去澳門指定動作梗係搵間好食嘅葡國菜啦!! 揀間葡萄牙人開嘅話更加地道。喺氹仔官也街附近嘅「宮景正宗葡國餐廳」開業逾10年，環境以店主家鄉小物裝飾，無論氣氛定味道都高度還原葡萄牙風味。店主更笑言早前返葡萄牙，當地嘅葡式海鮮飯都無呢度咁好食(笑)，嚟到真係要試吓呀。
「宮景正宗葡國餐廳」樓高3層，每層都好有特色。
地下充滿葡萄牙地道風味。
2樓環境優雅，好啱約會。
3樓天台好開揚，嚟緊秋冬夜晚更加浪漫。
葡式海鮮飯Seafood Rice
海鮮飯用葡萄牙傳統陶鍋盛載，足料程度有驚喜。鋪滿龍蝦、青口、大蝦同蜆，真係可以一啖海鮮、一啖飯，正啊。海鮮飯嘅濃湯汁最精髓，係用龍蝦頭、上乘海鮮、番茄煮製，現成湯汁絕對扮唔到呢種獨特鮮甜味。完全瞬間清碗，難怪店主話去到葡萄牙都掛住自己喺澳門嘅海鮮飯啦(笑)。
葡式海鮮飯，海鮮真係好足料。
龍蝦好大隻肥美。
真係可以一啖海鮮、一啖飯，正啊。
烤焗馬介休Bacalhau Assado
講起用龍蝦熬嘅濃湯汁，喺其他菜式都會食到㗎，好似呢道烤焗馬介休就係其中之一喇。原來唔起眼嘅薯仔，係用咗龍蝦濃湯汁煮，天然鹹甜味之間又有啲海鮮味，係未食過嘅層次感。如果慣咗夜晚要食澱粉質，又唔想叫個白飯晒qouta，揀呢道馬介休絕對值得呀。
烤焗馬介休，唔好錯過用龍蝦濃湯汁煮嘅薯仔。
炸馬介休球Codfish Cake
馬介休作為澳門名物又點止一個食法，最經典一定係炸馬介休球啦。呢度係用傳統做法，用兩隻西餐匙羹將馬介休壓實再炸。內餡夠晒綿密，好做到外脆內軟嘅口感啊。
炸馬介休球，金黃香脆。
內餡係滿滿馬介休，口感綿密。
炸蝦角Shrimp Cake
呢度有幾款炸物揀，繼馬介休球之外最鍾意係呢款半月形狀炸蝦角，又脆又彈牙好正。
半月形狀炸蝦角。
蝦肉增加彈牙口感。
葡式乳豬(例牌)Suckling Pig
「宮景正宗葡國餐廳」皇牌美食之一嘅葡式乳豬，真係用乳豬仔所以肉質好嫩。出面燒到好酥脆，一咬落去已經好薄脆鹹香，配鮮橙、秘製醬汁幾解膩，仲有埋薯條好滿足。
葡式乳豬(例牌)，選用乳豬仔好嫩滑。
配鮮橙、秘製醬汁更解膩香口。
葡式三文治Francesinha
源自葡萄牙波爾圖嘅特色三文治，將厚實麵包上下夾住滿滿牛扒、煙肉，加埋上面嘅芝士同太陽蛋蛋漿，完全係三文治界天花板!! 啖啖肉牛扒+蛋漿真係極度滿足啊。
葡式三文治，絕對係三文治界天花板。
麵包上面有芝士同太陽蛋，內裡夾住滿滿牛扒、煙肉。
葡式牛扒Bife à Portuguesa
葡式牛扒Portuguese Steak完全係肉控福音!! 驟眼睇同葡式三文治有啲似，但佢係無麵包㗎。直接將優質牛扒、煙肉、芝士層層疊上，最上面再鋪隻太陽蛋。好值得挑戰一啖食晒咁多材料，完全係幸福嘅味道！
葡式牛扒。
優質牛扒、煙肉、芝士層層疊上，最上面仲有隻太陽蛋。
值得挑戰一啖食晒咁多材料，大滿足！
酒燒葡萄牙香腸Chourico Flambe
一開頭以為係普通大肉腸，估唔到係火焰登場啊。點火當刻瞬即炒熱氣氛外，呢種古法炙燒更會逼出腸嘅香味，未食已經聞到好香啦，外皮仲燒到好卜卜脆，一咬爆出肉汁。
酒燒葡萄牙香腸，火焰登場！
雜錦肉串Espetada de carne mi sta
同樣好有氣勢嘅雜錦肉串，餐廳畀個鉗我哋自己夾烤肉出嚟食，特別過癮。而且烤肉都好厚切，加埋煙燻燒炙香味幾地道。個肉串仲跟配埋沙律、薯條，好啱一班飲住啤酒share啊。
雜錦肉串，好有氣勢。
自己夾烤肉出嚟食，特別有風味。
燒牛肋骨Beef Short Ribs
食到中段，發覺呢度嘅份量真係好足!! 好似呢道燒牛肋骨，目測超過10片，仲要好厚切。牛肉燒到好粉嫩軟滑，伴碟仲有烤粟米、墨西哥小辣椒。
燒牛肋骨份量好足。
牛肉燒到好粉嫩，肉質軟滑。
燒海鱸Grilled Seabass
如果你白酒愛好者，配呢條燒海鱸好夾!! 外層燒到微焦，魚肉仲係好嫩多汁，仲可以食到龍蝦濃湯汁特製嘅薯仔配菜㗎。
燒海鱸外層微焦，內裡魚肉仲好嫩。
宮景正宗葡國餐廳
地址: 氹仔舊城區告利雅施利華街86號地舖
電話: 28576700