影片
更多
2018-09-20
1168 瀏覽
老婆比我有恆心，活到老、學到老，家下都仲有進修。雖然唔喺為工作、為生活，只喺為理想、為興趣，但都值得鼓勵。剛剛完咗一個循環，有幾周嘅假期，要食餐豐富嘅慶祝吓啦！呢一晚走到嚟荃灣「如心酒店」嘅「咖啡閣（Cafe Circles）」，食自助餐夠豐富啦，想食乜就揀食乜。餐廳做緊「亞太海鮮盛宴自助晚餐」，睇張海報幾吸引吓，自助晚餐享用時間喺6:30-9:30pm，揸某幾間大銀行嘅信用卡更可以有低到8折嘅優惠，平日晚埋單都喺三百尾一位，話晒如心都喺一家大酒店，值搏率高呀！一枱夠8人仲會額外送一份一公斤嘅斧頭扒，得我倆公婆，唔使諗啦。 「如心」都唔喺一家低星級嘅酒店，裝潢都有番咁上下，所以，餐廳嘅環境都算得上幾高雅。一入門口嘅超巨型原木大長枱，配上大型水晶燈，夠霸氣喇啩。一室以淺灰為主調，襯深啡，淺灰雲石地板，配深啡木枱，樓底高，間隔亦非常閣落，燈光光猛，部份窗口位更可以一窺荃灣市景，當然，荃灣嘅夜景無乜睇頭，但呢個小社區嘅變化真喺一日千里。晌餐廳尾，更特設一角，擺放張圓枱，較方便5、6人一枱嘅客人，圓枱就較方便大家傾偈嘛！跟住，就介紹吓食物區，基本上絕大部分食物都擺晌餐廳嘅正中央，一字長形咁排開
餐廳做緊「亞太海鮮盛宴自助晚餐」，睇張海報幾吸引吓，自助晚餐享用時間喺6:30-9:30pm，揸某幾間大銀行嘅信用卡更可以有低到8折嘅優惠，平日晚埋單都喺三百尾一位，話晒如心都喺一家大酒店，值搏率高呀！一枱夠8人仲會額外送一份一公斤嘅斧頭扒，得我倆公婆，唔使諗啦。
「如心」都唔喺一家低星級嘅酒店，裝潢都有番咁上下，所以，餐廳嘅環境都算得上幾高雅。一入門口嘅超巨型原木大長枱，配上大型水晶燈，夠霸氣喇啩。
一室以淺灰為主調，襯深啡，淺灰雲石地板，配深啡木枱，樓底高，間隔亦非常閣落，燈光光猛，部份窗口位更可以一窺荃灣市景，當然，荃灣嘅夜景無乜睇頭，但呢個小社區嘅變化真喺一日千里。
晌餐廳尾，更特設一角，擺放張圓枱，較方便5、6人一枱嘅客人，圓枱就較方便大家傾偈嘛！
跟住，就介紹吓食物區，基本上絕大部分食物都擺晌餐廳嘅正中央，一字長形咁排開晒，較集中。喺有少部份嘅甜品擺晌另一邊，但都好近啫。
飲品區未講食，先講飲，因為食物區較頭嘅位置，就喺飲品，包括凍檸水、橙汁、檸檬片、即磨咖啡、紅茶。選擇比較大路，所以，今晚飲得唔多，用餐時就飲咗一、兩橙汁，配甜點就飲杯咖啡。
沙律吧兩大盆沙律菜、多種配料、4款醬汁，都整齊排列好，仲有3款預製好嘅沙律，雖然，無咩特色食材，但要砌出一道開胃沙律都絕無問題。
生果盤自助餐一向會提供三幾款生果，今晚所見就有西瓜、哈蜜瓜及新鮮菠蘿。
小弟嘅第一道頭盤，就喺自家拼嘅鮮果田園沙律，晌沙律吧樣樣執啲，加啲生果，醬汁亦隨意，目都喺開開胃，提升戰鬥力而已。
冷盤呢個類別反而有啲驚喜喎，平常所見，唔喺雜錦凍腸，就喺煙三文魚，今趟都有，但就多咗好多少見嘅款式：豬肉啫喱凍、燒釀雞卷、黑椒吞拿魚、海鮮紫菜蛋卷、蟹肉水晶。最搞鬼竟然有蠔油齋及甜酸齋，小弟無試，但老婆試咗話麻麻哋。
由於啲冷盤款多又幾有特色，平時就搭埋啲沙律食，今次就索性一碟過。部份款式味道唔錯，尤其燒釀雞卷及海鮮紫菜蛋卷，較合心水；啲吞拿魚嘅鮮味就被啲黑椒搶晒鮮味。
芝士籃講開啲冷盤，就順便介紹埋口個芝士盤。共有4款芝士，配啲克力架及紅提子。芝士一向都喜歡飲湯時襯麵包食，不過，影完相之後，食食吓其他嘢就遺忘咗而無試。
刺身、壽司講吓啲刺身先，雖然無標任何名牌，但由於款式比較為港人熟悉，都認得出有咩選擇，如希靈魚、八爪魚、三文魚、吞拿魚及油甘魚。全部放晒入凍櫃，保存鮮度，要幾多，切幾多。另一邊就仲有甜蝦、北寄貝及精緻嘅冷麵杯。
壽司呢？好少自助餐無壽司喎，其實，兩大盆雜錦壽司擺咗晌冷盤區隔離，仲以冰冰鎮住。不過，一如以往，除非啲刺身、壽司好特別或好高質，否則都喺齋睇無幫襯。
芝士白汁焗半邊龍蝦伴香煎鴨肝突然由侍應送上每人一客波士頓龍蝦伴法國鵝肝，賣相都幾精緻架，正正食完啲生冷嘢，嚟一道熱盆就可以暖暖胃。點解件龍蝦無咗鉗，原來師傅拆埋肉，放晌蝦殼內一齊焗，啲蝦肉鮮甜爽口，而且，有唔少蝦膏；至於件鵝肝，大件夠睇頭，更煎到外脆內嫩，豐腴綿滑。
芝士白汁焗半邊龍蝦伴香煎鴨肝
24 瀏覽
0 讚好
0 留言
缺少龍蝦、生蠔等貴價海鮮，陣容自不然喺無咁震撼，凍海鮮只有翡翠螺、龍蝦仔、青口、凍蝦、雪蟹腳、阿拉斯加蟹腳。最鍾意喺啲阿拉斯加蟹腳，做成小杯，一邊殼已經削開咗，方便食用。
既然款式唔喺咁多，就一碟過試勻晒咁多款啦。幾款海鮮中，兩款蟹腳都好正，鮮甜而唔會太鹹，蟹肉又一梳梳咁；翡翠螺嘅質素亦唔差，清甜爽口；龍蝦仔、青口就真喺麻麻哋。
餐湯食咗份凍海鮮，就再飲番碗湯嚟暖吓胃。照大多數自助餐嘅慣例，多數都會提供一中一西嘅餐湯，西湯有周打海鮮湯，而中湯以為喺碗仔翅，睇真啲原來喺海龍皇酸辣湯。餐湯旁就放有麵包籃，有布巾冚住，比較衛生。
雖然無燉湯，但個海龍皇酸辣湯真喺幾正，酸辣湯加入海鮮料嘅升級版，勁多料，味道酸酸辣辣，刺激味蕾。如果有件炸饅頭襯吓，就完美喇。
海龍皇酸辣湯
44 瀏覽
0 讚好
0 留言
白汁焗珍寶蠔突然間，聽到有敲鐘聲，依家好多自助餐都會玩敲鐘，一有敲鐘聲就表示有啲特別嘢推出。睇見開放式廚房一角有人排隊，就知嗰邊有好嘢，原來喺焗珍寶蠔，仲加咗酒嚟燒一燒，火光熊熊，夠晒卓頭。
啲珍寶蠔嘅呎吋大得真喺好誇，大過我嘅手掌好多，個人嚟講，就鍾意食生蠔多過焗蠔，味道較鮮，不過，隻焗蠔都嚟錯，仲帶有海水嘅鹹味，肉質厚身，蠔味都算濃。
海鮮窩開放式廚房嘅另一角，又有個即煮嘅海鮮窩，睇嚟幾正咁，所以，同老婆嗌一客一齊試。味道可以揀蒜蓉、咖喱、薑蔥，最便民喺每枱有個膠枱號牌仔，擺低個牌俾師傅，佢整好就有侍應送上嚟，非常貼心嘅安排。
本來揀薑蔥，諗住清啲，不過，似乎嚟錯個蒜蓉，但我哋都啱食嘅就費事更換。蒜蓉就惹味啲，內裡有鮮蝦、青口、魷魚，大量紹菜墊底，味道都OK嘅，喺個茨汁太多。我哋覺得，去走啲茨汁，改放海鮮湯就更理想。
即煮粉麵、中式火鍋此外，呢一組食物區，仲有粉麵檔，兩款粉麵，有多種配料供配搭，不過，晌自助餐度，粉麵一向唔喺我杯茶，因為，叫粉麵等同為樖樹，放棄個森林。但如果真喺想食，都可以走粉麵，淨食餸，變成一道中式火鍋。
潮式煎蠔餅喺即場由師傅即點即做，其實，我都想試架，只喺見佢個樣本本身都頗十份，得我哋兩公婆，老婆本身食力有限，最後，都只好放棄無試。
烤肉烤肉方面，好多餐廳都只供應一款，例如西冷、牛柳、豬髀之類，但呢度就有兩款：燒西冷及燒羊髀，睇外觀非常靚仔吓，所以，一陣夾熱盤類時就搭多件薄切西冷。
熱盤輪到介紹熱盤區，就喺食物區嘅最尾，一字長形食物枱上擺出超過廿款食物：薄餅、焗釀蟹蓋、酥炸珍寶蠔、炸魚柳、炸蝦、炸蝦餅、泰式蔗蝦、自家製燒味、印式燒魚柳、牛肉咖喱、印度薄餅、海鮮意粉、燒羊架、燒汁魷筒、串標海鮮、碧綠鮑貝、清蒸粉絲扇貝、雜菇炒時蔬、清蒸海上鮮、干燒伊麵……等等。因為，今次心水嘅熱盤唔多，所以，除一開始影咗少少相之外，之後都無太留意有無轉款。
因為奉送咗客龍蝦鵝肝，又試咗焗珍寶蠔及海鮮鍋，加上熱盤唔喺太多心水，所以，今次小弟嘅熱盤組合要細細碟就夠晒。西冷及羊架幾好食，尤其後者，軟腍羶香；而焗釀蟹蓋就最得我歡心，內裡勁多蟹肉，又夠鮮甜。啲燒腩仔麻麻，唔知喺咪擺咗成晚，個皮唔夠脆。
甜品區甜品嘅選擇都頗多，雖然全部都擺晌近食物區嘅頭段，但就分散晌唔同嘅枱上。先一口氣介紹有啲咩先：Häagen-Dazs雪糕專櫃、餐廳特別推介嘅雪耳冰糖蛋白杏仁燉奶、唔同口味嘅布甸、曲奇、綠豆沙、焗菠蘿牛油布甸、布朗尼、朱古力噴泉、生果酥、草莓乳酪蛋糕、伯爵朱古力奶凍、芒果椰子慕絲、焦糖燉蛋、式芝士蛋糕、綠茶芝士餅、雜果啫喱、焗藍莓杏仁金寶、栗子軟餅、焗西米栗子蓉布甸、黑朱古力蛋糕……等等，期間亦留意到有轉其他款式。
講到滋補養顏就梗喺餐廳特別推介嘅雪耳冰糖蛋白杏仁燉奶，每份喺一整碗份量，所以，拎一碗同老婆「些牙」。喂，又真喺幾正喎，涼涼哋唔會太凍，個燉奶口感非常嫩滑，又滲出杏仁香，仲有大大撮燕窩呀！
雪耳冰糖蛋白杏仁燉奶
45 瀏覽
0 讚好
0 留言
甜品拼盤
23 瀏覽
0 讚好
0 留言
有食開自助晚餐嘅朋友都知，晌一啲四、五星酒店食一餐五、六百喺走唔甩，有啲仲去到七百。Cafe Circles嘅質素唔算話好高，個人評為中上左右，但折實四百唔使，環境寬敞，服務到位，選擇甚多，又近荃灣西站，可以講喺食得過喎！
張貼
