而家放假都想遠離市區呼吸吓新鮮空氣，大嶼山東涌當然係人氣地點，背山面海又有Outlet，郊遊完去行個街幾爽！但原來東涌仲有個新玩法～就係去12月1日新開幕嘅5星級酒店Sheraton (香港東涌世茂喜來登酒店)，酒店入面有4間高質餐廳齊晒自助餐、西餐、中菜同High Tea，郊遊完嚟食嘢Chill 吓又得；索性嚟Staycation 玩兩日一夜，食飽返房望吓海景放鬆又得。
外國浪漫風Sunset Grill 戶外座位遠眺機場靚景
每間餐廳都由經驗大廚主理，好多菜式都用心創作。鍾意精緻西餐嘅話，就有呢間Sunset Grill。餐廳喺Sheraton酒店19/F，由外藉大廚David Parkin主理，全店落地玻璃對正海景，裝修好型格西餐feel，喺度食飯真係有種去左外國嘅感覺。同場仲有戶外座位，遠眺機場靚景，如果嚟Staycation 嘅話，就算唔喺呢度晚餐，夜晚都一定要嚟呢度飲杯酒Chill吓。
餐廳氣氛走外國風，有駐場Bartender 調製各款Cocktail。
VIP房隱私度高，超長枱設計貫徹外國餐桌傳統。
炭燒矜貴Porterhouse Steak
大廚引入多款外國料理，個人覺得想測試一間西餐廳食材靚唔靚，食牛扒就試到真章。因為靚牛扒調味簡單，更食得出牛扒本身嘅軟嫩肉質＋Juicy肉汁。呢度就有滿足牛控幾個願望嘅Porterhouse Steak，點解咁講？因為Porterhouse Steak 中間有大T骨，T骨兩邊分別係西冷同牛柳，一次過食到肉味濃嘅西冷同軟腍嘅牛柳。
牛柳位夠大先稱得上Porterhouse Steak，肉價特別矜貴。
店內特設大炭烤爐，用均勻火力鎖住肉汁，並帶天然炭香味。除此之外，餐廳仲供應乾式熟成牛扒，令牛肉本身天然嘅風味更加突出，呢樣野唔係經常食到嫁。
外國料理 煙燻有機走地雞
除咗牛扒外，呢度亦有外國料理常見嘅原隻烤雞。呢度係用有機走地雞，即係用有機天然殼物飼養之餘，亦以放養方式畀雞隻四處走動，肌肉更多咬落自然更彈牙。大廚特別用香草煙燻全雞，慢烤令雞肉Keep 到軟嫩唔嚡口，食落會慢慢滲出一種獨特煙燻香。
大廚用天然香草煙燻全雞。
慢烤Keep到雞肉Juicy，食落又有獨特煙燻香。
青口煮意大利珍珠麵 獨特彈牙口感
海鮮類則推薦呢道青口及鑽石蜆配珍珠麵。高質貝類輕輕一煮已經夠鮮甜，配上古老時代已出現嘅意大利麵—珍珠麵，令精華更易滲入粒粒麵之間，有咬勁之餘仲有種獨特彈牙口感，唔少外國人都會用嚟煮燉飯或海鮮湯㗎！
煮製青口時加入白酒更香。
驟眼睇以為係意大利飯，其實係有特別口感嘅珍珠麵。
少女心爆發 焗朱古力夾心棉花糖
甜品同樣係外國Size，相當夠份量。呢道焗朱古力夾心棉花糖好有少女心，棉花糖表層焗至微焦微脆，內餡軟綿綿加埋濃郁朱古力醬，好啱情侶閨蜜影相同Share。
𢳂開內餡，即Feel到軟綿綿質感。
全城急CALL 爆正自助餐Cafe Lantau
嚟五星酒店當然會想食自助餐，呢度有主打Buffet 嘅Cafe Lantau。環境同樣走外國風，但對比Sunset Grill 有種更簡約輕鬆嘅感覺。最欣賞呢度每張枱之間距離寬敞，進餐傾計更有隱私感；走道空間同自助餐區都好闊，行出行入拎嘢食都唔會撞嚟撞去，成個用餐過程都好舒服，好啱家庭客帶埋小朋友食自助餐。
設計簡約輕鬆，三五知己仲可以揀高凳位邊食邊飲吓酒。
座位距離寬敞，行出行入都好方便。
超豐富冰鎮海鮮 多個Live Station 即煮料理
自助餐必食嘅生蠔、龍蝦、蟹腳、扇貝等冰鎮海鮮都有齊之餘，同場仲有好多Live Station 如即製芝士意大利飯、和牛串燒、法式可麗餅等，食落新鮮滾熱辣特別好味。
冰鎮海鮮有齊生蠔、龍蝦、蟹腳、扇貝等。
超巨巴馬臣芝士 即撈白蘭地蘑菇意大利飯
先贏個氣勢嘅超巨巴馬臣芝士即撈意大利飯，單睇咁大個芝士已經極吸引！倒入白蘭地蘑菇意大利飯邊撈邊聞到芝士香～Creamy 意大利飯嘅濃郁芝士味夾雜菌香，後續又有淡淡白蘭地酒解膩啱啱好，邊個話食Buffet 揀飯類會蝕㗎？
邊撈邊聞到芝士香，愈等愈想食。
拉絲芝士包住Creamy 意大利飯。
即燒串燒 無限食Akaushi和牛
串燒Live Station 離遠已聞到好香！因為呢度唔係用普通牛肉，而係日本產美國和牛Akaushi，係日本熊本赤色和牛牛種，佈滿豐富大理石花紋，食落充滿油脂香，厚切方法亦保留到和牛口感。
即燒串燒勁有火喉。
厚切方法，食到油脂香又有咬口。
脆卜卜原隻燒豬 + 招牌擔擔麵
平時可以有成隻燒豬食嘅機會唔多，呢度就有原隻燒豬，外皮炸得超脆。而麵檔有多款麵類選擇，魚蛋、牛丸、牛腩等配料輪流上場。必食即煮擔擔麵，麵質夠滑又掛湯，湯底夠濃郁同花生香，係我個人好鍾意嘅擔擔麵湯底。大廚私心建議一定要落兩滴花椒油吊味，微辣味道最有擔擔麵神髓。
麵檔有多款麵類、配料選擇。
擔擔麵湯底夠濃郁同花生香。
自家製蛋糕 甜品師即製可麗餅
甜品方面除咗有一系列自家製蛋糕甜點外，亦有Live Station 即製法式可麗餅。甜品師喺新鮮即製嘅可麗餅上，淋上橙酒同焦糖煮至可麗餅完全吸收軟綿，味道酸酸甜甜。
有多款自家製蛋糕同甜點。
甜品師即製法式可麗餅。
放上新鮮水果點綴就食得喇～
多款獨創菜式 設露台房中菜廳YUE
酒店內仲有高質中菜YUE，環境走雅緻風格，一家大細或宴客都好啱。中菜由多年私房菜經驗鍾志強師傅主理，師傅擅於將傳統中菜加入新元素，獨創菜式衝撃味蕾～
環境典雅，好啱宴請親朋。
餐廳內設多間VIP房，當中仲有露台海景房，可以舉行簡單婚禮。
盡顯刀功 自創獨一無二豆腐花
呢道薑味繡球就係師傅自創菜式之一，一改以往豆腐花嘅呈現方式，利用刀功將豆腐切至極薄成繡球花，再倒入薑汁、灑上黃糖。味道明明係傳統豆腐花，口感卻細膩融化。
師傅親展刀功，將豆腐切成花。
倒入薑汁黃糖，變成新穎豆腐花。
大吉大利 柚子蝦餃
中菜廳仲有多款點心、小菜，點心方面就有可愛桔仔造型—柚子蝦餃，外皮以橙汁製成；內餡則用柚子肉、柚子皮同柚子蜜等混入蝦肉，入口有種柚子清甜微澀味，相當特別。
蝦餃有柚子嘅清甜微澀味。
雙重口感 花雕蛋白蒸龍蝦球
中菜擅於演繹龍蝦，師傅今次就以蛋白突顯龍蝦肉嘅嫩滑。將龍蝦肉、花雕酒撞入蛋白蒸熟，再鋪上其餘龍蝦肉同魚子醬，一啖滑溜龍蝦汁蛋白；一啖彈牙龍蝦肉輪流食最正。
滑溜蛋白加埋龍蝦肉，輪流食感受雙重口感。
原隻炸子雞起皮配黑松露 薄脆＋啖啖肉
想一試師傅手藝，仲有呢道黑松露手撕雞。手撕雞望落簡單其實內有乾坤，因為師傅將原隻炸子雞起皮再手撕雞肉，食客可以食到薄脆雞皮之餘，又Enjoy 到手撕雞啖啖肉嘅過癮。
要將炸子雞原隻起皮，相當考工夫。
Lobby Lounge 極有質感座地3層下午茶
郊遊後想有個地方坐吓High tea，Sheraton酒店有Lobby Lounge 提供3層下午茶。最特別嘅地方係下午茶層架唔係放喺枱面，而係一個座地高腳3層架，令枱面有更多空間，想一邊食一邊睇吓書、玩吓電話都舒服得多。
下午茶有多款鹹點同甜點，從上至下慢慢食。
甜品控可以試埋多款自家製蛋糕。
有件裝或原個蛋糕揀。
五星級Staycation 都可以郊遊
如果想去東涌郊遊都唔使自己Plan 行程咁麻煩～Sheraton 酒店就有兩日一夜Staycation＋蜂園導賞團Package，真正可以Hea 住嚟嘆酒店同親親大自然。想知詳情就去酒店官網睇下啦!
香港東涌世茂喜來登酒店
Facebook: https://bit.ly/2UYLHi5