蘭英印尼小食 (已結業)

今日Mr.J帶我由樂富行落去九龍城搵食。由公園穿過九龍城廣場後，就見到對面有一間唔起眼，但不斷有人去買嘅小食店。原先想叫牛肉，但啱啱賣哂要等，所以今次叫咗1)花枝丸(2)黑椒牛丸(3)豬頸肉(4)雞肉所有都係要小辣。依間小店嘅沙嗲汁係稠身嘅，可以揀小辣大辣同唔辣。先講牛丸，一串有4粒，都只係13蚊。因為係有黑椒，會搶咗啲沙嗲味，我覺得比較適合濃口味人士。花枝丸亦都係13蚊4粒，依個我係超級推介。花枝丸一啖咬落去係外脆內軟嘅感覺，燒到熱辣辣，再加返小辣嘅沙嗲汁，只可以講係天衣無縫。（本身好喜歡食花枝丸)豬頸肉一串係薄薄的兩大塊，不錯的，唔係燒到太乾。雞肉燒得啱啱好，肉汁還在，加埋沙嗲汁好正。（Mr.J唔太喜歡雞，所以大部分都係我食哂)

既然去開九龍城買tong wong蛋糕，於是同朋友順路行多兩步，去左蘭英印尼小食店吃串燒~小店附近有條巷仔，放左3張小摺桌, 好有懷舊特色。我叫左一串豬頸肉! 店鋪老闆收到order，即叫即燒; 等左幾分鐘就有熱辣辣嘅豬頸肉食! 豬頸肉一串有四件, 燒得好香而且十分爽口，再加埋d沙爹汁，真系好味到停唔到口!!呢間小店最出色既就系老闆秘製嗰個沙爹醬，分小辣和大辣，我驚太辣，自己頂唔順，於是試住個小辣先….. 辣得黎之餘亦食到有細細粒既花生粒，好有口感，而且又香又濃，吃得好過癮...好spicy!!!! 下次去開九龍城既朋友一定要試下呢間既串燒小食。

昨晚食神嫂相約師傅晚飯, 講明話要食泰菜, 於是地點當然係揀左九龍城! 於是師傅離開監房, 就搭車黎左呢頭先, 由於食神夫婦二人都未到, 加上師傅有少少口痕, 就索性黎呢度吉番兩串! 師傅都好耐都冇黎過呢度食野, 所以都好鬼期待!去到食店即刻叫左一串花枝丸同一串豬頸肉! 花枝丸同豬頸肉都係即叫即燒; 等左幾分鐘熱辣辣嘅花枝丸同豬頸肉就有得食, 食之前加上辣汁, 是次竟然有少辣同大辣之分, 咁師傅當然係要左大辣啦; 豬頸肉一串有四件, 燒得好香而肉身十分爽口, 是次燒得十分乾身, 配上大辣嘅汁十分惹味, 正呀! 而花枝丸一串有四粒, 花枝丸大大粒, 入口十分爽口彈牙, 口感非常滿足, 大辣嘅汁真的非常辣, 但絕對惹味!總括黎講串燒真係非常出色, 環境真係一般, 價錢好抵食, 七蚊串花枝丸, 六蚊串豬頸肉, 記得仍是冇加到價! 是次師傅食完兩串後, 雖然意猶未盡, 但就十分滿足, 所以有機會一定會再黎, 而且一定會試珍寶腸, 因為真係大大條好吸引呀; 晚餐前整左個咁正嘅餐前小食,你話臉邊走得甩呀!