ChirChir Fusion Chicken Factory (已結業)

又去ChirChir,呢度入口有好大個宋仲基.入口處附近仲有好多雞公仔.裝修同而家大部份新派韓式炸雞店大同小異,店入面電視仲不斷播放韓國MV.呢次就食咗玫瑰芝士女神雞,個名好搞鬼.鐵板上面鋪滿水牛芝士碎,同埋加咗車厘茄,青椒,紅椒,西蘭花同炸薯角,店員仲會淋埋忌廉芝士汁上去.堆疊到好似小山丘嘅炸雞已經去骨,每件都好似姆指咁大,食落幾方便.水牛芝士碎同忌廉芝士汁撈埋一齊之後質感較稀,但仍然拉到絲,食完炸雞之後店員就會加碗白飯入去兜炒勻.飯粒吸滿芝士,都幾好味,不過食完成盤都參透唔到佢同玫瑰,女神有乜關聯.茲樂茲樂美極了,菜名同樣得意,去骨炸雞浸晌忌廉芝士汁同巴馬臣芝士片之中,當中同樣加咗雜菜.炸雞食落有啲辣味同黑椒香,意大利粉冇煮得過腍,有啲似晌度食卡邦尼嘅感覺.相對起嚟芝士味較玫瑰芝士女神雞輕,但都唔錯.

全部都係雞，由韓國來的雞料理店，周圍都係雞的裝飾，好有趣，貼合返餐廳的炸雞。先來的飲品好大杯，叫草莓冰冰 $88，上面是草莓味的冰冰，下面是芒果口味的冰冰，味道酸中帶甜，仲有芒果香味，飲完好冰涼。雖然 d cream 好多，但唔係好甜，仲令杯飲品更滑，不過容易飲到膩膩地。由於怕唔飽，所以叫左個有意粉的炸雞，個菜式名都好特別，叫 茲樂茲樂美極了 $168，有炸雞同白汁意粉，仲有焗到香噴噴的芝士。炸雞有少少辣好惹味，雞肉嫩滑又唔乾，但炸雞有少少淋左。白汁意粉加入左意大利芝士，所以食到好香濃芝士味，意粉煮得偏淋身，掛到好多芝士白汁，好正。食完炸雞到食烤雞，呢款一點都唔油膩，焗得皮脆肉嫩又香，叫蒜香健康烤雞 $168，有一整隻雞，仲有焗薯及雞蛋，旁邊的是清新蕃茄沙沙醬。烤雞上有蒜蓉好香好香，加上甜甜的蜜糖，已經係完美組合，雞的油脂都被烤焗迫哂出黎，皮薄又香，雞肉多肉汁又嫩滑，配沙沙醬好清新爽口，熟雞蛋也是烤出來的。整個份量都頗大，兩人食完超飽。