NN Coffee & Gin (裝修中)

今日嚟咗呢間係太古同鰂魚涌交界嘅cafe, 聽朋友介紹呢度有好girly嘅裝潢，好適合一班閨密嚟聚聚，於是決定嚟試下。同朋友分別叫咗兩個main，佢嘅係蟹肉南瓜牛油果手工意大利粉，口感濃稠，但南瓜味有清甜嘅感覺，蟹肉同牛油果都同個汁好夾；我嘅係香煎日本帶子黑松露手工意大利粉，帶子煎等香得嚟，入面嘅鮮味依然冇流失，肉質唔會乾爭爭，而黑松露汁都好濃厚，雖然兩個意粉望落好似好細碟，但都夠飽。即便如此，女仔點都要啲甜品去滿足下另一個胃，所以再叫咗個雜果法式西多士。藍莓同草莓都幾新鮮，西多士外脆內軟，已經被甜甜嘅糖漿包圍好，感覺幸福。嘢飲方面朋友叫咗Sour Sweet，係用English Breakfast Tea做嘅，有啲似檸檬茶嘅味道，但有滋潤嘅感覺。而我就試咗個Around The World，真係又飲得又睇得，用個小小皮箱裝住個藍色地球，突然好想去旅行呀！有汽嘅酒飲落竟然有啲creamy 嘅感覺，非常特別，強烈推介！！

Happy Friday梗係唔煮飯啦，同老公去左屋企對面新開既cafe食晚飯，約會一下。Cafe有有個吊千秋既座位可以坐係到影靚相，以粉紅色為主調，行少女路線，非常夢幻。我地叫左兩個主食、一杯特飲、一杯Cocktail，唔駛加一。蟹肉南瓜牛油果手工意大利粉上碟熱辣辣，蟹肉鮮甜，用肉眼都睇得出好creamy，意粉用上闊條麵，每個面積都沾滿醬汁，好食。香煎日本帶子黑松露手工意大利粉帶子大大粒，肉質軟滑，闊條麵充滿黑松露味，呢個都好好食。雜果法式西多士我都係要叫返個甜品黎食，賣相吸引，忌廉輕盈，略嫌西多士唔夠鬆軟濕潤同唔夠蛋香。Sour Sweet係茶既特飲，由English Breakfast Tea, Lemon, Elderflower整成，酸酸地，有種茶香，幾好飲。Around The World上碟嘩左一聲，由Gin, Caramel, Cauracao, Lemon, Soda Water整成，好似飲緊雲尼拿甘，甜甜的，有氣既雞尾酒，好易入口。