水記

營業中

休息中

聽聞水記好耐~佢只開中午短短幾個鐘頭排檔0係室外就要好睇天氣如果太凍定太熱又或者落雨都會頂唔順今日天氣啱啱好~~牛腩河牛 : 好淋好淋，但冇乜牛味又冇香味連咸味都冇乜河粉 : 好鞋好厚，唔掂呀!湯底 : 好甜、落左糖0既甜，都係冇咩香味牛 : 都係好淋好淋、冇牙都食到、同腩一樣，冇咩味道$41 碗單拼服務態度都好好~斜路座係有D難度~哈哈有風味但食物就一般啦~未必再去食。

想搵港式原始風味識搵一定黎中環，中環除咗有貴價食肆之外，但識搵其實仲有好多性價比高嘅食肆！就係一條橫街轉入去後巷就搵到呢間風味十足嘅港式粉麵鋪！🍜牛腩河 $40叫一碗牛腩河唔使幾分鐘就即刻上枱，一聞就聞到牛腩香味撲鼻，加埋蔥既香味，真係唾延三尺。先食一件牛腩，食落去好有嚼頭，肉質有厚感，唔會好韌，但亦都唔似清湯腩咁淋，牛味濃郁。之後要加埋紅醋同辣椒油食，個湯都仍然充滿腩汁味，真心值得推介。份量可能細碗啲，但係度食個大排檔風味都值回票價啦。

平時食到嘅牛雜，通常都係橙色既五香牛雜牛雜嘅香味已經被香料蓋過，但呢一個用返原有嘅牛腩清湯清甜嘅湯底帶有陣陣嘅牛肉香濃味好味到連一滴湯都唔捨得放過😭無論牛腩定牛什一食就知道老闆一定每日新鮮到市場攞貨絕對唔係平價雪藏貨所以先可以將牛肉原本嘅味道發揮到咁好位於中環區雖然係街邊檔仔坐得冇咁舒服餐廳定價絕對係良心製造無論牛腩定係牛雜都冇得挑剔希望有一次我可以食到佢既牛沙瓜可能係越食唔到，就越想食😂老闆話一隻牛只會做到三碗牛沙瓜所以只可以限量發售

近幾年在香港要找到一碗好吃的牛腩粉面，真是不容易，大部分餐廳都做得很隨便，水準不高，收費並不便宜，像水記這樣的老字號，雖有老字號，但是依然保持這麼好的水準，實在是難得。希望水記能夠保持下去。

天時熱但都想嚟試下，坐低發現原來都好多OL都有嚟幫襯。中環嚟講三四十蚊食到一碗牛嘅河粉已經好唔錯，係無冷氣嘅，所以冬天嚟食會食得更舒服。叫咗碗牛腩河， 佢嘅牛腩係我少數見過切得最整齊。細細碗似屋企個碗咁，女仔食就ok男仔應該就唔夠。個湯底比外面個啲多咗陣甜味，所以係好食嘅，個牛腩煮到好軟棉棉咬得開。同外面嘅唔同佢嘅牛腩係偏瘦，啱晒我。除咗牛腩河佢仲有牛雜河/麵都想試下，不過會等太陽落山個段時間先嚟食。

新年過後，回復上班的日子，小人於中環出沒，餓得正荒的小人記得同事提及水記的牛腩不錯，一心到此。說實在的，座落在斜路的一間鐵皮店子，確實難找；之不過無必要華麗堂皇的舖面，只要食物好，小人旮旮旯旯都要尋到。本來想試一樣從未見過的牛沙瓜，但是日售罄，改叫了牛腩河。誰知道一試之下無得返轉頭！牛湯牛味超級精華，牛腩的爽腍度超班，河粉勁滑，何止無得輸，簡直是徹底的全壘打！雖然水記未在車胎人的推介系列出現，但就小人來說，這已經是小人心目中的米芝蓮牛腩！絕對是龍！希望下次可以一嚐牛沙瓜！

今日11點50分左右去到，已經8成位有人食緊，行入後巷搵到個位坐，不過因為有飯店做送飯服務，經常有手推車出入。一坐底當然要叫碗牛雜先啦，個人喜歡河粉配牛雜，貪佢可以吸埋啲味，配埋少少辣椒油，真係一流食完一碗，對於我呢啲大食嘅人黎講，真係只當開胃菜，唯有叫多碗啦。其實都只係12點2左右，牛沙瓜，冇；爽腩，冇；牛脆骨，又冇。最後叫多碗牛腩河啦，不過佢地啲牛腩比較碎，我唔太鐘意下次要再早啲黎，試哂佢地啲牛沙瓜，爽腩同牛脆骨

牛腩河牛腩有D韌🤔🤔🤔，唔系好大碗。佢唔係好多位，所以都係搭枱。佢💪🏻💪🏻係一個斜坡上嘅店，所以我係第一次系斜坡到坐。佢哋個辣醬係有辣嘅👍🏻👍🏻，😂唔似附近嗰啲都唔辣嘅😆😆。嗰啲辣醬cake 糸我個喉嚨嗰度，狂咳囉，🍶最後叫咗個可樂🤦🏻‍♀️🤦🏻‍♀️。豬肉丸河啲豬肉丸唔係話特別好食😮，比較爽口，豬肉唔係咁多。因為我成個啲手打豬肉丸係好紮實嘅😋。本身想叫牛坑腩河share，😓但係冇牛坑腩，想叫炸魚皮冇炸魚皮😓😓，所以最後叫咗個豬肉丸😓😓😓。

「此小島外表多風光，可哀的是有人還住陋巷」作為香港開埠早期華洋雜處地區，中環有最高級嘅食肆，亦有普羅大眾醫肚嘅地踎小店。歷史傳承之下，盤根錯節嘅巷弄之中，隱藏著一個個排檔， 識途老馬，勞動大眾，自自然然識得嚟捧場。 水記位於吉士笠街，一條十個香港人中有九個聽都未聽過嘅街，如果唔係慕名而來，一世人都未必有機會嚟。 檔口位於斜路之上，細小整齊，自成天地，除牛腩牛雜，仲有雲吞魚皮餃豬肉丸，最奇妙係賣埋炸雲吞。坐位只有廿個左右，摺枱都要特別調較角度，而食客就要坐斜櫈，有時都擔心隻碗瀡落地，但只係有驚無險，亦係水記特色之一 山不在高，有仙則名，排檔雖小，各懷絕技。水記堅持用每日新鮮屠宰嘅牛雜牛腩，所以每日供應量有限，售完即止。其中罕有部位如牛沙瓜，每日只有兩三碗，一眾嘴刁老饗唯有晨早嚟到一飽口福。今次叫咗牛腩河，牛腩米。新鮮就是不一樣，肉味濃郁，腍滑無渣，湯底滲透著牛油香，五香味輕柔，唔似其他潮式粉麵，以花椒八角掩蓋牛肉臊味雪味，難怪老闆堅持用新鮮料，客人堅持幫襯水記。食完碗粉，連湯都飲埋，仍然全場爆滿，仲有人等緊位！快手埋單以免阻住