一向主打高質、玩味料理嘅“GoodDay BadDay MamaDay”，全店都有搞鬼裝飾，想輕鬆歡樂過聖誕就啱喇。今年推出兩個聖誕二人餐，分別有$888、$688選擇。聖誕期間，現場仲有Live Band表演炒熱氣氛。只係幾百蚊食得豐富又有歌聽，絕對抵啊!!
其實兩個套餐前菜都有精緻松葉蟹番茄濃湯、聖誕樹(估唔估到食咩😂)、火雞蔬菜卷，並同樣一人一份MamaDay聖誕甜品㗎。最唔同係「聖誕二人餐$888」會多咗美國安格斯(無激素)自然牛肉眼 (12oz)、波士頓龍蝦意粉，想聖誕鋸扒、食龍蝦揀呢個餐無有錯喇
不過入門價「聖誕二人餐$688」CP值都好高，主菜會變成波士頓龍蝦西班牙炒飯(2人份)，原隻龍蝦霸氣十足!! 米飯都吸滿龍蝦、青口同高湯精華，每啖都有好香香料味，儀式感絕不輸蝕啊。
聖誕二人餐$888
-松葉蟹番茄濃湯 -聖誕樹 -火雞蔬菜卷 -美國安格斯(無激素)自然牛肉眼12oz -波士頓龍蝦意粉 -MamaDay聖誕甜品 -荔枝玫瑰梳打/德國水蜜桃茶 2杯 +$38紅/白酒 1怀 +$29香港手工啤酒(像極了愛情) |
聖誕二人餐$688
-松葉蟹番茄濃湯 -聖誕樹 -火雞蔬菜卷 -波士頓龍蝦西班牙炒飯(2人份) -MamaDay聖誕甜品 -荔枝玫瑰梳打/德國水蜜桃茶 2杯 +$38紅/白酒 1怀 +$29香港手工啤酒(像極了愛情) |
【濃湯&前菜】歡樂聖誕氛圍
兩個套餐嘅濃湯、前菜都好有節日氣氛，鍾意浪漫又唔想食得拘謹就啱晒喇。
松葉蟹番茄濃湯
色澤鮮艷嘅番茄濃湯為聖誕餐打開序幕，滿滿松葉蟹肉令酸甜熱湯更有層次。
聖誕樹
多件脆脆蒜蓉包砌成聖誕樹，有種可愛童心氛圍。上面淋滿番茄洋蔥莎莎，食落更爽脆多汁幾過癮。
火雞蔬菜卷
以往聖誕節都係食一片片嘅火雞肉，今次將火雞肉包住蔬菜，令豐厚有嚼勁火雞肉更juicy，每啖都大大件勁有滿足感，蘸埋伴碟薯蓉又係另一種風味啊。 
【聖誕二人餐$888】超大肉眼扒+龍蝦意粉主菜！
美國安格斯(無激素)自然牛肉眼12oz
呢件12oz肉眼扒真係值回票價，因為真係好大塊!! 自然飼養令牛扒脂肪分布、肌理都更平均，肉質柔軟又重肉味。
私心鍾意大大塊嘅蝦片，同朋友一齊拎住食吓、飲吓酒幾chill。同埋伴碟個沙律有菜又有少少水果，有時食到香甜果肉，心情又會開心啲。
波士頓龍蝦意粉
原隻波士頓龍蝦擺盤超霸氣，龍蝦切件又可以輕鬆拮出龍蝦肉，女生都可以保持靚靚地食完隻龍蝦啊。龍蝦肉同意粉都有好香海洋同香料味㗎。
MamaDay聖誕甜品
甜品係淘氣聖誕小精靈造型，一次品嚐香甜士多啤梨、大福同蛋糕，聖誕大餐於歡樂中圓滿落幕。 
【聖誕二人餐$688】
波士頓龍蝦西班牙炒飯(2人份)$688套餐先有嘅波士頓龍蝦西班牙炒飯，將美國龍蝦融合西班牙風味，單單豐富龍蝦肉、青口已經推高CP值啦！而且每啖軟Q炒飯都有濃郁海鮮味，兩個人share呢個分量真係捧住個肚走啊。
【單點推介】
除咗聖誕套餐外，“GoodDay BadDay MamaDay”都有好多單點料理值得追加㗎。
呢度嘅封門柳肉味特濃，如果幾個人嚟食聖誕餐肯定要追加埋佢啊。封門柳亦被稱為牛隔膜肉，全因肉位喺牛腹兩側、靠近前腿之間，可想而知活動量較高，難怪肉質咁彈牙。每隻牛只有一塊封門柳，唔係度度食到㗎。
一直高人氣嘅黃金軟殼蟹意粉，以傳統鹹蛋黃意粉煮法，煮出creamy惹味嘅鹹蛋忌廉。再配上特大越南軟殼蟹天婦羅，酥脆香口。
聖誕食個傳統芝士火鍋好有幸福感～芝士火鍋有波士頓龍蝦、日本帆立貝、新西蘭青口、西蘭花、方包粒、薯仔。浸落濃郁芝士瞬間，已經感受到芝士綿密濃郁質感啦。就算聖誕夜食唔落，呢個冬天一定要搵機會嚟食!!
GoodDay BadDay MamaDay
地址: 尖沙咀加連威老道27-27A號嘉榮大廈地舖及1樓
電話: 94241449