旺角地鐵站附近多咗間韓國嘢“Seoul Shiok”，色彩繽紛勁有氣氛。呢度有韓版嘅Mookata(燒肉&火鍋食法)，又有超澎湃瀑布拉芝士泡菜炒飯、街頭串串魚糕湯，全部熱辣辣好啱冬天食㗎。11月尾仲會推出聖誕優惠，記住留意餐廳動向啊。
仲有個重點!! “Seoul Shiok”價錢好親民，冬天必食嘅湯鍋—雪濃湯、嫩豆腐鍋、韓式大醬湯、豬肉泡菜湯等都係100蚊有找。料理分量啱啱好，就算兩個女仔都可以share一份炸雞、瀑布拉芝士泡菜炒飯同湯鍋，價錢平可以任性食多幾款嘛。
呢度嘅炸雞分量真心啱啱好，食得盡興又唔會膩到食唔到其他嘢。全部即叫即炸，火山辣炸雞更加又脆又香辣，鍾意香口嘢嘅話一定要試。
同場瀑布拉芝士泡菜炒飯都係必點!! 上枱嗰陣已經有個小火爐，員工再即席用火槍燒溶芝士，然後將芝士同泡菜炒飯撈勻，做出澎湃拉絲效果!!
11月新推期間限定—韓式燒肉湯鍋，將泰國地道Mookata(燒肉&火鍋食法)融入韓國菜。上枱嗰陣，鐵板已鋪滿牛五花、豬腩肉同泡菜。
我哋一開始食燒肉先，等啲肉燒到爆晒油脂就夾住泡菜食。之後又可以放落泡菜湯輕灼，酸酸辣辣都好正啊。其實呢個燒肉湯鍋無特定食法，隨心一邊燒肉、一邊打邊爐係最爽。
鍾意有個小火爐暖住食嘅話，仲可以揀韓國人好鍾意嘅街頭串串魚糕湯。大大串魚糕放喺金色小鍋中滾住上枱，直接成串拎起嚟食勁有風味。
大家都知韓國人好鍾意飲酒，冬天嚟食鍋物又點唔少得酒!? 私心大推新鮮蜂蜜米酒，因為米酒碗真係有大大粒蜂巢蜜!! 之後再自己倒入米酒好有儀式感。
濁白色米酒順口帶米香，再後續會滲出蜂蜜輕甜味。同埋蜂巢蜜係食得㗎，咬落柔軟又有種層疊黏口感覺，好特別㗎。
冬天真係唔少得熱辣辣嘅石頭鍋飯!! 我哋揀咗有好多蔬菜配料嘅飛魚籽石頭鍋飯，飛魚籽分量都爆多有驚喜!! 而且石頭鍋夠熱，撈飯嗰陣仲沙沙聲，成功整到飯焦食。
雞蛋卷亦做得好柔滑，加上滿滿飛魚籽有種細膩又卜卜脆開口感啊。
Seoul Shiok
地址: 旺角奶路臣街17號THE FOREST 1樓110及111號舖
電話: 35861959