大家已經一年無去旅行喇，開始習慣喺香港搵地方玩同食，發覺原來我哋嘅家有咁多好地方，特別係大嶼山原來個景係咁靚，好值得我哋珍惜㗎！隨住上個月屯赤隧道開通，吸引唔少駕駛人士行吓新路遊車河，一場嚟到當然要食餐好先玩得暢快啦！
經屯赤隧道由屯門去機場約15分鐘，可以途經東涌同大嶼山郊遊。趁而家機場附近車流暢通，郊遊前後仲可以去亞洲國際博覽館食餐中式Fine Dining。咦？西式Fine Dining 就聽得多，原來中式Fine Dining 又係另一番別致。
主打高級中式Fine Dining 澐．NUVA，位於亞洲國際博覽館二樓。
無論西式定中式，稱得上Fine Dining 當然有靚景。 澐．NUVA 全店以落地玻璃映照大海，望出去海天一色令人份外寫意。「澐」一字亦係依據《說文解字．水部》中提到「澐，江水大波謂之澐」而命名，坐於「澐」中欣賞如波浪般輕盈多變嘅雲，又係另一番意境。
全店都有落地玻璃映照大海景。
澐．NUVA將行雲流水融入環境中，亦會定期同各藝術團體合作，透過藝術平靜心境享受一餐中式Fine Dining。
巧遇好天氣，仲可以欣賞水天一色美景。
典雅藝術環境 一嚐中式Fine Dining
如此典雅嘅藝術氣氛，好啱情侶或同家人慢慢享受，特別係店家主打多款經典廣東菜，坊間已少見嘅手工菜「金錢雞」；嚴選五層肉炸成外脆內軟嘅「趣脆咕嚕肉」；以炭火上碟嘅黑毛豬叉燒「招牌蜜汁叉燒皇」都有。
冬日時節要暖笠笠，兼一試大廚手藝，可揀限定5款重量級煲仔飯。呢度嘅餐飲團隊主管同行政總廚均獲法國國際美食協會認證，佢哋限定設計嘅煲仔飯令人好期待呀！
即叫即做煲仔飯 堂食／外賣都得
全部煲仔飯都係即叫即做，唔係每間餐廳都願意花上咁多時間心血，將飯心煮至軟熟、金黃色飯焦厚薄恰到好處，可原塊刮起食到乾爽甘香，全賴師傅控制火喉功架。食客想慳啲時間可以預先訂座落單。揸車人士都可出車前打嚟落單，嚟到就即刻有得食啦！
鮑魚香菇肉餅煲仔飯
一打開就見到4大隻原隻鮑魚，厚肉腍滑，忍唔住飯都未食就咬一啖鮑魚先。同煮嘅肉餅亦無淪為配角，嚴選半肥瘦新鮮豬肉口感一流，配埋蝦膠、香菇、蠔油等調味，彈牙唔嚡口。
鮑魚香菇肉餅煲仔飯
鮑魚大隻厚肉。
自家製煲仔飯豉油 畫龍點睛
特別一提，煲仔飯精髓之一嘅就係豉油。呢度嘅豉油係自家調製，師傅每日以蔬菜、莞荽、香蔥等材料新鮮熬製野菜水，再以特調比例混合頭柚、冰糖等調味，絕無豬油。完全平衡到鮮味同健康，確有畫龍點睛之效。
自家特調嘅煲仔飯豉油，健康又提鮮。
章魚雞粒膶腸煲仔飯
師傅巧妙地選用較鮮甜嘅泰國章魚，以突出三黃雞鮮嫩肉味。加埋本地生曬膶腸，天然原味輕油香，連埋雞油滲入飯粒，唔會油膩之餘亦提升米香，鹹香嘅油飯冬天食啱晒！
章魚雞粒膶腸煲仔飯
油鴨香菇雞煲仔飯
講到煲仔飯，不得不提經典嘅「油鴨香菇雞煲仔飯」。油鴨係精選去骨油鴨髀，皮香肉厚，難得油髀都可以食到啖啖肉。雞肉同樣用三黃雞，個人覺得鍾意肉感嘅可揀呢款；鍾意油香輕盈啲嘅可揀章魚雞粒膶腸嗰款。
油鴨香菇雞煲仔飯
三黃雞骨細味濃，口感比其他雞種特別，所以好多人都格外鍾意。
臘腸排骨煲仔飯
經典港式煲仔飯風味，用上本地生曬臘腸，油香甘醇，配飯一流超開胃，哄小朋友食飯就最啱喇！排骨就係選用腩排，有肉有骨，肉質夠腍、脂肪分佈平均，骨邊肉仲特別香。
臘腸排骨煲仔飯
本地生曬臘腸，有香醇風味。
野菌鴨肝煲仔飯
唯一一款中西Fusion 煲仔飯，以肥嫩濃郁嘅法國鴨肝突出飯香，可以話係巧妙地用另一種鹹香代替臘腸，味道同樣甘香但多咗一種Creamy 口感。配合多款菌類如鮮冬菇、靈芝菇、本菇等，解膩並營造多重咬口，令成個煲仔飯香而不膩。
野菌鴨肝煲仔飯
特別選用法國鴨肝，香醇Creamy。
農曆新年期間限定 只限外賣
喜氣洋洋嘅2月，澐．NUVA亦推出新年限定八寶鴨套餐同盆菜，提提你記得早3日預訂喔！
八寶鴨套餐
有「佳節歡聚八寶鴨 配原隻鮑魚、原粒瑤柱甫套餐」同「佳節歡聚八寶鴨 配風生水起鮑魚海蜇絲、蟹肉燴伊麵套餐」兩款揀。八寶鴨用足3斤去骨全鴨，再放滿超過八寶材料，如蓮子、栗子、咸蛋黃、冬菇、梅肉粒、金華火腿、馬蹄粒、羊肚菌、蓮藕等，味道口感豐富又好意頭。
梅肉粒更係選用西班牙黑毛豬，肉質鬆化有油香；羊肚菌更少見於一般八寶鴨，因為身價名貴被譽為「菌中之王」，鮮味富營養，可一解油膩；而蓮藕同馬蹄粒都係一般八寶鴨無，師傅則覺得其清新爽脆口感好夾鴨肉、糯米，食落有驚喜。
佳節歡聚八寶鴨 配原隻鮑魚、原粒瑤柱甫套餐 HK$1,388
佳節歡聚八寶鴨 配風生水起鮑魚海蜇絲、蟹肉燴伊麵套餐 HK$1,328
新春盆菜 集合多款手工菜
暖笠笠盆菜則提供6人份或12人份揀，需要3日前預訂。精選16款食材炮製，用上蠔皇扣原隻鮑魚、豉油皇特大虎蝦、自家燒製柱候腩仔、新鮮手打鯪魚球、香滑貴妃雞等，集合咗多款手工菜㗎！
此外，仲有星級食材花膠、海參。花膠爽口彈牙，每啖都係滿滿骨膠原；另外工序繁複嘅特選南美海參，處理至熬製時間需時一星期，營養價值高，特別滋補養顏。
最後配埋生財菜膽、脆炸支竹同秘製鮑魚汁，盆菜味道可謂提升至另一層次呀。
澐．NUVA
供應日期：即日至2021年2月28日 (年初一至年初三休息)
地址: 大嶼山 香港國際機場 亞洲國際博覽館2樓
電話: 3606 8818