「OOULI」有別傳統西式或日本菜，呢度主打韓國新鮮海鮮，每日由韓國直送到餐廳。以新鮮材料入饌，不失傳統精髓之餘，配合細膩手法製作正宗韓國菜式。
加上韓國釜山人老闆兼主廚Jim Kim，選用韓國自家農地種植嘅大米，由種植、稻穀脫殼至奉上予客人享用，皆保留最傳統韓國釜山風味。
餐廳位於銅鑼灣Sugar Plus，擅長高級精緻韓國料理。只要細心留意餐廳logo，會發現釜山標誌性「波浪」符號，並藉由餐廳名「OOULI」(意︰我們) 喻意成為食客與釜山之間嘅連結，將釜山主廚、韓國直送食材、正宗韓國手藝，以7/ 8/ 9道菜式展現韓國料理嘅極緻精美。
Starter頭盤: 海苔米漿脆片
特選2款韓國海苔，並用米磨成米漿包住海苔炸成脆片，入口鬆脆；配合3款自家製豆腐醬，層次再昇華。
海苔米漿脆片鬆脆可口，自家製豆腐醬令層次昇華。
韓國傳統粥品: Duel Kkae – Juk
韓國人每逢招待尊敬嘅重要朋友，都會熬製呢款粥品。當中加入牛肉、蜆肉、蘑菇等精心熬製12 - 15小時，配埋特別方法製造嘅米餅一齊食就更有口感。
粥品軟綿入味，材料新鮮、暖心入胃。
開胃菜: Han – Ip
大廚以細膩刀工將橡子果凍切成璀璨綻放嘅花朵，配上厚度適中、鮮嫩彈牙嘅八爪魚切片，附以零卡路里嘅自家製涷湯，既是一道精美手工菜，更是一道美味開胃小菜。
將果凍切成綻放鮮花，極考驗大廚刀工。
另一邊廂嘅炸豆腐三文治，同樣顯出大廚創意功架。內裡以薄切軟滑豆腐暗藏鱈魚子及主廚親醃泡菜；外層再用紫菜包裹油炸，糅合鬆脆、軟滑雙重口感。鱈魚子同泡菜喺豆腐中融和，更做出獨特質感。
雖然豆腐經過油炸，但依然細嫩幼滑。
人蔘雞湯Risotto: Bo Yang -Sig
傳統韓國人極注重呢道米飯菜式，因為佢哋堅信呢款係令人感覺幸福同充滿能量嘅食品！「OOULI」以人蔘雞湯烹調Risotto，每一啖都滿載人蔘味，連同雞絲一齊食，滋補非常。
作為韓國餐廳必有菜式，滋補而充滿正能量。
煎韓國紅魚: Jill – Tang
利用韓國直送嘅紅魚、蘿蔔自家熬製，將海鮮清湯打成泡沫，清新可口。
將海鮮清湯打成泡沫狀，表面灑上少許辣椒粉，清甜可口。
時令刺身拼盤: Jagal – Chi
日式刺身食得多，但其實韓式刺身同樣出色。「OOULI」每日特選韓國直送嘅唔同刺身，今次用咗左口魚、八爪魚、營養價值極高嘅海參，以及香港人較少接觸嘅海菠蘿作刺身拼盤。所有食材均為時令特選，並由韓國新鮮直送，因此會隨唔同季節時令變化。
海菠蘿初嚐帶甘，其後略帶苦味，最後又返回甜味，配合自家製辣海鮮醬口感層次更豐盈。
主菜3選1: Jan Chi – 烤韓牛Grill Hanwoo Beef
特選韓牛充滿油脂甘香，又鮮嫩多肉汁好juicy。配上自家製輕甜蘿蔔蓉，完美配襯濃郁韓牛，食落唔會油膩。
韓牛豐盈juicy、蘿蔔蓉綿滑甜香，兩者配搭相輔相成。
濟州豬腩Slow Cook Jeju Pork Belly
將濟州直送豬腩肉以以傳統方式烹調，並輔以韓國芝麻葉、薄酸蘿蔔片包裹豬腩肉同食，味道清香。
將韓國芝麻葉、薄酸蘿蔔片包住豬腩肉，味道清爽。
烤鰻魚 Roasted Freshwater Eel
鰻魚貴為韓國料理中嘅高級食材，「OOULI」不但烤得極為甘香，更以特別嘅帶薑味薯蓉襯托，配合少少辣嘅自調海鮮汁，口感一絕。
鰻魚烤得香，薑味薯蓉夠特別，令人一試難忘。
OOULI韓國米 JinSu - Sung Chen
呢碗米飯驟眼好似無特別之處，但其實大有來頭。因為米飯均由老闆兼主廚Jim Kim於韓國釜山自家農場出產，當中由種植、收割都源於韓國。
當稻米直送香港後，會於餐廳現場即時剝殼，再用韓國特別訂製蒸飯機即時煮製，絕不交由外人處理。配上每日熬製十多小時嘅新鮮魚湯；以及5種配料—韓式黑豆甜合桃、醃製芝麻葉、魚鰾伴菜、韓國辣椒、牛蒡配飯食，絕對係「OOULI」誠意推介。
米飯由老闆兼主廚Jim Kim於韓國釜山自家農場種植，加上新鮮魚湯及5種配料，誠意滿分。
糯米窩夫 Sticky Rice Waffle
「OOULI」打破坊間常用麵粉所製waffle，改以糯米粉製作，做出Q彈煙韌口感更有韓國特色。配上自家製雪糕，為呢餐fine dining畫上完美句號。
Waffle以糯米粉製作，口感煙韌有彈性。
同場加映 極罕酒類
「OOULI」不但料理花滿心思，更與唔同酒廠達成協議，積極引入大量香而不濃、醇而不膩嘅美酒。惟供應有限，記得預早查詢。
所有酒類均為期間、數量限定，記得查詢預約。
OOULI
地址: 銅鑼灣糖街31號 Sugar Plus 23樓
電話: 27708666