自在素食 (已結業)

因爲上星期六午飯冇乜食菜，加上嗰日係觀音誕，晚飯去食齊。自在素食門面唔係好起眼，裝修亦較舊。食肆有兩層，地下有外賣部，有點心俾堂食嘅食客自取，但裝點心嘅麵包箱打開晒，又近門口，唔多衞生。地下有少量座位，有卡位同幾張枱。大部份座位喺一樓，要行一條梯級好窄嘅樓梯，要行得好小心，尤其是落樓梯。我同老公兩個人叫咗兩碗例湯（節瓜紅蘿蔔蜜棗湯），薑汁炒豆苗，西芹百合腰果炒雜菌，１碗粟米粥。上菜超快，快餐速度。例湯夠熱，有幾嚿節瓜，紅蘿蔔，１粒蜜棗，個湯好清幾好飲。豆苗成＄８０，份量唔多，幾好食。西芹百合腰果炒雜菌份量適中鹹味剛好，材料算多，雜菌有草菇，秀珍菇，雞骳菇。呢兩味餸較油。粟米粥除咗有粟米外，仲有啲冬菇碎，紅蘿蔔碎，好味。成餐飯唔使一個埋鐘食完。，埋單＄２０２，價錢合理喇。

星期五，阿爸有約唔番屋企食，於是阿媽就懶得煮，一齊出街食。原本想去馬家莊，但不知何解，我竟然提出去食齋。未試過呢間，剛巧地點就腳，於是一試。大約六點半去到，人不多，有2-3枱。menu 大大本，菜式寫到密麻麻，花多眼亂。叫咗1碗粟米粥，羅漢齋炒面同細齋鹵味。粟米粥算係我嘅飛佛，雖然個名叫粟米粥，但其實除咗粟米之外，仲有紅蘿蔔粒、冬菇粒。味道清清地，又夠熱，粥底剛好，最怕d粥太杰。羅漢齋炒面份量十足，師傅落油也非常重手！都幾oily。好在個獻汁唔會杰得滯，剛好夠撈勻d麵。麵炸到脆bok bok，熱氣但好香口。配料有冬菇、粟米芯、秀珍菇、carrot & 雲耳，配料可不少。齋鹵味，一向唔啱口味，不過旨在試試味。齋雞好味，其餘就不過不失，要讚嘅就係唔太油膩。