萬麗咖啡室

營業中

休息中

繼舊年以泰菜為主題後,見到呢次以西班牙做主題,經某個出名book飛網站以買一送一咁抵做決定一試,黎到六點十五分左右已經排隊,不過無上次咁多人,唔多唔少受到外遊影響掛?講返正題今次西班牙主題好過上次泰式,就算任食Joselito火腿已值回票價,其他風干肉腸,沙甸魚,醋漬鯷魚都無失手,係蕃茄凍湯酸咗啲外啫,熱葷同上次一樣比較遜色，首先西班牙烤乳豬太肥,脆皮同肉中間夾左好大陣肥膏,最差應該係西班牙燉飯,唔知係咪長期有射燈高溫照住關係,個飯好乾,而且d米粒係半生熟,香烤豬肉串好嚡又韌又無味,唔得,其他平時有供應嗰d蟹腳凍蝦沙律都係正常發揮,甜品方面又係試左以西班牙主題三款 /西班牙炸油條,同傳統一樣以肉桂味為主係硬左d👌/聖地牙哥杏仁蛋糕,唔知係咪食左炸油條太濃肉桂味關係,食唔出有杏仁味,就算飲左水𠺘左口都唔覺有杏仁味🤔/巴斯克芝士蛋糕,呢個最好食,藍莓醬桑子加士多啤梨同芝士蛋糕酸酸甜甜嘅完美結合，期待下次有乜特別主題

舊年就到訪過「萬麗咖啡室」，睇番啲食評，原來剛好一年前嘅事，當時就為通番關嚟食餐好嘅。今次見到餐廳由依家到4月尾做緊西班牙主題自助餐，西班牙一向都頗有特色，加上又做緊啲優惠，所以，同老友嚟嘆番吓。眨吓眼又一年，個環境當然無乜點變啦，柔和燈光加寬敞空間，依然予人感覺舒適，所以，整體感覺幾舒服。而食物區都喺二字左右排開，集中晌一個範圍，唔使左兜右轉，亦都比較方便。上文都講，今次自助餐以「西班牙」為主題，四周嘅牆上都貼有唔少西班牙嘅裝飾，而菜式方面就有唔少西班牙特色菜。星期一至四晚計，成人收$808，星期五至日及公眾假期成人收$848，另收10%服務費，晌官網網上商店預訂有75折優惠。如果想再食平啲，可以考慮自助午餐，同樣供應西班牙主題自助餐。冷盤先講講冷盤同沙律，就晌食物區嘅頭位，選擇夠多喎，唔喺一般嘅凍切肉腸、莎樂美腸。有好多款都喺主題菜式，包括西班牙蕃茄凍湯、數款西班牙醃肉腸、一款牛奶芝士及一款羊奶芝士、西班牙沙甸魚、醋漬鯷魚、西班牙蕃茄麵包、煙三文魚，仲有啲橄欖呀、酸瓜……等配料。Joselito西班牙火腿而一入門口就見到有侍肉師傅即場將西班牙火腿切片（限星期五、六先即場為客人切片）