今期推介一個高CP值，環境美食都超班嘅好去處！
位於尖沙咀鬧市頂樓嘅“KABOOM”，儼如尖沙咀空中花園。餐廳酒吧佔地兩層，下層室內空間天花鋪滿長竹枝，配上石磚牆身、藤椅木枱、懸掛藤燈，好似置身純樸海邊酒吧咁。
落地玻璃可以飽覽維港靚景～坐喺藤椅攬住厚咕𠱸好chill。無論係食Lunch、Happy Hour定晚飯同朋友飲酒食飯都一流嘅all-in-one casual dining好地方呀！
頂樓天台外國Vibe
頂樓嘅戶外空間則放滿陽草傘、寬敞藤椅，配上芬蘭木材塑造滿滿外國氣氛，遠離繁囂。開揚環境更可欣賞維港海景，好啱閨蜜約會又或三五知己飲酒慢活。
估唔到戶外都咁涼爽好風，就算怕熱都唔使擔心。(落雨嘅話會“KABOOM”會裝上臨時露營帳篷，所以落雨都唔使擔心，而且依然好好vibe㗎! 好似真係去咗露營咁, 別有一番風味!)
酒店級主廚主理！東南亞風Fusion料理
呢度有酒店級主廚，設計一系列東南亞風fusion料理。一嚟到可以聽住輕快音樂望維港靚景，輕酌兩杯、食啲小食先。
【Small Bites for Sharing】
Menu有好多”Small Bites for Sharing”系列嘅佐酒小食，好似去咗Cocktail Party咁。
Chilli Salmon Cups | 辣味三文魚小杯
一啖一件嘅三文魚小杯，女生輕鬆食得有儀態啊。酥脆撻皮入面就有三文魚粒粒、香辣醬、紅蔥頭同清新青檸，輕辣風味同三文魚好夾。
Deep Sea Tacos | 深海墨西哥夾餅
脆脆粟米餅皮包住彈牙鮮蝦、清爽生菜、酸甜醃洋蔥等，加埋特製泰式醬汁，每啖都有豐富層次同口感。
Red Prawn and Scallop Carpaccio | 紅蝦帆立貝生魚片
好精緻嘅海鮮前菜，北海道帆立貝、紅蝦真係雙倍鮮味呀!! 配以特製泰式冬蔭醬，辣中帶酸更突出海鮮鮮味。
Yum Som-O Cajun Prawns Salad | 泰式鮮蝦柚子卡真大蝦沙律
唔想食太清淡嘅沙律，咁你一定要試呢個新推出嘅大蝦沙律！大廚將泰式沙律灑滿美國紐奧良地區嘅特有香料Cajun，有種獨特微辣。每隻大蝦都好彈牙，又有啲輕甜柚子平衡吓幾好食。
【Main】
“KABOOM”亦有多款主菜，絕對可以飲酒食嘢直落啊。
Baked Sambal Sous Vide Black Cod Fish | 叄巴醬烤真空低溫慢煮黑鱈魚
真空低溫煮法會令黑鱈魚產生美拉德反應(Maillard Reaction)，令魚肉有種複雜嘅香氣味道。本身魚油之上加埋微辣鹹香嘅叄巴醬、綿滑乳酪勁開胃，就算平時好少食魚都會愛上!!
Grilled Spanish Octopus Thick Egg Noodle with Pad Thai Crab Sauce | 燒西班牙八爪魚粗蛋麵配泰式蟹醬
完美融合地中海、東南亞風味嘅創意料理。主角西班牙八爪魚好大件，燒到又嫩又彈牙。湯底仲加咗香濃嘅泰式Pad Thai蟹醬，再用油浸大蒜、泰國羅勒、青胡椒粒等撞出層次，濃味控必食！
Thai Crispy Pata | 泰式脆皮豬手
德國鹹豬手就聽得多，大家有冇食過泰式豬手呢？ 餐廳用咗超大隻泰式豬手，外皮烤到金黃酥脆，飲啤酒必食!! 好鍾意佢配菜好多，醃蘿蔔、蘿蔔、西蘭花等……可以肉同肉之間解吓膩，啱晒一班人share。
Tom Yum Coconut Risotto with Hokkaido Scallops and Sea Urchin | 冬蔭椰子燉飯 配北海道帆立貝及海膽
泰國經典冬蔭風味x意大利燉飯，秋冬食真係好滿足。濃郁冬蔭醬同椰奶做基底，燉煮出酸辣飽滿飯粒，加埋北海道帆立貝、海膽好豐富。
【專業調酒師 | 即場調製合適你心情嘅專屬雞尾酒】
Damn Pissed Off!
充滿活力嘅雞尾酒，完美結合伏特加、熱情果醬同菠蘿汁，帶嚟清新嘅熱帶風味。呢款雞尾酒特點在於佢嘅生薑風味，有種獨特嘅辛辣感。
I Feel Loved
我談的那場戀愛...就像這杯Cocktail，集合了威士忌和荔枝酒，帶有玫瑰菊花甜香又清新，加點點酸酸的橙汁，甜的苦的酸的混合在一起，“This is exactly what it tastes like to be in love!”
I Need To Clear My Mind!
青檸Vodka加咗苦瓜糖漿，呢種獨特風味真係無咩試過，仲有種清新醒神感覺。當然仲有柚子汁、金桔汁、青蘋果糖漿，增添酸爽果香。
Lets Get Cracking
呢款奢華雞尾酒，以伯爵茶威士忌結合朱古力Liqueur，帶嚟濃郁香味，同時夾雜阿華田、焦糖、燕麥奶嘅輕甜味道。相信女生都會好鍾意呢款雞尾酒
KABOOM
地址: 尖沙咀北京道12A號太子集團中心20樓
電話: 37088114