南記粉麵 (新都城中心二期)

營業中

休息中

有得揀嘅話，小秘書都比較鍾意搵啲濕濕地嘅嘢食，尤其係湯米線嗰類😋 所以好多時都會幫襯「南記粉麵 」🍜鍾意佢湯底熱辣辣、配料選擇都算多😄 今日小秘書 就同朋友叫咗個大什錦米線，貪佢咩都有啲、仲有我至愛嘅春卷🐟魚肉條炸得好香口，但係又唔油膩🤩（相中前端啡黃色嗰兩條就係）😍 每次食到都好有回憶... 因為我都係比鴛鴦河（春卷配牛丸、魚旦）餵大㗎🤣🤣

南記牛魔王米線，有牛丸、肥牛、牛腩，牛味好夠，牛丸彈牙，牛腩好腍身。而且湯底都好香濃。朋友則揀咗番茄湯底，都好好味，真材實料煲出黎，仲有原個番茄咖。成碗無論係餸定麵既份量都好多，食完十分飽肚。

位置：所在位置於新都城商場內2樓，鄰近全是餐廳食肆，猶如一個國際化的小型美食廣場。環境：可能是商場注重商店形象吧，此分店形象有別於一般街舖，這裡座位不算多，但地方非常寬敞，而且非常乾淨，裝修亦比較新穎。街鋪的分店不是座位又逼又窄，就是走廊堆滿貨物，這裏算是全香港最寬敞最乾淨的一間了。食物：點了辣豬肉米線，食物質素依舊保持水準。服務：排隊點餐時收銀員只顧着與同事談天，不夠主動及禮貌。後來用餐途中聽到另一位客人以粗口大罵收銀員，內容大概是投訴收銀員的服務態度，看來店舖經理需要努力提升一下服務質素。

喺寶琳睇完戲見到呢度有間南記，估唔到唔駛過海都有得食，於是就坐低食嘢！叫咗碗春卷貢丸米線，雖然唔喺港島但好在質素都正常！而且佢勝在營業時間長，睇完戲差唔多成10點都仲有得點餐，位置都尚算闊落！下次都會再嚟食！

以前係港島區返工，整日食到香港仔南記，超鍾意食，平得嚟又好好食，今次剛好要去新都城，醒起有間南記，於是叫左兩個外賣同我媽媽返屋企開餐例牌叫魚肉春卷併魚腐河，而媽媽就叫咗招牌滋選米線，我仲好隆重其事咁叫左分湯，廢事返到屋企淋哂唔好食！滿心歡喜返到屋企，開外賣嚟食，即刻入啖湯先....嗯....咁淡嘅，唔緊要再食啖河粉先，d 河粉咁「鞋」口嘅，非常失望，水準大跌啵老細。再食埋佢嘅魚肉肉卷同魚腐，入口只係得粉漿嘅味道，無魚肉嘅味，都係令人失望。以後都唔會特別再去試lo。

這天我和朋友在寶林看完電影後，已經是晚上10時多，很多餐廳已經關門，我和朋友經過這間粉麵餐廳便決定入去試一試，店內環境清潔衛生，而且店內的顧客延多招牌滋選($56)十分軟彈煙韌的春卷，爽彈鮮美的辣豬肉，爽口微彈的魚片，冬菇十分煙韌，用新鮮番茄制成的番茄湯，番茄味十分濃郁，彈牙的米線豆漿用新鮮黃豆製成的豆漿，豆味十分濃郁整體來說，食物的選擇延多，食物的用料很新鮮，食物的製作是即叫即做的，食物的温度延高，食物的份量非常多，食物的定價很合理，所以我認為這間餐廳值得再去惠顧

鍾愛南記既我終於等到有間近少少既南記，唔洗過海、唔洗係觀塘 紅磡行一段路先食到，好感動呢間係屬於open area，位置比較少 食店既空間都無用盡，所以我諗佢主要係做附近住客生意，因為住客可以外賣番屋企食~平時好中意食南記酸辣（補充：係十分推介！順帶一提，佢既辣椒醬真係好令人上癮）。今次食呢間最新開業既南記，就試下佢既蕃茄湯 因為之前一直都無食過。佢既蕃茄湯都真係幾濃 幾入味，帶點甜既湯底 唔會酸 個人認為反而更酸會令人更開胃。「春卷」係招牌餸，皮肉分明，增加口感層次，果然係絕對唔令人失望既招牌菜；米線一如既往既幼細同韌牙 好有口感，麵質唔會林，加上令人回味既湯底，每啖米線加微量既湯，啖啖使人十分滿足價錢唔算吸引，但佢真值此價有機會就食下午茶啦，就會價錢合理啲~

小妹👧🏻學校附近最近開咗間南記，之前多數得港島先會揾到南記，喺將軍澳區都揾到南記實在太感動😭自此之後就成日走出寶琳食👦🏻每次都食好大份嘅大什錦河，有招牌春卷、牛丸、魚蛋、魚皮餃、墨魚丸，佢話食河粉特別飽肚😂我就比較細食🤪多數都淨係嗌個招牌春卷墨魚丸雙拼米線，南記湯底幾清，每次去都會加少少佢哋嘅辣椒醬🌶特別好味，墨魚丸好爽口✨超級推薦南記嘅春卷👍🏻👍🏻貪興嗌咗個辣爽爽大腸試吓，幾腍又夠辣，夠哂惹味

下午同媽媽去左食南記 嗌左春卷竹笙麻辣米線加豆漿 米線係好食既 鍾意呢隻麻辣湯底 豆漿好淡好水 好明顯唔係豆磨 算 食物問題不大 最大問題係個收銀個態度 我明南記都算快餐要快 但明明後面無人排隊 都講到勁急 第一次去食 唔係好熟點樣叫餐 個收銀就一輪咀講唔可以點點點 要唔要咩 要唔要咩 完全唔知佢up乜 都未揀麻辣程度佢自己就default左隻辣俾我 我同佢講返要中辣 佢就話下次早啲講 如果係咁影響你落單既程序 點解唔問多次我？ 你叫我早啲講 其實你都需要同我confirm order囉 麻煩請個唔係趕住去投胎既收銀please 因爲呢個收銀 我要俾劣評 成肚氣

我好鍾意食米線，南記係一間我幾鐘意幫襯既米線鋪！得知屋企附近開左間分店，就好開心（因為唔駛日日起身都食譚仔......有多個選擇）點知依間南記完全係失色！第一次新開張買外賣食完係失望，第二次係相隔一個月堂食，依然係好失望！好失望！好失望！湯底係無味😔 完全唔似係南記作風！旺角 銅鑼灣 灣仔 長沙灣既分店我經常幫襯，因為真係好味！湯底夠濃又辣又酸, 但寶林依間完全食唔出......... 希望管理層真係好好改進一下！我唔想將軍澳既居民食到間唔好食既南記就對出面既分店失去信心！

新界新一間南記呀！將軍澳第一間南記呀！超開心！勁興奮！仲要開左係屋企樓下商場！方便到十級方便！呢間南記都算大，應該有50-60個位！食飯時間除左滿座之外，外賣既人都唔少！但係收銀姐姐絕不手慢！勁快就買到！廚房既哥哥姐姐都好快手！非常滿意！招牌春卷係必叫必叫既餸！我呢個係招牌春卷加牛腩！麻辣少辣湯底！走韮菜！ $42 外賣唔使加錢！我平時係食開酸辣，今日想試下麻辣！超好味呀！兩條春卷，同其他分店係一樣味，我會再沾佢地招牌辣椒醬！牛腩有3舊，煮得好冧好入味！仲有勁多米線！食完勁飽！麻辣小辣岩岩好！中辣可能食唔到！