辣醬及叉燒種類；另外亦有 "特上之選" 同 "經濟之選" ，分別在於 "特上之選" 配料較多，當中已包括豬肩肉 + 豬腩肉 + 溏心蛋半隻 + 紫菜；但 "經濟之選" 只可選擇叉燒種類，並無其他配料。今次就揀左週末限定既「海老湯拉麵」，湯底有濃郁既蝦味，而曲麵有助掛湯，口感好好，感覺非常夾，希望有機會可以再試下店鋪其他款式既拉麵啦～