千色車仔麵

營業中

休息中

千色車仔麵真係食咗差唔多20年，味道係完全冇變，我不能講佢好好食，只能講佢保持水準，幾年冇食今次再去食，特別欣賞係佢嘅豬紅，非常入味，大腸就好似比以前遜色咗，其他都保持倒水準。環境咁多年都係冇變，都係細細間坐得咁辛苦，唯一有變嘅就係價錢，今日叫咗一個油麵，豬腸，豬紅，辣魚蛋，魷魚，冇飲嘢都要62蚊，不過算啦間唔中食一餐佢個辣汁又真係幾好味。份量就真係唔係幾足食完唔係好夠飽，其實我係深水埗文記嘅fans，荃灣冇乜好嘅車仔麵選擇，千色叫做可以頂下癮。

因工作關係經常都會經過荃灣千色店，一路都好想試依間攞到米芝蓮推介既車仔麵小店但經常都坐滿人，今日見到比較少人所以終於決定入去一試。鋪頭細細間坐位不算多，似係舊式平民小店格局，無睇價錢隨便叫左3餸油麵再加杯豆漿，俾錢時發覺原來都已經六十幾蚊，價錢都算偏貴，所以更好奇質素如何。我配料揀了鳳爪，豬腸，牛腩。先講湯底，佢係偏重味但不會覺得好鹹，係常見加左腩汁既湯底味道，不會重味精味又唔會令人好口渴，算係不錯。油麵滑身但無咩咬口，普通貨式。牛腩不會話太硬或太腩，合格但普通既感覺。豬腸煮得好淋但似係用梳打粉乸完既效果但勝在夠入味，不過個人鐘意厚身有咬口既感覺，下次唔會再叫依款。鳳爪又係煮得夠淋，味道不錯，唯獨無預先剪走鳳爪指甲感覺差少少。豆漿都係一般合格水準整體感覺係穩穩陣陣，不會話好驚艷好好食嗰種，但都會有興趣再試其他款式配料，不過就唔會一次叫太多款餸，因為去到7,80蚊食一個車仔麵就太貴了

22-12-2023 (Fri)冬至放半日,返荃灣會合亞姨食晏,天寒地凍,問佢想食咩嘢?佢答食粉麵,唔….車仔麵啱唔啱?佢答啱.咁就嚟呢間啦.我哋嚟到時都多人,就順住排隊揀麵同餸,我揀油麵,要豬紅,魚腐,墨丸同豬皮,盛惠$59.00.亞姨都要油麵,貢丸,冬落同唔記得咩,盛惠$46.00.攞咗後好彩有位,熱騰騰嘅麵食,所有嘢都正常冇問題,不過豬皮本身係辣,但好彩唔係好辣.抵食係2.5分上次食評係2019年10月14日刊登嘅呢篇:https://www.openrice.com/zh/hongkong/review/%E5%94%94%E6%80%AA%E5%BE%97%E7%8D%B2%E5%BE%972019%E7%B1%B3%E4%B9%8B%E8%93%AE%E7%8D%8E-e3567432

之前外賣食過一次，今次記錄下第一次堂食。點左豬腸、蘿蔔、雞翼、冬菇、辣汁中辣。辣汁好味，辣度夠唔太油。麵底唔係好大，食四個餸只係剛好。再餓D恐怕唔夠飽。雞翼冬菇入味，蘿蔔甜，豬腸都可以。豆漿正常。食左兩次味道水準都算穩定。環境夠一般，但食車仔麵太華麗會無feel㗎

4/11 第一次去食，本來是喺老馮等位點知老馮今日特別多人所以就試一試嘅米芝蓮推薦，點知買完碗面正想坐低被極其凶惡嘅老闆娘阻止，理由是後面有三位客人正好坐喱張臺咁話。叫我拎住碗面企住等位。簡直令我無法接受。這種經營方式點樣配有米芝蓮推薦？不值得推薦…

四點幾有少少肚餓但晏啲又食晚飯所以就諗住叫幾個餸我叫咗生菜 ： 有五小塊擹返開度下應該有一隻手掌咁上下大牛腩 ： 三粒大過骰仔少少嘅牛腩加一粒牛筋豬腸 ： 半隻手指尾咁大，共三舊最抵食係牛丸 ： 三粒正常size 盛惠 $48其實啲份量加埋真係得一個拳頭咁大食咗真係同冇食差唔多總結：少少肚餓又唔可以食飽，呢間真係冇得輸。

呢間係我食車仔麵首選，感覺親切！必食豬豬腸、白蘿蔔、冬菇！其實中有好多餸都想食🤤 千色車仔麵係最舊式櫃台叫麵㨂餸，即時自己拎埋位，冇伙記幫你架，不過人哋又冇收加一服務費😅！但叫餸要講大聲d!因為櫃台內可能因為爐具及抽氣扇開著，姐姐都會大聲問食咩？初初覺得佢地惡，但諗諗吓帶住口罩，咀形都冇得估，聽唔到就唔出奇嘅！

體驗差到雪藏cd rom要第一次寫食評💩午飯時間見倒無人排都覺得唔對路，附近餐廳排晒隊又見門口大大個牌寫住米芝連推介先試下🤮餐廳環境係普通舊式麵檔咁，乾淨就一定唔會，但已經係綜合分數入面最正路果樣🤮阿姐無禮貌，見倒熟客掛住吹水對生客態度勁西份量少得可憐，味精重，食完飲多多水都唔夠！價錢唔算好貴但以車仔麵黎計唔算平。平過佢既價錢，係附近或者行多幾步去路德圍都大把選擇，荃灣區咁多好野食，無謂貼錢買難受！米芝連？街邊檔都好食過佢多多聲！咁既質素唔好話米芝連，未執笠都係神績。真心建議大家咪再中伏！千企唔好俾個所謂既米芝連推介呃倒，

細細個我就好鐘意食元朗嘅永年但近年都食唔返嗰個味道而呢間米之蓮已經係第二次嚟食平時經過門口都聞到好香而且食到回憶嘅味道由細到大都係食油面今次食咗六個餸因為有兩個人豬紅味道好好豬腸唔會好似橡筋咁好軟身好好咬籮白好林好入味雞亦好入味啲肉仲好滑牛根同牛腩就比較一般勁想飲埋啲湯但冇只係飲咗杯豆漿其實本身都唔係太肚餓但真係好好味所以都食得哂但同細細個比較車仔面真係貴左好多菜都唔送條嚟食吓絕對值得推介平民米之蓮

叫了雞翼、冬菇、蘿蔔、通菜米粉。雞翼好入味，但唔會煮到甩皮甩骨，煮到剛剛好，整好味😋！蘿蔔鮮甜無渣，咬落多汁美味！好味道！蠔油蚊冬菇，極簡單的餸，但係都可以煮得咁好味，真係好難得！又健康又好味。通菜新鮮，食落無渣，健康之選，唔好食太多肉，對身體唔好。配埋佢個辣汁，簡直係極品。個辣汁辣到啱啱好，唔會搶喉，好惹味，鍾意辣嘅朋友一定要試吓。朋友叫咗鳳爪食，佢話未食過咁好味嘅鳳爪，每次必叫，有興趣嘅朋友可以試吓。兩人夾埋都只係$109。

相信車仔麵無咩香港人無食過。但攞到米仔嘅推介就唔係個個食過。今日去開荃灣開會，見到車仔麵，諗下諗下都好耐無食，於是膽粗粗入去試下。每次食車仔麵通常都食油麵，望下d 餸，揀咗豬腸、魷魚、牛腩、魚皮餃、少辣，加埋杯豆漿盛惠$64，話貴唔貴、話平唔平！先黎試下個辣，兩個字--無乜！係無乜特別，再試豬腸，正常質素跟住魷魚，無想像中好食。以前洪水橋有間8哥就好食10倍。再黎牛腩，中規中矩，細細粒，普通最後，魚皮餃，估佢係來貨，但估唔到最好食係佢。食完結論係，好肚餓，可以一食。有得揀，可食其他。黑人問號係，攞咗咁多年米仔，why?

先生成日同我提住荃灣有間米芝蓮車仔麵，一直都想去試下，次次都齋噏，今日趁住行完街，總於可以會一會佢。鋪頭就喺正千色店側門，一行出門就可以見到大大個紅色招牌。門口仲有大大個易拉架，原來已經連續四年獲選為米芝蓮推介街頭小食，相當把炮，經常出入荃灣區嘅我哋，居然第一次食。鋪頭嘅叫餐形式好特別，一般車仔麵店通常喺收銀先點餐付費或者坐低慢慢喺點餐紙圈低食物再落單，呢到係需要食客行埋廚窗直接講出想食啲咩，然後即時製作並收錢，好處係可以望下有咩食同食物嘅質素再落單，而且睇得出食物排佈得井井有條，感覺衛生；但缺點係唔太方便，而且食客對住廚窗落單，難免口水花四濺，變相影響衛生。我揀咗牛腩、豬皮同蘿蔔，配搭小辣湯底同米粉，湯底味道唔錯，配上辣汁令味道更鮮濃，辣道亦適中。牛腩細細粒，雖然份量唔算多，但炆得夠軟腍，而且相當入味，非常推介！豬皮質素亦唔錯，處理得好好，冇一般食到嘅腥臊味，反而吸收哂湯底嘅精華。先生嘅口味同我大同小異，有牛腩、蘿蔔同豬紅，豬紅同樣入味，而且口感嫩滑。食完之後大抵明白點解佢可以得到米芝蓮推介，食材新鮮入味，湯底鮮濃，而且價錢非常合理，絕對有資格成為荃灣街坊嘅平民飯堂。大概香港人要求高

千色車仔麵呢間位於荃灣千色後面嘅車仔麵已經連續幾年獲得米芝蓮推介，餐廳細細但係成日都好多人，雖然款式唔算好多但的確好味。同一般嘅車仔麵唔同，湯底只有一款，另外可以再選擇加唔加辣醬，雖然係咁但佢嘅湯底的確好濃味，而且佢嘅辣醬非常之香同惹味，係成個面嘅精髓。配菜方面，今次試咗滷水雞翼、響鈴、咖喱魚蛋、魷魚、魚肉、牛柏葉、蘿蔔。大力推薦佢哋嘅魚肉，真係非常之滑，又好有彈性，係我暫時食過最好食嘅魚肉！魷魚亦都爽口但係唔韌，用過啲咖喱辣汁醃制，都算唔錯。至於其他餸菜都正常水準，唔會令人失望。整體來講個車仔麵勝在佢嘅辣汁同埋湯底夠正，選項就唔算多，但食落都幾惹味，不過如果唔食得辣嘅就可能會覺得遜息咗啲，因為佢大部份配料都係就咁滾熟，如果冇咗個辣汁就會淡味咗啲。價錢方面面底$10，至於啲配菜就有$6至$12不等，平平哋不過份量唔算太多。順帶一提，佢哋係坐低之前係個廚房度落咗order收咗錢先，但係負責煮面嘅嗰個人經常聽唔到客人要啲咩，搞到經常出錯，所以大家去食嘅時候記得睇緊啲，make sure佢煮啱你碗麵！味道: 4.2/5性價比: 4/5

前日(12-10-2019 Sat)朝,同老公剪完髮都接近晏晝,由於佢喺KFC食得唔開心,所以要食個晏,我就因為飽,食唔到一個餐,只可黐少少,佢就話嚟食車仔麵啦,都好嘅,買一碗一齊食,我就只揀咗豬皮同蘿蔔,其他由佢發辦,佢就要咗油麵,鳳爪,豬腸,豬紅,要包菊花茶,咁就$61.00.我食吓豬腸,口感唔係橙色嗰隻鹵豬大腸咁爽,而係腍,但入晒鹵水味,不過可惜仍食到啲腥味;豬皮口感啱啱好;蘿蔔,豬紅,油麵都正常;鳳爪亦夠腍同入味;而湯底本身都有少少辣.上次幫趁原來已經係14年嘅事,嗰個食評: https://www.openrice.com/zh/hongkong/review/%E7%AC%AC1838%E7%AF%87%E9%A3%9F%E8%A9%95-%E5%85%A5%E5%91%B3-e2379020

位於荃灣嘅千色車仔麵店，係米芝蓮推介嘅車仔麵，有好多街坊會專登去食，麵底、佐料包羅萬有，亦都有獨家秘製醬料。一個人收工唔知食咩，做好就去食碗車仔麵！其中牛腩、牛筋、魷魚都係招牌菜。仲有呢度嘅秘製醬料令人食過返尋味，令成碗麵味道好入味，啲麵索晒超入味。