東喜茶 (已結業)

香港冇喜茶，但係有東喜茶。雖然東喜茶個名有啲山寨，但係個味道都唔差。東喜茶嗰個位置好易搵到，喺正新都戲院對面。 我叫咗個芝士桑莓，都要成四十八蚊，其實好貴， 不過佢呢個質素對得住佢個價錢，個奶蓋稀杰嘅程度啱啱好，又唔會偏鹹，好有芝士嘅香味，重點係啲果汁，飲得出係有鮮榨果汁成份，有果肉，但建議叫少甜，會更加好飲。

行行下突然好想食珍珠 咬咬下好漏打，行到茶湯會，見到對面有間新開嘅野，一堆港女排隊，作為港女一份子一定唔執輸要埋去排埋一份雖然想試茶類，但見到季節限定又師奶心態發作，驚第日無得試見到啲芝士火火，芝士芒芒，芝士瓜瓜，個名疊曬字好萌，唔敢嗌搵放大鏡望都望唔到有珍珠呢回事就試佢棟牌嘅呢杯野啱先食飯食咗四十幾蚊，呢杯野四十八蚊決定唔好飲都要呃自己話好飲總括黎講ok啦，個色調得幾靚芝士幾香，但稍為有啲普通，呢個價錢吹大咗下次都係寧願買杯珍珠咬咬下

超級失望，太太太飲難，之前係大陸飲過長期排晒長龍嘅X茶（滿杯紅柚，芝芝莓莓，輕芝士綠妍）都好好飲，就係因為太掛住個種味道，返到黎香港行開旺角見到呢間鋪頭有99％相似，諗住試下，叫左杯芝士桑莓，一飲就知賴野，飲得好分明，冰，果醬，果肉，同芝士，完全分開哂，冇晒草莓個啲清甜味，又冇咗茶味，mix up 完又冇咗乳酪個啲feel，成杯嘢好似食緊沙冰，而且價錢仲要貴好多，香港$48蚊杯，大陸都係$30人仔，總之就難飲，絕對絕對冇下次。

今日一心諗住黎叫杯芝士芒芒！點知去到已經賣晒！好失望！得返芝士火火同埋芝士瓜瓜！決定走嘅時候突然見到個二奶架寫住芝士桑莓！原來係自己未睇清楚餐牌！最後咩都冇理即刻跟住隊尾！$48一杯飲品真係好好好貴！我真係唔捨得飲第二次！試過就好了！不過真係好好味！第一啖先先淨飲芝士！飲完第一個反應係「好正呀！好邪惡呀」好耐人尋味既味道，小小甜，小小酸，小小咸既芝士！我忍唔住連續飲左3啖！跟住就到淨飲桑莓！冇叫小甜！但係唔太甜，剛好！桑莓一啲都唔酸！飲到一半，就將剩低既芝士同桑莓沙冰溝埋黎飲！哈！好甜呀！原來頭先冇攪渾，啲甜係曬低！但係都好好味！好想再飲！🤤🤤下次可唔可以叫芝士芒芒！（唔捨得都好想飲！）