莉苑美食 (已結業)

毛仔平日溫書溫到肚仔餓，就會過嚟呢間小店醫醫肚。莉苑鋪仔細細，但食物款式都幾多元化，咸甜俱備。午飯時間都會見到鋪面人流不絕，皆因真係好抵食。毛仔個人認為莉苑的熟食質素參差（個人覺得鍋貼都食得過，但唔算好驚豔），反而佢嘅腸粉同荳腐花就百吃不厭。荳腐花（$9/碗； 外賣$16/2 ）荳腐花可以話係中式甜品中，最易學難精的一種。由打漿、隔渣、煮滾到最重要一環---撞荳花，都要一絲不苟。石膏粉嘅比例至關重要：太多，會變咗荳腐；太少，會令兜嘢水汪汪。今次影嗰碗荳腐花雖然賣相無平時咁靚仔，但公道啲講句，佢嘅口感真係好綿滑。嗰種綿滑唔似啫哩或者布丁，比較似蒸水蛋嗰隻。莉苑隻荳腐花用木桶裝住，似係自家撞出嚟。擺入口就食到淡淡嘅黃豆香。同埋呢間店提供薑糖糖水，而非平時見到嘅粒狀黃糖。薑糖糖水可以令甜味分佈得更加均勻，而且薑糖糖水甜度適中，唔會喧賓奪主。整體嚟講性價比好高。腸粉（$9）腸粉本身夠滑，配合埋豉油、甜醬、麻醬同芝麻，食落口更順滑。醬料調配恰到好處，成功將腸粉嘅米香昇華。賣相：6/10 （荳腐花扣分！）口感：8/10味道：8/10價錢：9/10【完~~~~~~】