平時哄小朋友食魚真係難過登天，仲要自己落手慢慢起骨先得...點攪? 梗係食烤魚啦! 好消息，小魚兒已登陸將軍澳, 而家去尖沙咀店食得，去將軍澳店又得! 呢度嘅烤魚用原條游水魚入饌，大廚事先起走整條龍骨，食嘅時候就更方便。烤魚有海鱸魚、江團魚同凌波魚揀，當中凌波魚最高人氣，因為全無泥腥味，肉質嫩滑肥美，魚油重夠晒香。
【唔辣之選】黃金特濃蒜香豆花
唔辣嘅烤魚就推薦「黃金特濃蒜香豆花」，湯底唔只得蒜頭，仲有用12隻雞熬製10小時濃雞湯，就算唔辣都好香濃，用嚟配牛肉更突出肉味呀。呢個烤魚口味就揀咗配江團魚，含豐富膠原蛋白之餘，肉質都好肥美，好啱女生食㗎！
【激罕魚春烤魚】巫山麻辣魚春魚卜豆花
想食辣嘅就一定要上「巫山麻辣魚春魚卜豆花」，因為有坊間少見嘅黃花魚春。少見原因係本來魚春就少有，每條魚得一件，仲要唔係每條魚都有，所以特地叫街市魚檔預留先有㗎！原件魚春腍身吸湯，咬開爆湯又有少許卜卜口感，夾辣湯食相當過癮，鍾意嘅話亦可額外追加「黃花魚春」㗎。
【足足6隻鮑魚】極品鮑魚雞煲
除咗烤魚外，仲有多款雞煲。鍾意辣嘅可揀「重慶雞煲」有4種辣度、3種麻度揀；唔辣嘅就有超豐富「極品鮑魚雞煲」，有$258半隻雞+4隻鮑魚 或 $468原隻雞+6隻鮑魚選擇。個人覺得原隻雞最抵食，雞肉多仲有咁多隻鮑魚，兩個人加個小朋友可能齋食呢個煲都飽。所有雞煲都選用穗香雞，以特別飼料飼養，雞肉細膩爽滑，雞骨仲有獨特清香人參味，色香味俱全，用嚟煮雞煲一流。
多款BBQ燒烤 好啱開心Share
將軍澳咁多一家大細落街食飯，所以分店特別引入更多BBQ燒烤，「蒜蓉牛油烤鮑魚」、「鹽燒鵪鶉蛋」等都係將軍澳店限定，嚟緊仲會依據街坊口味引入更多燒物。
將軍澳店限定「蒜蓉牛油烤鮑魚」。
將軍澳店限定「鹽燒鵪鶉蛋」好香口。
人氣推薦「醬燒牛仔骨」。
【將軍澳店限定優惠】食燒生蠔慳$60！
限定優惠「半打燒生蠔」$108！計返原價要$28/1隻……即係本身$168先有半打，而家$108就食到足足平咗$60呀。燒生蠔分別有香蒜、四川麻辣2款口味，或想2款口味各半都得。
限定優惠「半打燒生蠔」$108，可合拼香蒜、四川麻辣2款口味。
【懶人恩物】外賣烤魚．雞煲超方便！
如果想喺屋企食烤魚、雞煲，外賣可提供火酒膏同燒烤架，點火就食得絕對係懶人恩物。
小魚兒 (尖沙咀店)
地址: 尖沙咀金馬倫道16號金馬大廈1樓
電話: 23282122
小魚兒 (將軍澳店)
地址: 將軍澳毓雅里7號富麗花園地下3-5號舖
電話: 55194897
