El Cerdo (大壩街) (已結業)

今日同三位朋友book左枱試下呢間西班牙的餐廳，餐廳環境比較暗，坐環舒服，不過由於地方比較細，所以枱與枱間的距離好近，傾計相對地就要注意聲浪以免影響隔離枱餐廳八點前做飲品買一送一，本身飲品唔貴，所以呢個優惠非常低，加上唔會因爲優惠關係飲品會求其唔足料。除左西班牙炒飯外，其他的食物，你唔會見到好似美式餐廳咁，叫的食物都係大大碟。 反而全部都係一小碟的份量，就算人小小都可以叫多幾個唔同的食物試下。食物款式一張餐牌睇晒，選擇唔多，強烈推介一定要試黑毛豬火腿。

荃灣廣場對面有間El Cerdo，門面睇落唔平，不過細心睇過餐牌後價錢其實唔太貴，呢晚就去試試。其中一面牆上係一幅用反光物料砌成嘅巨型畫作，細心咁睇原來係隻黑毛豬圖案。連餐墊紙都印咗黑毛豬圖案，同埋列出唔同部位嘅西班牙文，似乎黑毛豬係佢哋嘅招牌菜之一。試咗Mojito，餐牌寫採用冧酒、鮮青檸汁、薄荷葉、糖同蘇打水調出嚟，酒味唔濃，對女仔或少飲酒嘅人嚟講比較易入口，薄荷葉同鮮青檸嘅配搭又夠清新。然後係份量的骰嘅tapas，先嚟嘅係炸黑毛豬火腿球。吉列皮炸得金黃香脆唔油膩，內層就係5J級黑毛豬火腿碎同軟白汁，口感creamy，似晌度食緊極之軟身嘅忌廉薯蓉咁，又有啲似中式嘅炸鮮奶，味道唔錯。脆皮豬腩肉配蜂蜜蛋黃醬，豬腩肉嘅豬皮、脂肪同豬肉層次分明，豬皮脆卜卜，豬肉鬆化唔癡牙。蜂蜜蛋黃醬就加咗蒜蓉，酸酸甜甜咁可以減去膩感。最後仲試埋傳統洋蔥薯仔西班牙奄列，用咗洋蔥、馬鈴薯同雞蛋等煎成厚身嘅圓形。煎得外層焦脆，切片馬鈴薯同洋蔥絲軟腍，最內層仍然濕潤唔乾身。感覺上食物質素幾好，以同類型餐廳嚟講定價唔貴，如果晌九龍或港島區應該要多三分一至雙倍價錢，CP值都幾高。