功夫點心 (已結業)

每逢放假都鍾意陪屋企人去茶樓飲茶嘅，但有時係攞位煩左啲，但如果係鍾意食點心嘅話，我相信功夫點心會啱你食佢都算係價廉物美，又唔洗點樣排隊先睇下佢個武林秘笈造型嘅點心紙價錢都算係親民，每樣點心都各自有自己收費茶芥就＄5一位依個叉燒包真係唔錯，皮脆而餡多炸腸亦炸得脆卜卜，腸粉皮滑個數量就少咗啲啲。個荷葉飯都幾好味，係食得出有少少鮑汁既依味我就冇食到，不過屋企人話都算唔錯，好趣嘅地方係佢係用薯條薦底嘅鹹水角係新鮮炸好嘅，熱辣辣脆卜卜，餡料亦多餐廳嘅燒賣同埋蝦餃都可以一粒粒上，但至少要叫兩粒起，味道不俗依個糯米糍算係幾特別，內裏放燕麥我都係第一次食，味道都幾好燉鮮奶亦好夠奶味整體來講點心質素唔錯，一家四口來食除開先至每人＄50左右，算係咁啦

第100篇！食左好多美食，從未試過食點心好似今晚咁食到想嘔！一怒之下，決定放佢係第100篇出😡一家人今日都早放工，於是一齊食點心，見到黃埔呢一間點心店新開，試下！餐廳地方算大，光線充足，裝修及餐廳內隱約的味道像是回到祖國的懷抱。食物款款皆失望！最驚為天人嘅有：雲吞麵面底冧gg，成Pat野發晒漲咁，湯底味道奇奇怪怪，望見唔開胃食落更反胃。叉燒包入面啲叉燒味道古怪，係我食過最難食嘅叉燒包，叉燒包都可以整成咁簡直係太神！ 其他食物如腸粉、蘿蔔糕、牛肚等都真係俾佢嚇到個心都離一離啊！黃埔咁多嘢食，真係未到要放呢種劣點入口嘅地步！This is the worst dim sum place I have ever been to ! Horrible !

每逢周六周日都鐘意同屋企人飲茶，但等位耐之餘食物質素都會有參差唔穩定既情況，所以就試試間專食點心既食肆，如果特別鐘意食點心既話會係唔錯既選擇先講環境，佈局似係一間坐得舒服嘅茶餐廳，再睇點心紙，設計得好似本武林秘笈我地一家人叫既點心大家睇我地賣單張單就知，每樣都無得彈，主要叫左佢地推介既果啲點心。想講既係佢地真係每樣點心即叫即整，所以真係新鮮滾熱辣價錢方面唔收加一，四個人食240蚊都唔洗，而且點心質素絕不輸俾普通酒樓（甚至更好）推薦俾鐘意食點心既人

喺黃埔地鐡站對出新開咗呢間功夫點心，返工前諗住飲個快茶試新嘢，不過食完比較失望，真係食一次就夠！（1）蘿蔔糕算足料而且幾香，不過比較油，食落又太過硬身，覺得普通。（2）限量供應嘅黑芝麻松皮包諗住有驚喜，點止個包好乾身而且偏苦，味道有啲怪！（3）濃湯魚肚鮮竹卷味道好淡，而且餡料好似痴埋一齊咁，咬落口感麻麻。（4）燒賣大大粒味道唔錯，而且可以最少叫2粒，1粒$9，2個人食就可以唔洗叫咁多，留番肚食其他！

I was back in UK last year so missed out on so many Zongzis.This year tried the ones from KungFu and it comes in a set of three in a lovely box.The most memorable one was the sweet red bean because the filling was runny and the whole thing was not too sweet.The savory ones were just as good and loaded with rich salted egg yolk and fatty pork.

今日同朋友黎到黃埔，行行下覺得肚餓，就想係附近搵個地方食個下午茶，地鐵站一出，就見到呢間功夫點心，裝潢充滿中國風，又唔洗排隊，就入去試試。叫左幾個點心，每次食點心，必點馬拉糕，一間點心鋪，一食就知龍與鳳，呢度既馬拉糕樣貌太工整，味道都好普通，唔係自家做。而菜苗餃就好啲，餡多，菜又鮮，遺憾既係個皮太厚，要用多啲力先咬得開。最後係呢個新款煎糯米雞，同普通糯米雞分別唔大，重點係煎完後好油，感覺唔討好，想試新花樣既，可以試下。

見新開張第一次幫襯，唔洗排隊，環境唔太迫坐得算舒服。✔️蝦餃同燒賣係以每粒計算，都幾大粒同好大隻蝦$9粒黎計唔算貴，抵過酒樓廿零蚊4粒。💯✔️叉燒腸粉份量幾足都算滑最衰唔夠熱。❌飽汁鳳爪份量大約5隻唔太入味。👌🏻馬拉糕聽講係人氣之選，不過我覺得無咩特別。❌最後牛腩上海麵，牛腩味唔太濃不過就好淋但口感好鞋，個樣食得出係一包包果d倒出黎加熱上海麵一patpat痴住太淋，一句講晒唔好食可以唔洗試！🙅🏻講完食物到服務，我地入座時間係一點前唔算特別繁忙，成餐飯唯一唔滿意就係一位員工，連續兩次無睇清楚蒸籠食晒野未就拎走，同佢講之後一野擺低，唔好意思都無句😤，果位短髮帶眼鏡女職員無禮貌都算仲全程黑晒面好似欠咗佢咁。😡其他職員雖然都係無咩笑容咁工作，但我覺得作為食客除左食食物質素，服務都好重要。希望管理層唔好只係注重食品，員工既態度都好影響顧客會唔會再幫襯！畢竟你地唔係澳牛🤔

假日中午排咗15分鐘，兩個人叫咗四款食物:酥皮菠蘿包，餃子上海麵，灌湯餃，松皮芝麻包，連每位$5茶錢，共$98。價錢可接受，但等候食物需時(因其自稱即叫即蒸)，最重要的是味道很差，見圖就明。灌湯餃係我食過有史以來最難食的，肉唔新鮮，口感係一pat粉，仲要食完勁口乾！無下次了，還是去附近的點點心或者酒樓穩陣d。另外可能新開，人手不夠，叫咗幾次d姐姐根本無時間加水！

見到新開張所以專登嚟試一試...但實在非常令人失望⋯⋯等時間長我明白，因為係即叫即蒸.....我叫咗咖哩魷魚....顏色賣相ok 但放入口係 ...完..全..無..味！我亦不明白為何剛篜出來的腸粉可以咁乾....（我order嘅係义燒腸）鮑汁鳳爪⋯⋯林就夠林但亦係完全無味！！！應該係蒸完先淋鮑汁上去....我用匙羹畢左一啖汁...都係無味的😡⋯⋯真係好失望！好失望！好失望！這將會係我最後一次來幫襯......