旺角天台酒吧餐廳“Reflect”位於12樓頂層，一出𨋢就有個靚靚鏡面牆呼應店名Reflect(反射)。呢度由10年經驗墨西哥大廚主理，創作多款party vibe又精緻嘅墨西哥菜，最近仲新推出抵食2人套餐，$688可以由餐湯食到落主菜同肉食，包保滿腹而歸!!!
戶外位大到可以包場開party或舉辦輕婚禮，仲有好多梳化位坐得舒服。難得旺角有個咁開揚天台同朋友邊飲cocktail、邊食墨西哥菜啊。
墨式粟米餅湯Tortilla Soup ($68)
惹味開胃前菜由呢道酸酸辣辣嘅番茄湯展開，飲落質感好rich，加埋脆卜卜嘅粟米片有雙重層次。
【墨西哥粟米片多重食法】
焗玉米片Nachos ($128)
墨西哥菜嘅靈魂食材—粟米餅，煮法千變萬化。最為人熟悉一定係Nachos喇～粟米片焗到脆卜卜，再加上傑克同車打芝士，兩款唔同鹹香嘅芝士撞出層次感。記住每啖都蘸齊碎牛肉、牛油果蓉同番茄啊，夾埋一齊食勁豐富(仲好邪惡𠻹!!!)，同朋友叫一份開心share就正喇～
雞肉芝士餡餅Quesadilla ($128)
而Quesadilla就係粟米餅夾餡而成，軟身又帶咬口。內餡塞滿芝士同雞肉(另有蔥+牛肉餡選擇)，加埋酸酸甜甜莎莎醬+牛油果醬，餡醬綿密好有幸福感，仲有啲外酥內嫩口感㗎。
雞肉脆皮玉米餅Chicken Tacos ($188)
鍾意脆脆粟米餅嘅話，可以揀Tacos。每份大約手掌咁大，超脆粟米餅包住滿瀉嘅餡料好吸引。而且啱啱好可以一啖食到，唔怕食到好狠狽，用嚟送酒都一流㗎。內餡選擇有雞肉、蘑菇、牛肉，一班人仲可以叫「夾餅派對」食勻三款味𠻹～
辣雞肉餡餅Chicken Enchilada ($198)
地道墨西哥料理Enchilada就最大份量!! 賣相同手拎粟米餅唔同，反而將幾份捲餅包住雞/牛肉餡料、牛油果醬、莎莎醬，最後淋上酸忌廉醬。一刀切開見到滿滿雞肉，有種食緊升級版千層意粉嘅感覺。
雞肉墨西哥烤肉Chicken Fajitas ($208)
仲有仲有，就算想自己包捲餅都得㗎!! Fajitas系列嘅醬汁、粟米餅同雞肉內餡會分開上枱，自己想夾幾多餡、幾多醬都得，用餐體驗十足。烤肉仲係用鑄鐵鑊熱辣辣上，香噴噴出晒煙，睇見都流晒口水啊！
香辣肉醬配玉米餅Chili Con Carne ($168)
粟米餅嘅配搭真係多到你唔信，簡單啲配香辣肉醬、酸忌廉都好好食!! 肉醬係用墨西哥香草燉牛肉煮製，直接用脆粟米片舀滿肉醬，好快就成碟清晒啦！
【2人套餐】墨西哥x西式fusion
選擇困難症嘅話，索性揀2人套餐只係$688咋。主廚特別設計墨西哥x西式fusion菜式，由餐湯、主食(5選1)、肉食(3選1)到飲品都安排好晒啦。
主食推介 | Scallop Linguine (+$40)
主食5選1之一嘅帶子扁意粉，海膽汁夠濃郁做到掛汁效果，配埋帶子雙重鮮味勁吸引。
肉食推介 | Pork Loin Chop
肉食3選1就有加拿大保濕豬鞍，出名軟嫩濕潤。食之前用刀一切到底嘅手感就知幾嫩喇。食落豬味濃零羶味，配埋烤焗甜薯、特色阿根廷香草醬，有種溫軟甜蜜感覺，約會晚餐必食。
【其他高質菜式推介】
除咗一系列墨西哥粟米片同2人套餐外，呢度仲有好多嘢食㗎～
好似呢道美國斧頭扒足足1.5kg-1.8kg，好鍾意上枱嗰陣已經切好晒，見到入面仲係好粉嫩，飲吓酒又拮件牛扒食幾爽。
薄餅 | Seafood Pizza
自家製墨西哥辣椒醬，就係呢個薄餅嘅靈魂！辛辣濃郁，新鮮海鮮都唔少㗎，食到啖啖八爪魚、蜆肉等，嗰種彈牙口感同一般雪藏海鮮完全唔同。
分享 | Beef Tartare
“Reflect”亦有好多佐酒小食，好似cocktail party常見嘅牛肉他他。拎起脆脆法包放上精製牛肉他他、巴馬臣芝士又脆又軟綿綿，就算女仔直接用手拎起食都好優雅。
甜品 | Chocolate Tart
呢度嘅自家製甜品即叫即製，好似呢款流心朱古力撻上枱嗰陣仲好熱㗎。切開流出濃濃朱古力漿好有儀式感，配埋士多啤梨雪糕解膩啱啱好。
甜品 | Apple Crumble Tart
另一款自家製甜品就有蘋果金寶撻，香甜蘋果肉同脆脆已經有雙重口感，今次放埋入撻皮仲多咗種鬆脆感好正。
【旺角飲酒熱點】自家品牌希臘紅/白酒
“Reflect”有個大天台坐得舒服，真係未試過望住旺角夜空飲酒呀。佢哋仲推出希臘提子釀造嘅3款紅/白酒，酒身比較dry並富獨特提子香。
好啱配主菜飲，唔會遮咗牛扒、海鮮味，又可以平衡整體口感，可以提升成個用餐體驗。
飲酒食生蠔優惠！
凡惠顧任何酒類1支，即享$48/6隻生蠔 |
法國生蠔新鮮肥美，好夾乾爽嘅“Reflect”希臘提子釀造白酒。
一班人share可以嗌芝士火腿拼盤，有康提芝士、意大利巴馬火腿、黑胡椒腸。
除咗紅/白酒、啤酒外，駐場調酒師設計咗多款IGable雞尾酒。好似泡泡煙嘅Fruity Garden(水果花園)、超夢幻還原阿拉丁神燈嘅Aladin(阿拉丁)都好驚喜。
Fruity Garden(水果花園)好唯美，一戳開透明泡泡即彌漫仙氣，一定要準備影story呀。Fruity Garden有多種口味選擇—士多啤梨／黑莓／芒果，再混合伏特加、橙、菠蘿、桃子調製。
Aladin(阿拉丁)
完美還原阿拉丁神燈，入面係Rum、椰子、菠蘿、柑橘調配嘅神秘藍色酒，斟酒嗰刻好夢幻!!
Pirates Daily(海盜日常)
電影世界中，海盜都會豪邁拎住木桶大啖大啖飲酒，而家都可以試吓呢種暢快感覺喇。木桶杯入面係Dark Rum、花生、堅果、奶油、柑橘調配雞尾酒，獨特果仁味幾驚喜。
Xipe Totec
充滿神秘氣氛嘅Xipe Totec，以杜松子酒、茉莉花茶、梨、薑組成，完美結合柔和香辛味道。
Espíritu
好少見用Espresso咖啡整嘅雞尾酒，仲係撞上Jack Daniels威士忌、橙汁、菠蘿汁。強烈威士忌酒味中，隱約滲出咖啡味幾驚喜。
REFLECT Restaurant & Bar
地址: 旺角西洋菜南街74-84號旺角城市中心12樓
電話: 94029697