中環一向係異國風情匯聚地，最近呢間全新餐廳“PASTEAKO”都成為中環美食一員，主打手工意粉同牛扒，而店名“PASTEAKO”正正結合佢哋嘅招牌菜—Pasta同Steak。呢度嘅手工意粉有香港罕見口味，更可自由配搭意粉款同醬汁。晚餐時段每30分鐘，仲會人手搖鐘免費添意粉，用餐感覺好特別。
餐館裝潢宛如黑手黨電影《教父》氛圍，牆身掛滿年代感黑白相，加埋復古紅白地磚、酒紅皮感梳化、昏黃燈光好好feel～一坐低仲有一系列鋸扒刀畀你揀，浸沉式扒房體驗，好似瞬間穿梭到50年代嘅西方國度咁啊。
【$188三道菜午市套餐】自由配搭意粉+醬汁+肉食
中環竟然可以$200內嘆到三道菜lunch set？冇錯！呢度嘅午市套餐只要$188就食到意粉、肉食同埋甜品，性價比激高!! 手工意粉專門店“PASTEAKO”對意粉出品好高要求，供應多達10款意粉種類，所有款式由麵糰到塑型都係全人手新鮮製作，口感同味道都係獨一無二㗎！
意粉組合不敗推薦～
客人可以喺5款意粉款式中自選心水形狀，分別有螺絲粉(Fussili)、馬鈴薯麵糰(Gnocchi)、有機長通粉(Organic Penne)、扁意粉(Linguini)同埋粗管麵(Rigatoni)。款款意粉都煙煙韌韌，想掛汁又得；方便大大啖食都無問題㗎。
除咗意粉，醬汁一樣可以自由配搭，有經典番茄醬(Promodoro)、蒜味橄欖油(Aglio E Olio)、青醬(Pesto)、蘑菇醬(Funghi)、香辣番茄醬(Spicy Arrabbiata)，變化豐富。
青醬 x 螺絲粉(Pesto Fussili)
意大利螺絲粉嘅旋轉扭紋可以掛滿醬汁，鍾意多醬嘅話必試啊。而青醬加咗蒜香、松子同埋羅勒葉，味道清新仲帶少少青草氣息𠻹～
蒜味橄欖 x 有機長通粉(Aglio E Olio Organic Penne)
如果鍾意食意粉嘅原始麥香，可以揀蒜味橄欖油口味。以淡淡蒜香配合健康橄欖油，整體唔會太膩。
番茄醬 x 粗管麵(Promodoro Rigatoni)
意粉配番茄醬可以話係萬年不敗嘅組合，粗管麵更可以兜住多啲醬汁，揀酸酸甜甜嘅番茄醬真係好perfect！
香辣番茄醬 x 扁意粉(Spicy Arrabbiata Linguini)
身邊總有啲朋友係無辣不歡，呢度一樣有辣味揀㗎。經典醬汁一般係由果肉飽滿嘅聖馬札諾番茄、香蒜、紅辣椒乾製成，“PASTEAKO”更加咗少少花椒帶出椒麻刺激感。每一條扁意粉嘅表面都掛滿香辣酸甜醬汁，超級惹味!!!
蘑菇醬 x 馬鈴薯麵糰(Funghi Gnocchi)
薯仔做嘅圓碌碌麵糰，由煮熟並壓碎嘅薯仔混合麵粉、雞蛋等製成，口感同其他意粉好唔同。黏稠柔軟又好有咬口，食完好有滿腹感。
睇埋午市肉類 & 甜品～
午市套餐嘅肉類2選1，分別有牛扒同雞胸。牛扒係前腰脊肉位，肉質緊緻兼牛味濃郁；雞胸就香烤過幾惹味，而且雞肉軟嫩唔會太乾。最後食埋甜品Lemon Panna Cotta，絕對係超級滿足嘅組合啊～
【$388晚市套餐】每30分鐘人手搖鐘免費加意粉
“PASTEAKO”晚市套餐都好抵食，同樣可以自由配搭意粉款式+醬汁，仲有埋21日乾式熟成牛扒食。留意返，有啲獨特意粉口味係晚市先有，好值得夜晚嚟㗎。
最特別係晚市限定人手搖鐘環節!! 每30分鐘員工就會響鐘，提示免費加意粉時間又到喇～真係好有歐洲classic小酒館氣氛，就算食飽唔使再添食都好期待響鐘嗰刻啊。
晚市獨特意粉口味～
晚餐時段供應嘅5款意粉—寬蛋麵(Parpadelle)、意大利粉(Spaghetti)、貝殼粉(Conchiglie)、短管麵(Mezzi Rigatoni)、蝸牛粉(Lumache)。
另有6款醬汁自行組合—松露醬(Truffle)、四款芝士醬(Quattro formaggi)、羅曼斯可醬(Romesco)、鯷魚番茄醬(Puttanesca)、番茄醬(Promodoro)、香辣番茄醬(Spicy Arrabbiata)。
人氣組口推介～
鯷魚番茄醬 x 意大利粉(Puttanesca Spaghetti)
成日食嘅細圓意大利麵條最百搭，同各款醬料都好夾。私心推薦晚市限定鯷魚番茄醬，以番茄、橄欖、鯷魚、酸豆同蒜煮製，係意大利經典之一!! 入口酸甜帶微辛口，味道幾特別。
松露醬 x 貝殼粉(Truffle Conchiglie)
貝殼狀好啱填餡掛醬，適合配搭濃厚松露醬。好似將松露香氣濃縮喺貝殼粉入面咁，做到齒頰留香效果。
四款芝士醬蝸牛粉(Quattro formaggi Lumache)
坊間好少食到蝸牛粉，其實呢款呈螺旋形嘅短麵條，因賣相酷似蝸牛殼而得名。旋蝸形狀好啱配濃稠醬汁，呢款混合四款芝士嘅醬汁超鹹香，芝士迷一定鍾意！
【21日乾式熟成牛扒】牛扒界天花板
另一焦點就係Dry-Aged牛扒喇！呢度供應肉眼同牛肉前腰脊部位，牛肉經過21日乾式熟成後，天然酵素會自行分解牛肉蛋白質、脂肪、碳水化合物，牛味同油花都更濃郁豐腴㗎。
PASTEAKO
地址: 中環鴨巴甸街35號元創方B座Hollywood地下HG01-HG05號舖
Facebook: https://rb.gy/v5gn44
Instagram: @pasteako