一休(居食屋)日本料理 (38廣場)

營業中

休息中

旺角好食既野唔少，但坐得舒服既唔多，而一休係比較多卡位同食物款式既平價日本餐廳。甜蝦、帶子、鰻魚壽司 （$22、$32、$21）甜蝦鰻魚都係普通貨式，帶子幾出色！大件又鮮甜。但略嫌壽司飯太大件，而且飯係熱既。一休海鮮沙律$48（星期五特價）我每次都點既菜式，非常足料，有蝦、蟹柳、蟹子、角切三文魚同吞拿魚等，份量亦不少。厚切牛舌串 $28唔夠厚切，燒得太硬，令到質感有點似雞腎。牛油果軟殼蟹卷 $48本身呢個配搭係幾好食，但舊飯有點散同熱係敗筆。蒜片和牛粒 $78和牛幾好味又大件，如果墊底個洋蔥可以炒熟少少會更佳！

同事今日放工帶咗我嚟旺角呢間一休居酒屋食日本嘢. 呢度同我去開嘅居酒屋都幾唔同, 餐廳好光猛, 裝修簡單. 啲侍應都好 nice, 好快就安排到座位畀我哋.睇完一輪餐牌, 發覺佢嘅刺身同埋壽司都貴, 但係拉麵、飯 、同埋 小食就好抵食.最後我哋決定 order 一個拉麵做主食, 留肚食多啲小食辛辣黑豚肉拉麵 ~ 個湯唔錯, 不過辣味唔夠, 如果有得畀我揀辛辣程度會更正. 拉麵夠爽口彈牙, 我最欣賞佢嗰三塊叉燒, 好好味蒜片和牛粒 ~ 啲和牛粒好好味呀, 夠味道但唔會太鹹, 肉質嫩滑但一啲都唔油鹽燒三文魚腩 ~ 超香口, 唔會好咸, 魚皮燒到脆卜卜但啲魚腩肉仲係咁嫩滑, 正到停唔到口啊燒酒煮蜆 ~ 蜆肉好肥美鮮甜, 好大鍋, 兩個人幾乎食唔曬雖然飽, 但女人係有另一個位食甜品㗎嘛, 梗係要食埋佢個 cheese cake 啦. 真係冇叫錯, 好好食呀! 芝士味夠香濃, 個蛋糕好鬆軟, 唔會實的的, 又唔會痴到我成口芝士. 如果唔係同事撳住我, 真係會 encore 多一件, 好滿足呀

呢排心情比較鬱悶，難得週末，的起心肝約個老友出嚟飲番杯、吹下水， 解解悶。老友話要地點就腳，想食好啲，但又唔想太貴，一定唔可以限時，週末喎。。。真係考起我。上網 search 一輪，見到呢間一休日本料理，好似平靚正，一於試下啦。餐廳係雅蘭隔離，好易搵。呢度唔單止裝修平民化，連餐牌價錢都非常之親民。食肉獸必點蒜片和牛粒同埋雜錦牛肉鍋。蒜片和牛粒大大份都只係 HKD78, 超抵食 和牛粒夠林，洋蔥蒜片夠香，絕對推介，冇得輸雜錦牛肉鍋湯底偏甜，有啲似壽喜燒。有肥牛、豆腐、娃娃菜、冬菇 、金菇同雞蛋， HKD58 超抵食， 加 HKD12 仲可以有個白飯。食日本嘢點都要叫壽司嘅，我哋點咗餐廳推介火炙胡麻蝦捲。好得喎，蝦好彈牙，配胡麻醬夠開胃。跟住唔少得梗係吹水必食嘅炸雞軟骨同埋酒煮蜆啦。雞軟骨得喎，新鮮熱辣炸起，大大粒又一啲都唔硬，如果少啲炸粉仲好。酒煮蜆酒味比較濃，啲蜆好大隻，大大鍋， 又係平靚正。吹水當然唔少得飲番兩杯啦朋友點左巨峰果汁酒，我就試咗佢哋嘅梅酒 。梅酒後勁都幾強，飲兩杯有少少 over 添

是日同朋友聚餐去左呢間日式餐廳，訂左730但遲左20分鐘先到，好彩都有留位。呢個拉麵落左單一分鐘後就上左菜，懷疑係整定左，因為冇咁熱，紫菜相片中都見到係淋晒，味道唔夠濃，整體一般炸雞軟骨炸物方面口感還不錯，幾香口，由於比較大粒都有少少雞肉食到，感覺好似抵食左，哈哈呢個炒飯有少少腥味，鑊氣係有，但味道一般。今餐最好食都係呢碟和牛粒，仲要加上是日優惠價，味道同質素冇因為平左而hea整，所以呢道菜值得一試！冇咩特別既太卷