新堡餐廳

營業中

休息中

新堡餐廳是一間比較傳統舊式的西餐廳，用餐環境普通，午市套餐由 $70 起。 羅宋湯口味偏甜，配搭平實的蒜蓉多士一起送上。 主菜燒美國豬柳配燒汁意粉，豬柳製作味濃，口感軟中見彈，質素比預期理想，難怪是店員推介。 冷熱餐飲同價，奶茶口味還是不及一般茶記佳。

晚上在灣仔用膳，以港式西餐為目標。新堡餐廳內設啡色皮椅卡位，紅白格仔枱布，甚有懷舊西餐廳的感覺。一系列晚餐由近百元至二百元左右，先來蒜蓉包及餐湯，蒜蓉包是翻熱貨式，包身較乾硬，脆香食味不足。羅宋湯味道酸香濃郁，都算滿意。主菜紐西蘭西冷扒，八安士重，追加$20可多加兩安士。七成熟度要求大體到位，切下肉色粉嫩，肉汁不多，肉質腍度肉香對辦。另一主菜焗豬扒飯，豬扒鬆軟腍身。飯粒經炒底再焗，質感亦夠乾身。醬汁調味不俗，但同時出現味精重手的問題。以一杯凍奶茶作結，茶底力度重，帶點澀，OK喇！