影片
更多
2014-04-28
800 瀏覽
小弟晌開飯個人專頁上，都有提及意大利菜都喺自己喜愛嘅菜式之一，難得朋友邀請，當然非常有興趣啦。餐廳位處較少涉足嘅北角區，名字叫「Cafe Italiano」，咪以為佢喺間Cafe嚟，試過之後，認為佢喺間水準不俗，定價親民嘅意菜小館，誇少少講句，真喺Cafe嘅價錢，Ristorante嘅質素，確喺意想不到 ！門面全通透玻璃窗，一眼就望到入面環境，全店主要以木材為裝修素材，深淺、木紋不一嘅粗木條牆身，令人甚有身處意國效區嘅小木屋之感。再配以柔和嘅燈光，及木枱木椅，好一派悠閒風情 。所有枱櫈都可以活動組合，人多人少嚟都無問題。一張A3呎吋嘅主餐牌，已印有飲品、甜品、前菜、是日餐湯、主菜、12”披薩、意大利粉……等等多款美食。不過，有一點稍稍補充，就喺見之前有食評提及全日免收加一，但試菜當晚，已發覺稍微調整，需要收取加一服務費，咁實在由入座、點餐、出菜……全程都有人招呼，收取服務費都屬正路範圍。另外，仲有一個全新嘅季節性餐牌，晌傳統意菜上加啲心思嚟創作，一共12款，有前菜，又有主菜，有意粉，又有意大利飯，而且印刷精美，又圖文並茂，價錢同樣親民，喺不容錯過嘅選擇 。跟大家分享一下4款前菜先
門面全通透玻璃窗，一眼就望到入面環境，全店主要以木材為裝修素材，深淺、木紋不一嘅粗木條牆身，令人甚有身處意國效區嘅小木屋之感。再配以柔和嘅燈光，及木枱木椅，好一派悠閒風情 。所有枱櫈都可以活動組合，人多人少嚟都無問題。
一張A3呎吋嘅主餐牌，已印有飲品、甜品、前菜、是日餐湯、主菜、12”披薩、意大利粉……等等多款美食。不過，有一點稍稍補充，就喺見之前有食評提及全日免收加一，但試菜當晚，已發覺稍微調整，需要收取加一服務費，咁實在由入座、點餐、出菜……全程都有人招呼，收取服務費都屬正路範圍。
另外，仲有一個全新嘅季節性餐牌，晌傳統意菜上加啲心思嚟創作，一共12款，有前菜，又有主菜，有意粉，又有意大利飯，而且印刷精美，又圖文並茂，價錢同樣親民，喺不容錯過嘅選擇 。
跟大家分享一下4款前菜先，有別一般常見嘅意式前菜，幾款菜式配搭都幾特別。意大利香甜葡萄酒浸軟滑法國鴨肝 $108
兩大片合桃麵包一開三成6件，配以3件法國鴨肝，據介紹法國鴨肝慢煮後再以意大利甜葡萄酒浸過，鴨肝望上去內裡仍一片嫣紅，晌上面糝少少黑椒碎及蔥粒，賣相別緻。將合桃麵包塗上一層厚厚鴨肝醬，一啖咬落去，軟綿嘅鴨肝滲出淡淡酒香，味道有趣，而麵包帶有合桃粒及燕麥片，配合埋鴨肝，口感多變，喜歡鴨肝嘅人值得一試 。
燒牛仔肉薄片涼拌秘製吞拿魚汁 $88 咪睇佢好似好大碟，除咗碟淺之外，啲燒牛仔肉又真喺切得好薄。牛仔肉又喺慢煮過，再加輕燒，仍然保持半生狀態，肉質軟腍嫩滑，入口竟散發出濃濃吞那魚味 ，真喺有啲啲錯覺食緊片吞那魚咁，個秘製吞拿魚汁實在濃香，打得幼滑，再者，依個前菜喺一道冷盤，天氣開始熱，食落更透心，喺甚有意外驚喜之作 。
烤意式豬肉腸配玉米蓉 $98意大利煙燻豬肉腸，肉質挺實唔削，感受到真材實料唔喺溝粉貨，不過，可能煙燻製法關係，味道頗鹹，所以配淡口嘅粟米蓉都喺有心思嘅做法，中和豬肉腸嘅鹹味。平時食薯蓉就食得多，所以，今次配粟米蓉，雖然質感有點粗，但粟米味濃郁，我覺得更成為依道菜亮點 。
意式燜煮豬腩肉碎配合桃麵包 $58 其實我唔喺好覺得佢喺一道意菜，極似台灣嘅肉燥，豬腩肉碎加上花椒、八角……多種香料燜煮，但就喺個好搞鬼嘅組合。味道香濃不在話下，十分惹味，豬腩肉碎又無想像中咁肥，放晌合桃麵包之上，有種兒時露營五香肉丁夾麵包嘅回憶 。
4款精彩前菜過後，由於無試店方嘅披薩，就再介紹兩款意大利粉類，包括一個意大利餛飩及一個炒意大利粉。自家製龍蝦餛飩配香濃龍蝦汁 $108
嘩，隻意大利餛飩可以講得喺飛碟餛飩，夠晒大隻，十分有睇頭，雖然賣點之一喺餛飩皮為自家製，但個人略嫌有少少過厚，煙韌感不足 ，幸而餡心嘅蝦肉慕絲做得幼滑，而個龍蝦汁底濃香，又無過鹹嘅常見問題，混著餛飩一齊放入口，猶如食咗大海鮮味 。題外話，其實個龍蝦汁真喺唔使俾咁多，因為食完啲餛飩仲剩唔少，覺得有點嘥，有啲衝動想問吓有無齋意粉叫，撈埋啲汁再加少少巴馬臣芝士應該會極滋味囉！
傳統意式活蜆炒意大利粉 $109 另一個意粉類喺較傳統嘅活蜆炒意大利粉，活蜆唔算好大隻，勝在都夠鮮夠甜，意大利粉炒得有水準，有咬口，味道帶點微辛、蒜香，如果再加點煙肉碎，相信會更惹味。
店方亦安排咗兩道主菜俾我哋品嚐，睇睇味道上仲有無需要調校一下。兩道主菜分別喺一客雞胸肉及一客燴牛膝，前者創意驚喜，後者穩中求勝。意式雞胸肉帕爾馬火腿卷 $158
店主介紹時，個雞胸採用法國雞胸，又慢煮，又低溫烤焗，再輕煎，都幾多功夫，不過，雞胸入口未有預期中咁柔嫩；相反，味道就真喺幾好，因為，雞胸以超薄嘅帕爾馬火腿包裹住嚟整，唔單止煎出嚟色澤更金黃閃爧，食落鹹香不單調，令平平嘅雞胸味道更豐富。
紅酒燴牛膝 $168 當然用番意大利紅酒入饌，牛膝炆得超腍，肉質非常鬆化，而且，味道濃郁又帶點酒香。一客牛膝仲有啲牛骨筒，內藏如軟膏般骨髓，齋食或者你會覺得幾肥膩，如能配件多士就一流嘞。
一餐飯，若可以嘅話，臨尾以甜品作結，總喺令人感覺圓滿啲。不過，配甜品，小弟始終喜歡加杯咖啡嚟襯，但同行食友就揀咗一啲非酒精特飲。Blue Bird $30‧Peach $30‧Passion Fruit Daiquiri $32‧Margarita Guava $32
幾款特飲嘅成份就唔多講，因為晌餐牌都有註明用咩果汁配搭梳打。湖水藍嘅 Blue Bird、淺黃嘅 Peach、橙黃嘅Passion Fruit Daiquiri及粉紅嘅Margarita Guava，聽食友分享，似乎Margarita Guava較為好飲，酸酸咪咪，其他幾款都有少少偏甜嘅毛病，當然，口味各有不同，小弟又無飲過，都難以下判斷。
Caffe Latte $28小弟揀嘅拿鐵，味道又會喺點呢？個人覺得，奶泡撞落啲特濃咖啡度唔平均，所以入口唔滑，而且奶泡絕對過多，似一杯Cappuccino多啲 。
意大利奶凍 $24 奶凍何解咖啡咁色？原來喺阿華田奶凍，華田味十分突出，不過質感比較柔軟滑身，唔似常見意式奶凍咁挺身，似食慕絲多過奶凍。雖然店主原意喺想做得幼滑啲，但小弟就會覺得失去意式奶凍個風格。
焦糖燉蛋 $26 屬於法式嘅經典，下層燉蛋部份做得好細滑，蛋香味濃郁，而面層嘅焦糖，火槍嘅控制好好，做出一層薄薄既香且脆嘅焦糖，實在好味，點可以唔推介 。
意大利芝士餅 $28 依個意式經典，又喺小弟至愛甜品之一，被食友問到究竟有幾多至愛甜品，唔好意思，實在樣樣甜品都鍾意。馬卡風芝士做得軟滑細緻，上層嘅咖啡酒蛋糕濕潤富酒香，加埋糝上嘅唂咕粉，更添朱古力濃香。
藍莓芝士餅 $50 對比起上面幾款小杯裝甜品，藍莓芝士餅及合桃朱古力蛋糕均定價好不一樣。不過，個藍莓芝士餅實在好食，忌廉芝士所做嘅餅身，芝士味豐厚而柔滑，餅面嘅藍莓醬，既新鮮，餡料又多，內裡仍有好多原粒藍莓果肉；唯一要挑剔，就喺個消化餅餅底做得異常之厚！
合桃朱古力蛋糕配雲尼拿汁 $50 合桃朱古力蛋糕其實即喺班尼士（Brownie），個班尼士亦做得有水準，一來個蛋糕本身有好濃郁朱古力香；二來，蛋糕內有好多合桃，正；三來，質感挺實，帶點濕潤，唔會太乾，好有實在感。
試咗咁多款菜式，雖有高有低，但拉平均而言，仍覺得整體有中上水準，尤其前菜及甜品，有唔少出色之作。再加上環境愜意，有氣氛，有風格，服務又不錯，值得一訪嘅意菜小館 。
張貼
