源記喳咋 (已結業)

4月13日, 食完日本野, 又未到時間睇戲, 經過源記個甜品胃又發作, 入嚟食個糖水先~::: 渣咋 ::: $17話明係招牌喎無理由唔試! 凍渣咋夠晒冰涼~ 下足紅豆、綠豆、眉豆、紅腰豆、三角豆、西米等, 唔少得煲得又粉又腍味道香甜嘅芋頭同大量重手椰汁花奶! 豆料足, 煲得軟腍, 咬落充滿軟綿口感~ 除咗豆香甜味之餘又滲煮淡淡椰香, 好味! 不過因為真係太足料, 又豆又芋頭又椰奶又花奶… 食半碗都開始有d膩~ ::: 芝麻糊 ::: $15芝麻糊比一般嘅黑, 但係味道絕對唔遜色, 除咗聞落有非常香嘅黑芝麻香, 食落非常綿綿嘅感覺, 一流! 唔馬虎嘅用料, 啖啖都有芝麻香, 亦都唔係溝水溝到稀晒, 甜得嚟又夠清, 冇嗆喉感, 夠綿夠杰嘅質地, 咁嘅價錢真係超水準! 但係可能佢真係好夠杰, 食一碗都真係幾頂胃~呢d傳統中式糖水店已經所餘無幾, 亦都好難喺而家嘅新派糖水店食到咁認真嘅中式糖水~ 加油努力!